Janbolat Aǵadildiń qazasyna kúdiktiniń anasy: Balamdy "podstavıt" etip otyr

11 qarashaǵa qaraǵan túni azamattyq belsendi Dýlat Aǵadildiń uly Janbolat Aǵadildiń pyshaq jaraqatyn alyp, mert bolǵany habarlanǵan edi. Osy oqıǵadan keıin áleýmettik jelide О́mirjan Rahmet esimdi jigittiń "Janbolat Aǵadildi abaısyzda pyshaqtadym" degen vıdeosy tarady. Nur-Sultan qalasy polısııa departamenti atalǵan vıdeoǵa baılanysty pikir bildirmedi. Kúdikti retinde ustalǵan 1999 jylǵy О́mirjan Rahmet áli kúnge qamaýda. Ony jaqyndarymen, advokatpen sóılestirmeıdi. Qamshy tilshisimen telefon arqyly áńgimelesken kúdiktiniń anasy, I toptaǵy múgedek Inabat Abdıeva balasynyń kinási joq ekenin, oǵan áldekimder jala jaýyp otyrǵanyn, tóbeles kúni kóńilge kúdik uıalatatyn keıbir jaıttar bolǵanyn aıtty.

Kúdikti О́mirjan Rahmet áskerden kelgen soń 2020 jyldyń sáýir aıynda jumys isteý úshin Jambyl oblysy Qulan aýdanynan Nur-Sultan qalasyna kelgen. Qyrkúıek aıynda qaryndasy elordaǵa oqýǵa túsip, anasy ekeýin kóshirip ákelip, barlyǵy birge páter jaldap turǵan. Inabat Abdıeva oqıǵa bolǵan kúni aýrýhanaǵa qaralý úshin Tarazda júrgen. Jaǵdaıdy estip, dereý astanaǵa kelgenimen, balasyn áli kórmegen.

Inabat Abdıevanyń sózinshe, О́mirjan Rahmetti 11 qarashada úıde otyrǵan jerinen Azamat esimdi tanysy shaqyryp alǵan.

– Balam sol kúni qyzym ekeýi úıde otyrǵan. Qyzymnyń aıtýynsha, túnde Azamat degen tanysy habarlasyp, "bratan, kelip alyp ketshi" depti. О́mirjan shaqyrǵan jerge óziniń Mersedes kóligimen baryp, jańaǵy balany alyp ketken. Artynsha ekeýi de ustalyp, Janbolat Aǵadildiń qaıtys bolǵanyn bilgen. Balamnyń mashınasy tóbeles ornynda bolmapty. Al polıseıler ony tóbeleske qatysty dep otyr. Al balam ol ýaqytta whatsapp arqyly qurbysymen sóılesip, foto jiberip otyrǵan. Iаǵnı tóbeles bolǵan jerde bolmaǵan. Tek joldasyn alyp ketýge ǵana kelgen, – deıdi ol.

Múgedek ananyń aıtýynsha, Azamat esimdi bala О́mirjanǵa jala jaýyp otyr.

– Men qazir bárinen surastyryp jatyrmyn. Kúdikti retinde ustalǵandar arasynda báriniń qoly bos bolyp, tek meniń balamdy ǵana eki búktep alyp ketken. Polısııaǵa jetkizilgen soń oqıǵanyń mán-jaıyn jazǵanda álgi Azamat degen bala bar kináni О́mirjanǵa artyp, "О́mirjan pyshaqtady" dep jazyp, "podstavıt" etip otyr. Ol balanyń (Azamat – red.) osy kúnge deıin polısııaǵa birneshe ret túskenin keıin bildik, – deıdi Inabat Abdıeva.

Kúdiktiniń anasy tergeýde túsiniksiz jaıttar bar ekenin atap ótti.

– Tergeý júrip jatyr deıdi. Eger tergeý aıaqtalmaǵan bolsa, balamnyń vıdeosyn nege shyǵardy? Polısııadan surasam, "biz shyǵarǵan joqpyz, ózderi shyǵarǵan shyǵar" deıdi. Osyndaı jaýap bola ma? Onyń ústine tóbeles bolǵan jerde beınebaqylaý kameralary bar. Biraq kamera dál sol kúni istemeı qalady da, ertesi kúni istep ketedi. Bul qalaı? Tóbeles bolǵan orynǵa jaqyn jerde kúzetshi bolypty. Endi sony qazir tappaı júr eken. Balamdy maǵan da, advokatqa da kórsetpeı otyr. О́mirjannyń bul iste esh kinási joq ekenine senimdimin. Balamdy Azamat degen bala "podstavıt" etip otyr. Men Azamat degen bala tergeý abaqtysynda Tik-Tok túsirip júr degendi estidim. Ol "ýslovno" alyp shyǵyp ketem dep emin-erkin júrgen kórinedi, – degen Rahmet О́mirjannyń anasy polısııa bólimine búgin de baryp, balasymen júzdese almaǵan.

Inabat Abdıeva endi ne shara jasaryn bilmeıdi.