Senat zeınetaqy jınaǵyndaǵy qarjyny qoldanýǵa baılanysty mańyzdy túzetý qabyldady

Senat Salyq kodeksine engiziletin túzetýlerdi qabyldady. Soǵan sáıkes azamattar zeınetaqy jınaǵyndaǵy qarjynyń bir bóligin alǵan kezde bir rettik tabys salyǵyn tólemeýge múmkindik alady.

Buǵan deıin prezıdent Qasym-Jomart Toqaev 2021 jyldan bastap azamattarǵa zeınetaqy jınaǵynyń bir bóligin paıdalanýǵa múmkindik berý jóninde tıisti memlekettik organdarǵa tapsyrma bergen edi. Alaıda bul qarajat úshin tabys salyǵyn tóleý qajet. Dál osy másele qoǵamda narazylyq týdyrǵan.

Senatorlar bul tólemdi keıinge shegerýdi jáne birneshe jylǵa bólip tóleýdi usyndy. Iаǵnı zeınetaqy jınaǵyndaǵy qarjyny kelesi jyldan bastap alýǵa bolady. Al oǵan tıisti salyq tek zeınetke shyqqan kezde ǵana tólenedi. Sondaı-aq tólemdi birden jasamaı, 16 jylǵa bólip tóleý múmkindigi qarastyrylǵan.

– Zeınetaqy jınaǵyndaǵy qarjynyń bir bóligin aldyn ala alǵan kezde onyń 10 paıyzyn bir rettik salyq retinde tóleý kerek. Ony qazirgideı kúrdeli kezeńde azamattar úshin tıimsiz dep esepteımiz. Sondyqtan atalǵan salyqty zeınetaqy jınaǵyn alǵan kezde emes, tek zeınetke shyqqan soń ǵana tóleý usynylyp otyr. Onyń ózinde, bárin birden aýdarmaı, zań jobasyna 16 jyldyń ishinde bólip tóleý týraly norma engizildi, – dedi senat tóraǵasy Máýlen Áshimbaev.

Azamattyǵyn aýystyrǵysy kelgender zeınetaqy jınaǵynan aqsha alǵany nemese onyń bir bóligin paıdalanǵany úshin tólenetin salyqty birden jáne tolyq óteýge mindetti. Osy rette salyq biryńǵaı jınaqtaýshy zeınetaqy qory shotynda qalǵan zeınetaqy jınaǵynan ustalatynyn atap ótken jón.

Buǵan deıin eńbek mınıstri Birjan Nurymbetov birinshi kezekte jumys istegen, jumys istep júrgen azamattar, ıaǵnı biryńǵaı zeınetaqy qorynda jarnalary bar azamattardyń jınalǵan somasy jetkilikti sheginen asyp jatsa, qarajatty ala alatynyn habarlaǵan. Mundaı azamattar qatary 530 myńdy quraıdy.

Jas erekshelikke qaraı zeınetaqy jınaqtarynyń jetkilikti shegi belgilengen. Ol zeınetaqy jınaǵyndaǵy eń az qajetti soma. Iаǵnı, zeınetaqy jınaǵyndaǵy aqshany paıdalanǵan sátte, salymshy shotynda jas mólsherge qaraı aıqyndalǵan jetkilikti soma qalýǵa tıis.