"Qaıyrymdylyq": Aıdyndy óńirdiń aıbyndy jastary

Jas tolqyn, jańa bastama, tyń ıdeıalar. Bul jańa Qazaqstannyń jasampaz jastarynyń ustanymy. Búginde sol elim-jerim degen jastarymyzdyń ilkimdi isteri kóńilimizge qýanysh uıalatady. Ásirese, ult qamyn oılap, túrli qaıyrymdylyq jasap júrgen eriktiler. Osyǵan oraı, Alakól aýdany jastarynyń qaıyrly isterin jazýdy jón kórdik.  

Yrys-qut tunǵan qoınaýy, qorasy tolǵan qoı-maly, týlaǵan shalqar aıdyndy, tasyǵan asqaq aıbyndy Alakóldiń salqar dalasynda talaı tuǵyrly tulǵalarymyz týyp, esimderi tarıh betterinde qaldy. Týǵan jer... Kim-kimniń bolmasyn ýys júreginiń qýysynan oryn teýip, eń jaıdarly da jasampaz estelik bolyp saqtalatyn qutty meken. Eń alǵash jórgek kirimiz jýylyp, tabanymyz topyraqqa tıgen kıeli ólkeni ómir saparymyzdyń sońǵy sekýndtaryna deıin sanamyzǵa baılap qoıatynymyz ras-aq. Ár adam balasynyń týǵan jerimen eń názik te tátti estelikteri sabaqtasyp jatyr.  Taǵdyr toraby keıde ózge ólkelerge aıdap baryp, túngi aspandaǵy juldyzdarmen syrlasa týǵan jerimizdi saǵyna, sarǵaıa eske alatynymyz jasyryn emes. Dál osyndaı mezetterde aýyldaǵy átkenshektiń oryndyǵynda qaldyryp ketken balalyǵymyz sanamyzdyń oı-qyrlarynda beleń alyp, ótken kúnderdiń ótkelderine sapar shektiretini taǵy bar. Men de osyndaı tolǵanys pen tolqýǵa toly jaǵdaıattardy basymnan talaı ótkerdim.

Bilim izdep, alyp qalalarǵa at shaldyrǵan kezeńderi, terezeden telmire aǵash butaǵyn arǵymaq qylyp minip, kók jaılaýdyń tósinde kóbelek qýǵan balǵyn kúnderim mazalaıtyn da otyratyn. Sebebi shilde sýyna shomylyp, shildehanam toılanǵan týǵan óńirim men úshin óte ystyq jáne ińkár mahabbatqa ıe edi. Darhan dalanyń jeruıyǵy atanǵan jumaq ólkesi, jeti ózeni erkelegen Jetisýdyń jánnát mekeni, kóbikti ózender men kórikti jazyqtardy, buırat qumdar men orman-toǵaılardy tósine qondyrǵan, asqary aspan súıgen aıdyndy Alakól aýdanynyń kıeliligine talas joq. «Balqash-Alakól» oıysy men Jońǵar Alataýyn bókterleı qulashyn jaıǵan óńirdiń ǵasyrlar qoınaýyna kómgen taǵylymdy tarıhyna úńilsek bul aýdanda Jońǵardyń sońǵy qontaıshysy Daýashyny Qytaı asyryp, basyn alǵan  Daraboz batyr Qabanbaı, úsh júz jigitin ertip on myń qalmaqqa jalǵyz at, jalań qylyshpen shapqan Qaqal áýlıe, baıandy ǵumyryn qalyń buqarasyn qorǵaýǵa arnaǵan Baıanbaı batyr, kúlli Alashtyń basyn qosyp, tútinin túzý tútetken Abylaı hannyń myńbasy Qasabaı batyr, jomarttyǵy arqyly esimi Reseı patshalyǵyna deıin jetken Esim tóre, emshiligi bir tóbe, danalyǵy bir tóbe Shire ana shyr etip, dúnıe esigin ashqan, elý jasyna deıin el kezip, jaý qylyshynan keıip kórmegen Keıki batyr men jeti júz qadamnan shıe jemisin jebemen atyp túsiretin Toqbolat bahadúr jerlengen.

