QR Prezıdenti qazaqtyń tuńǵysh antropology men abaıtanýshy ǵalymdy mereıtolarymen quttyqtady

Memlekettik hatshy Qyrymbek Kósherbaev Almaty qalasynda qazaqtyń tuńǵysh antropologi Orazaq Ismaǵulov pen ǵalym, abaıtanýshy Mekemtas Myrzahmetulyn 90 jas torqaly toılarymen quttyqtady.

QR Ulttyq kitaphanasynda bolǵan saltanatty sharaǵa QR Memlekettik hatshysy Qyrymbek Kósherbaev, QR Mádenıet jáne sport mınıstri Aqtoty Raıymqulova, QR Bilim jáne ǵylym mınıstri Ashat Aımaǵambetov, Qazaqstan Jazýshylar odaǵynyń basqarma tóraǵasy Ulyqbek Esdáýlet jáne belgili ǵalymdar qatysty.

Qyrymbek Kósherbaev ǵalymdardyń el ǵylymyna qosqan ólsheýsiz úlesin atap ótip, QR Prezıdenti Qasym-Jomart Toqaevtyń quttyqtaý hatyn oqyp berdi.

«Qurmetti Mekemtas Myrzahmetuly! 90 jas mereıtoıyńyzben quttyqtaımyn. Otandyq ádebıet pen ǵylymnyń damýyna ólsheýsiz úles qosýyńyzdyń arqasynda siz halyq aldynda belgili ǵalym, jazýshy retinde tanylyp, erekshe qurmetke bólendińiz. Qoja Ahmet Iаsaýı, Abaı, Muhtar týraly, Baýyrjan Momyshuly týraly eńbekterińizge baǵa jetpeıdi. Alda da óskeleń urpaqqa ónege kórsetip, qoǵamnyń rýhanı damýyna úles qosyp aman júrińiz. Densaýlyǵyńyz myqty bolsyn! Arman-tilegińiz oryndalsyn!», - delingen quttyqtaýda.

Memhatshy Prezıdenttiń antropolog ǵalym Orazaq Smaǵululyna arnaǵan quttyqtaýyn da jetkizdi.

«Qurmetti Orazaq Smaǵululy! Men sizdi búgingi 90 jas mereıtoıyńyzben quttyqtaımyn. Sanaly ǵumyryńyzdy antropologııa salasyna arnap, Qazaqstanda tuńǵysh ret antropologııa mektebiniń negizin qaladyńyz. Álbette ǵylymǵa qosqan úlesińiz ushan teńiz. Sizdiń eńbekterińizdiń arqasynda qazaq halqynyń tarıhy men shyǵý tegine qatysty kóptegen baǵa jetpes ǵylymı muraǵa ıe boldyq. Bolashaqta jumysyńyzǵa sáttilik tileımiz. Halyq ıgiligine qyzmet etýden jalyqpańyz», - delingen Memleket basshysynyń hatynda.

Quttyqtaýdan soń memlekettik hatshy qos ǵalymǵa shapan japty.

Al QR Mádenıet jáne sport, Bilim men ǵylym mınıstrleri qarııalardyń keýdesine tósbelgi taqty.