Nur-Sultan qalasynyń bas sanıtar dárigeri Janna Pirálıeva karantın rejımine qatysty jańa qaýly shyǵardy.

Qaýlyǵa sáıkes, qala turǵyndaryna oıyn-saýyq, sporttyq jáne basqa da buqaralyq is-sharalardy, sondaı-aq otbasylyq, eske alý is-sharalaryn (banketter, úılený toılary, mereıtoılar, eske alý), onyń ishinde mıtıngıer, sherýler, jıyndarǵa salynǵan shekteý jalǵasady.

Áleýmettik qashyqtyqty mindetti túrde 2 metrden kem emes saqtaı otyryp, jeke tártippen jáne 5 adamnan aspaıtyn toppen tek ashyq aýada sporttyq jattyǵýlar ótkizýge bolady.

Qyzmeti qaıta bastalmaǵan obektiler – bılıard, karaoke, boýlıng ortalyqtary, kompıýterlik jáne oıyn klýbtary, túngi klýbtar, jabyq ǵımarattardaǵy balalar oıyn alańdary men attraksıondar, batýttar, karaoke, býkmekerlik keńseler men lotereıalar utys oıyny jáne t. b. barýǵa tyıym salý kúshinde qalady.

65 jastan asqan adamdardyń qala jáne qoǵamdyq oryndar boıynsha júrip-turýyna shekteý áli de jalǵasady.

Mindetti túrde betperde kıip jáne keminde 2 metr áleýmettik qashyqtyqty saqtaı otyryp, aýlalarda serýendeýge jáne saıabaqtarǵa, alańdarǵa, skverlerge, jaǵalaýlarǵa 3 adamnan aspaıtyn toptarmen nemese bir otbasy múshelerimen barýǵa ruqsat.

Qoǵamdyq oryndarǵa, onyń ishinde qalalyq qoǵamdyq kólikterge jáne qyzmeti ruqsat etilgen obektilerge barǵan kezde, kóshede júrý kezinde (5 jasqa deıingi balalardy qospaǵanda jáne ashyq aýada sportpen shuǵyldaný kezinde) betperde kııý, qashyqtyqty saqtaý jáne antıseptıkterdi paıdalaný jónindegi talaptar qatań saqtalýy qajet.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir