Qazaqstan prezıdenti beınekonferensııa formatynda ótken sheteldik ınvestorlar keńesiniń jıynyna qatysyp, 2021 jyly kúshine enetin jańa kodeks týraly aıtty. Jıyn barysynda kóterilgen birqatar máseleler akorda.kz saıtynda jarııalandy. 

Beınekonferensııada koronavırýs pandemııasy kezinde Qazaqstandaǵy ekonomıkalyq, ınvestısııalyq belsendilikti qalpyna keltirý, sondaı-aq eldiń munaı-gaz sektorynyń ınvestısııalyq tartymdylyǵyn arttyrý jáne damytý máseleleri egjeı-tegjeıli qaraldy. Memleket basshysynyń aıtýynsha, pandemııa kezinde memleket bıznes pen halyqty qoldaý úshin buryn-sońdy bolmaǵan keshendi sharalar qabyldaǵan. Bul daǵdarystyń jaǵymsyz saldaryn azaıtýǵa jáne ekonomıkanyń quldyraýynyń aldyn alýǵa múmkindik berdi.

Qasym-Jomart Toqaev birqatar usynys pen bastama kóterdi. Sonyń biri – ekologııalyq kodeks máselesi. 

Prezıdent jıynǵa qatysyp otyrǵan sheteldik azamattarǵa jańa ekologııalyq kodekstiń ázirlenip jatqany týraly aıtty. Atalǵan kodeks ekonomıkalyq yntymaqtastyq jáne damý uıymyna múshe elderdiń ozyq tásilderi negizinde daıyndalǵan.

"Bul tehnologııany engizgen kásiporyndar emıssııa tóleminen bosatylady. Memleket ekologııalyq shyǵyndardy kásiporyndarmen bólisetin mundaı tájirıbeni kez kelgen el qoldana bermeıtinin atap ótkim keledi. Shyn máninde, bul memlekettik-jekemenshik áriptestiktiń aýqymdy jobasy. Biz mundaı qadamǵa sanaly túrde baryp otyrmyz. Osy oraıda bıznes ókilderi kelisimdegi óz mindettemelerin tolyqqandy oryndaıdy dep oılaımyz", – dedi Qasym-Jomart Toqaev.

Sondaı-aq Qasym-Jomart Toqaev otandyq farmasevtıka salasyn damytýdyń mańyzdy ekenin aıtty. Prezıdent 2025 jylǵa qaraı Qazaqstan dári-dármek óndirisiniń úlesin 50 paıyzǵa deıin arttyrýdy kózdep otyrǵanyn málimdedi. Sondaı-aq medısınalyq jabdyqtar men qosalqy materıaldar óndirisin ulǵaıtý qajet. Bul salalar ınvestısııa úshin ashyq, memleket mundaı jobalardy tolyq qoldaıtyn bolady.

Qasym-Jomart Toqaev bolashaqta Teńiz, Qarashyǵanaq jáne Qashaǵan ken oryndaryn keńeıtý sııaqty iri munaı-gaz jobalaryn ýaqytyly aıaqtaýdyń mańyzdylyǵyn atap ótti. Prezıdent Qashaǵan ken ornyn tolyq kólemde ıgerýge kóshý kerek ekenin aıtyp, onda gaz óńdeý zaýytyn salýdy jedel iske asyrýdy tapsyrdy.

Prezıdent munaı-gaz jobalarynda qazaqstandyq mazmundy arttyrý qajettigine toqtaldy. Onyń aıtýynsha, bul máselede sannan sapaǵa kóshetin ýaqyt keldi.

Memleket basshysy qorshaǵan ortany qorǵaý men kómir qyshqylyn az paıdalanatyn ekonomıkany damytýdyń mańyzdy ekenin atap ótti. 2021 jyly halyqaralyq standarttarǵa saı jańa ekologııalyq kodeks kúshine enedi. Memleket basshysy qyzyǵýshylyq tanytqan qatysýshylardy atalǵan aýqymdy saıası qujatqa óz úlesterin qosýǵa shaqyrdy.

"Úkimet búgingi jıynda aıtylǵan barlyq problemalardy sheshýmen aınalysatyn bolady. Sheshim qabyldaý barysynda bizge serpilis qajet dep oılaımyn. El prezıdenti retinde sheshim qabyldaý prosesin jáne bizdiń iri seriktesterimizben, dostarymyzben aradaǵy is-qımyldyń damý barysyn jiti qadaǵalaıtyn bolamyn", –  dedi memleket basshysy.

"Qamshy" silteıdi
Ilmek sózder: Toqaev Jańa kodeks

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir