ShQO shekaralyq aýmaqtardy damytýǵa qomaqty qarjy jumsalmaq

Ortalyq kommýnıkasııalar qyzmetinde ótken baspasóz konferensııasy barysynda Shyǵys Qazaqstan oblysynyń ákimi Danıal Ahmetov shekara mańyndaǵy aýdandardy damytý týraly aıtty.

Oblys ortalyǵynan shamamen 400 shaqyrymdaı qashyqtyqta Qytaı Halyq Respýblıkasymen shekaralas ornalasqan bes aýdannyń damý qarqyny baıaý. Osy rette, ortalyq pen shalǵaı aımaqtardyń arasyndaǵy jaǵdaıdy teńestirý úshin barlyq damytý joldary men problemalar tereń pysyqtalyp, Kúrshim, Tarbaǵataı, Katonqaraǵaı, Zaısan, Úrjar aýdandary halqynyń ómir súrý sapasyn jaqsartý boıynsha keshendi josparlar qabyldandy.

– Barlyq josparlanǵan is-sharalardy sheshý úshin qolda bar bıýdjettik jáne bıýdjetten tys resýrstar jumyldyryldy, memlekettik qoldaý quraldary iske qosyldy. Bastapqyda 5 jyl ishinde josparlardy iske asyrýǵa 209 mlrd. teńge baǵyttaý kózdeldi. Búginde bul soma «Jumyspen qamtýdyń jol kartasy» jobalary esebinen 9 mlrd teńgege artyp, 218 mlrd. Boldy. Onyń ishinde 44 mlrd teńge bıylǵa qarastyrylǵan, – dedi Danıal Ahmetov.

Keshendi josparlarǵa ınfraqurylymdy jaqsartý, aýyl sharýashylyǵyn, kásipkerlikti, bilim jáne densaýlyq saqtaý salalaryn damytý, sondaı-aq jańa jumys oryndaryn qurý sharalary engizilgen.

– Bizdiń shekaralyq aýmaqtarda orasan zor qorlar men básekelestik artyqshylyqtar bar. Ony tıimdi paıdalaný halyqtyń ekonomıkalyq turǵydan belsendi bóliginiń shekaralyq aýdandarǵa aǵylýyna septigin tıgizedi, – dep túıindedi óńir basshysy.

ShQO aqparat ortalyǵy