Japon gazetine qazaq anasy týraly áńgime jarııalandy

Jýyrda japon tilinde jazatyn jýrnalıst Sharafat Jylqybaeva áleýmettik jelidegi paraqshasyna óziniń balalyq shaǵynan syr shertetin "Sáýle" dep atalatyn áńgime jarııalaǵan. Shyn júrekten shyqqan kórkem shyǵarma oqyrmandardyń suraýy boıynsha Tokıoda shyǵatyn "Nıhontoıýrashıa" gazetiniń №1520, №1521 sandaryna da basyldy. Áńgimede qazaq aýylyndaǵy kópbalaly ananyń bolmysy beınelengen.

Avtor shyǵarmasynda bes jasqa deıin Jetisýdaǵy Jambyl aýylynda ájesiniń qolynda bolǵanyn, ol dúnıeden ozǵan soń biraz ýaqyt meıirban jan Sáýleniń úıinde ótkizgenin tilge tıek ete otyryp, qazaqı tirshilikti japon oqyrmandarǵa qyzyqty etip jetkizgen.

"Sáýleniń jeti balasy bar edi, men barǵan soń taǵy bir ul dúnıege keldi. Men Sáýleniń toǵyzynshy balasy sııaqty edim" deı kele, "dáý qazanǵa sút pisirgende qaımaǵyn óz balalaryna emes, aldymen maǵan beretin" dep, qazaq anasynyń keńpeıildigi men sheksiz meıirimdiligin sýrettegen.

Áńgimeniń sońynda avtor kóp jyl ótkende Sáýleni izdep aýylǵa barǵanyn jazady. "Keldiń be?" deıdi Sáýle. "Tórlet! Mynaý gazǵa pisken nan, qazir baıaǵynyń kómbe nany joq qoı. Kelinder pisirmeıdi. Jalqaý ǵoı qazirgi kelinder..." deıdi Sáýle.

Shyǵarmada balǵyn balalyq shaqqa degen saǵynysh seziledi.

Áńgimege arqaý bolǵan Sáýle Kemelova – Altyn alqa ıegeri, Almaty oblysynda turady. Japon gazetiniń ujymy qyzyǵýshylyq tanytyp, asyl ananyń sýretin de aldyryp, jarııalap otyr.

Osy áńgime jarııalanǵan soń redaksııaǵa oqyrmandardan "jan tebirenterlik áserli shyǵarma eken", "Qazaqstandy keńinen nasıhattap júrgen Sharafat Jylqybaevanyń balalyq shaǵy týraly kóbirek bilgimiz keledi" degen ystyq yqylasty hattar kelip túsken.