Qııal deıtin kermıyǵymyzdyń kók dónenine minip,  kúni búginge jortatyn bolsań, Jońǵar Alataýynyń jotalarynan Qabanbaıdyń Qýbasy, Qaqal áýlıeniń Aqbozdarasy kisinep,  Qasabaı batyrdyń Qarakógi menmundalaıdy. Bergisine sapar sheksek, áýezdi ánimen zeıinińdi aýdarar Zeınepteı bulbul ápkemiz, jaýyryny jerge tımegen Qarash balýan, qalamynan ot sharpyǵan Sáken aqyn, álem tanyǵyn Ánýar Álimjanov syndy tekti tulǵalar shyqqan. Búgingige bet bursaq Aıdyn Smaǵulov, Baýyrjan Orazǵalıev, Jánibek Álimhanuly syndy sport sańlaqtary álemdi moıyndatty. Qazirdiń ózinde shyǵarmashylyq, sport, ádebıet pen mádenıette, mýzykada júrgen jalyndy jastar Alakóldiń ataǵyna ataq ústep, abyroıyn eseleýde.

Bulardyń barlyǵy biz tanıtyn, kópshilik biletin maqtanyshtarymyz. Alaıda tasada qalǵan talapty da tabandy, tapqyr da talapshyl, bilimdi de bilikti, ozyq ári ozat jastarymyz da jeterlik. Halyq arasynda júrip, kópshiliktiń qamy aıanbaı, qyzmetinde de, qoǵamdyq sharalarda da belsendilik tanytyp júrgen qatarlastarymdy atap ótsem. О́ńirimizde 2017 jyldan beri «Bir Arman» qaıyrymdylyq qozǵalysy qarqyn alyp, eriktiler toby jańa azamattarmen tolyǵýda. О́zgeniń muńyn óz muńyndaı kórip, joǵyn túgendeýge súıemdeı bolsa da úles qosýǵa umtylatyn alakóldik jastardyń qatary kóbeıip kele jatqandyǵy qýantady. Prezıdentimiz Q.Toqaevtyń bastamasymen 2020 jyl «Eriktiler jyly» dep jarııalanyp, atalǵan baǵyttaǵy isterge keńinen qoldaýlar da kórsetilýde. Erikti stýdentterdiń shákirtaqysy ulǵaıdy, jańa jobalarǵa qanat bitip, qaıtarymsyz granttar da bólinýde. Volonterlik qyzmettegi jastarǵa jeńildikter men jańa múmkindikter de qarastyrylǵan. Bunyń barlyǵy bastamashyl qatarlasaryma óte tıimdi bolyp otyr.

«Bir Arman» qaıyrymdylyq jobasyna oıyssaq, 2017 jyldyń 15 jeltoqsanynda alǵashqy qadamdaryn basqan jobanyń birinshi kezeńinde Úsharal qalasy, Dostyq kenti, Lepsi, Jylandy, Yntaly, Beskól, Qazaqstan, Aqshı aýyldarynda jalpylaı alǵanda alpys balanyń bir-bir tilegi oryndaldy. Bul rette aıta ketetini balalarǵa ózderi qalap turǵan zattaryn tabystaldy. Syılyqtardyń ataýy jazylǵan búkteme qaǵazdardy eriktiler jasyryn tańdap, ishindegi dúnıelerdi qýanysh ıesine tartý etti. Suralǵan zattar ishinde uıaly telefondar, planshettar, ulttyq aspaptar, tomdyq kitaptar, sporttyq quraldar, úı jabdyqtary da boldy. Artynsha 2018 jyldyń jeltoqsanynda bir jyldyq mereıtoıdyń qurmetine «Búldirshinder serpilisi – Proryv deteı» baıqaýyn uıymdastyryp, ónerde, sportta, bilimde úzdik balalar men Alakóldiń eń súıkimdi balaqaıyn anyqtady. Barlyq jeńimpazdarǵa aqshalaı syılyqtar, baǵaly zattar, sonymen qatar muz aıdynyna, pısserııaǵa, vıdeo-fotosessııaǵa tegin barý sertıfıkattary tabystaldy.

Igiligin ıen daladan tapqan ısi qazaqtyń ejelden kele jatqan izgi mineziniń biri – qaıyrymydylyq. Atqany jetip, aıtqany ótip turǵan azamattar, tórt túligin túgel jaıǵan aýqattylar, júrek túkpirinde jaqsylyqtyń nury uıalaǵan jomart jandar jyǵylǵanǵa demeý, jylaǵanǵa pana bola bilgen. Bul úrdis qazirgi damyǵan zamanda da óz baǵytyn joǵaltqan emes.

