Depýtat: Zeınetaqy qoryn paıdalana almaıtyndar aýyl turǵyndary

Senat depýtaty Álı Bektaev halyqty zeınetaqymen qamtamasyz etý máselelerin aıtyp, premer mınıstr Asqar Mamınge saýal joldady. 

– Búgin jáne bolashaqta eń tómen zeınetaqy alatyndar aýyl turǵyndary bolmaq. Jurt qatarly zeınetaqy qorynyń bir bóligin alyp, paıdalana almaıtyndar da aýyldyqtar bolaıyn dep tur. Jaqynda men QR 2030 jylǵa deıingi merzimge arnalǵan "zeınetaqy júıesin jańǵyrtý" týraly tujyrymdamasynyń jobasymen tanystym. Ashyǵyn aıtý kerek, aty dardaı bolǵanymen atalǵan tujyrymdamadan eshqandaı jańalyq kórgenim joq, – dedi depýtat. 

Senat depýtatynyń aıtýynsha, eldiń qazirgi áleýmettik júıesi bytyrańqy.

 – Balalarǵa beriletin járdemaqy eń tómengi kedeıshilik sheginiń 70% quraıdy. Olaı bolsa, olarda Otanǵa degen patrıotızm men súıispenshiliktiń sol deńgeıde bolatyny aıdan anyq. Munyń barlyǵy Qazaqstanǵa jańa áleýmettik saıasat engizý qajet ekendigin kórsetedi. Jańa saıasat, negizinen, balalardy qorǵaý men qoldaýǵa baǵyttalýy qajet. Memleket balalardyń árqaısysyn, turmystyq jaǵdaıyna qaramaı, týǵan kezden 18 jasqa tolǵanǵa deıin kepildi jáne mindetti túrde áleýmettik qoldaýdyń jańa standarttaryn engizýi kerek. Balalarǵa bólinetin bul qarjy áleýmettik kómek nemese járdemaqy dep te atalmaýy tıis. "Bala kapıtaly" degen ataýmen arnaıy kartochkalar arqyly ár balanyń óz qajetine ǵana jumsalýy tıis. Árıne, ol búgingi áleýmettik standarttan áldeqaıda joǵary bolýy shart. Oǵan memleketten qomaqty qarjy da bólinýi kerek. Biraq, balalarǵa jumsalǵan kapıtal erteń eselenip qaıtatynyna eshqandaı da kúmán joq. Qazaqstandyqtardy qalalyq, aýyldyq dep bólmeı, olarǵa áleýmettik kepildikterge birdeı jaǵdaı týǵyzý maqsatynda barlyq áleýmettik bıýdjetti biriktiretin biryńǵaı áleýmettik qor qurý qajet. Oǵan memlekettik jáne atqarýshy organdar, kvazımemlekettik holdıngter men kásipkerlerdiń múmkindikterin jumyldyrý mańyzdy, – dedi Álı Bektaev.