"Daǵdarysqa ushyraǵan". Toqaev qorǵanys mınıstrligine tapsyrma berdi

Prezıdent, Qarýly Kúshterdiń Joǵarǵy Bas qolbasshysy Qasym-Jomart Toqaev Qorǵanys mınıstrliginiń keńeıtilgen alqa májilisine qatysty. Bul týraly Aqorda saıty habarlady.

Prezıdent jıynǵa deıin qyzmet barysynda qaza tapqan áskerı qyzmetshilerge arnap ornatylǵan "Máńgi esimizde" monýmentine gúl qoıyp, taǵzym etti.

– Memleketimizdiń qorǵanys qabiletin arttyrý úshin aýqymdy jumys atqaryldy. Bul Tuńǵysh prezıdent, Elbasy Nursultan Ábishuly Nazarbaevtyń qajyrly eńbeginiń arqasy, – dedi prezıdent.

Qasym-Jomart Toqaev qorǵanys mınıstrliginiń basshylyǵyn jahandyq masshtabta da, jekelegen aımaqtarda da kúrt ózgerip jatqan álemdegi ahýaldy jiti baqylap otyrýǵa shaqyrdy. Onyń sózinshe, qazirgi qaýipsizdik arhıtektýrasy daǵdarysqa ushyraǵan.

Memleket basshysy ishki tolqýlar, tóńkerister eldiń tutastyǵyna sózsiz áser etedi dep sanaıdy. Oǵan Brest bitiminen bastap Qap taýyndaǵy sońǵy jaǵdaılarǵa deıingi tarıhtyń jańa paraqtary kýá.

– Mundaı jaǵdaıda memlekettiń egemendigi men tutastyǵynyń jalǵyz kepili – Qarýly Kúshter. Elimizdi syrtqy qaýip-qaterden qorǵap turǵan áskerı qyzmetshilerdi memleket árdaıym qoldaıdy. Prezıdent jáne Joǵarǵy Bas qolbasshy retinde qorǵanys salasyna erekshe kóńil bólýdi óz jumysymnyń basym baǵyty retinde sanaımyn, – dedi Qasym-Jomart Toqaev.

Memleket basshysy Qorǵanys mınıstrligi sońǵy jyldary áskerı josparlaý qujattaryn daıyndaý boıynsha aýqymdy jumys atqarǵanyn atap ótti. Bul armııa men memlekettik organdardyń syrtqy qaýip-qaterge qarsy maqsatty túrde daıyndyq júrgizýine múmkindik bergen.

Prezıdenttiń pikirinshe, osyǵan deıin qol jetken jetistikterdi saqtaý úshin Qarýly Kúshterdiń qyzmetindegi birqatar basymdyqqa kóńil bólý qajet.

Atap aıtqanda, áskerdegi moraldyq-psıhologııalyq ahýaldy jáne sarbazdardyń jaýyngerlik rýhyn kóterý asa mańyzdy. 

– Qorǵanys mınıstrligine múddeli organdarmen birlesip, 2021  jylǵy 1 qarashaǵa deıin Qarýly Kúshterdegi, basqa da áskerler men áskerı qurylymdardaǵy ıdeologııalyq jumystardyń tujyrymdamasyn ázirleýdi tapsyramyn, – dedi Qasym-Jomart Toqaev.