Qazaqstanda karantınge qatysty jańa sheshimder qabyldandy

Premer-mınıstrdiń orynbasary Eraly Toǵjanov vedomstvoaralyq komıssııada koronavırýs ınfeksııasynyń taralýyn aldyn alý maqsatynda birqatar sheshim qabyldady.

VAK otyrysynyń qorytyndysy boıynsha tómendegideı sheshimder qabyldandy:

• Qoǵamdyq kóliktiń jumysyn basqa qyzmet túrlerimen úılestirý;
• "Jasyl aımaqta" ornalasqan óńirlerde qoǵamdyq kóliktiń jumysy apta ishinde 23:00 saǵatqa deıin uzartý;
• "Sary aımaqta" ornalasqan óńirlerde qoǵamdyq kóliktiń jumysy demalys jáne mereke kúnderin qospaǵanda, saǵat 23:00-ge deıin uzartý;
• Bıylǵy 21 qarashaǵa deıin aýrýhanalardyń reanımasııalyq bólimsheleriniń materıaldyq bazasyn tekserý, qajet bolǵan jaǵdaıda olardy tolyqtyrý boıynsha jedel sharalar qabyldaý;

• Áskerı gospıtaldardaǵy tósek qoryn qajetti jaǵdaıda jedel óristetýge tolyq ázirlikti qamtamasyz etý.

Sondaı-aq 2020 jyldyń 21 qarashadan bastap qyzmeti kelýshilermen tikeleı baılanysty emes kásipkerlik sýbektileriniń jumys ýaqyty boıynsha shekteýler alynyp tastalady Onyń ishinde avto-ekspress (tamaqty ózimen birge alyp ketý), kólik jýý, avtomobılderge tehnıkalyq qyzmet kórsetý jáne jóndeý stansııalary, tigin sheberhanalary, turmystyq tehnıka, aıaq kıim, telefon, kompıýterler, saǵat jóndeý, kir jýý jáne hımııalyq tazalaý ortalyqtary bar.

Otyrysta 21 qarashaǵa deıin halyqpen baılanys deńgeıi tómen bıznes nysandarynyń qosymsha tizimin daıyndaý tapsyryldy.

Eraly Toǵjanov Shyǵys Qazaqstan, Soltústik Qazaqstan oblystarynyń ákimdikterine 10 kún merzimde qyzyl aımaqtan shyǵý úshin epıdemıologııalyq jaǵdaıdy turaqtandyrý jóninde túbegeıli sharalar qabyldaý qajettigin jetkizdi.

Densaýlyq saqtaý salasyndaǵy statıstıkalyq derekterdiń ashyqtyǵyn qamtamasyz etý maqsatynda COVID-19 boıynsha PTR zertteýlerin júrgizetin zerthanalardyń ıntegrasııasyn bir apta merzimde aıaqtaý tapsyryldy.

Keńes qorytyndysy boıynsha premer-mınıstrdiń orynbasary dárilik zattardyń baǵasyn tómendetý, dári-dármekter men medısınalyq buıymdardyń baǵasyn retteý, otandyq maska óndirýshilerdi shıkizatpen qamtamasyz etýdiń kepildendirilgen tetikterin aıqyndaý jáne taǵy basqa máseleler boıynsha birqatar tapsyrma berdi.