Osymen bir jarym jyldan astam ýaqyt shamasynda aýdan aýmaǵynda jas jýrnalısterdiń uıytqy bolýymen túrli ıgilikti isterdi atqaryp júrgen «Bir arman» qaıyrymydylyq qorynyń uıytqy bolýymen aýdandyq ortalyq aýrýhananyń balalar bóliminde búldirshinderge arnalǵan bólmeniń saltanatty ashylýy ótti.

Oıyn bólmesiniń ashylý saltanatyna aýdan ákiminiń orynbasary Almas Abdınov arnaıy kelip, balalar men analarǵa quttyqtaý tilegin jetkizdi. Osyndaǵy túrli oıynshyqtar sábılerdiń tez aıyǵyp ketýine septigin tıgizip, syrqat balalardyń kóńilin kóterýge uıytqy bolsyn degen nıetin jetkizdi. Aýdandyq ortalyq aýrýhananyń dırektory Ashat Býtabaev «Bir arman» qaıyrymdylyq qoryna búldirshinderge osyndaı syılyq jasap, saýapty istiń kóshbasynan kórinip jatqandary úshin alǵysyn bildirdi. «Bizdiń mundaǵy basty maqsatymyz balalardyń qýanyshy ǵana. Bunda kelip em qabyldaıtyn baýyr-qaryndastarymyz aýrýhanadan tek syrqatynan aıyǵyp qana emes, sonymen qatar bir birimen oınap, kúlip, tánine, janyna túsken aýyrtpalyqty umytsa eken nıettiń jeteginde osyndaı sheshimge keldik. Bul sharaǵa atsasylysqysy kelgen azamattar da kóp boldy. Sonyń arqasynda bar-joǵy eki kúnniń ishinde kerekti qarajatty jıyp, qajetti oıynshyqtardy aldyq. Bir aıta keterligi demeýshilik etken azamattardyń búgingi kishkentaı ǵana úlesi osyndaǵy balalarǵa úlken baqyt syılamaq»,- deıdi, «Bir arman» qaıyrymdylyq qory jetekshisiniń orynbasary Aıjan Janatova.

«Jastar jyly» aıasynda jalaýyn jelbiretken aksııa barysynda Qazaqstannyń bolashaǵyn ustar jetkinshekterge qomaqty qarjyǵa arnaıy syılyqtar tabystaldy. Atap aıtsaq oıyn bólmesine em-dom qabyldap jatqan balalardyń kóńilin kóterip, saýyǵyp ketýlerin jedeldetý maqsatynda syrǵanaqtar, qurǵaq basseın, velosıpedter, úlken kólikter, sonymen qatar mýzykalyq aspaptar, doptar, rezinke attar qoıyldy. Bunymen saýapty is támamdalǵan emes. Jas belsendilerdiń bastamasymen áleýmettik álsiz otbasylarǵa azyq-túlik, kıim-keshek jetkizý, qystyq otyn-kómirmen qamtamasyz etý boıynsha ilkimdi ister atqarylýda. Bul ıgilikti sharanyń bir bóligi ǵana.

Kópbalaly januıalarǵa kómek qolyn sozý maqsatynda eriktiler Beskól aýylynaǵy úsh  otbasynyń jaǵdaıymen tanysyp, kúndelikti turmysqa qajetti zattarmen qamtamasyz etti. Bir aıta keterligi aýdan ákiminiń tikeleı qadaǵalaýymen baspanaly bolǵan qos jetim jerlesterimizdiń úıin tolyqtaı jıhazben toltyryp, saýapty isten shet qalmady.

Búginde balalar Úsharal qalasynyń shyǵys betkeıinen boı kótergen kóp qabatty úıden eki bólmeli páterge ıe bolǵan. «Bir arman» jobasynyń arqasynda úıge kerekti jıhazdar, teledıdar, kir jýý mashınasy, tipti balalarǵa kıim-keshek pen kórpe-jastyqqa deıin tabystalǵan.

Igilikti iste aýdannyń jastary, kásipkerleri me júreginde jylylyqqa oryn bar birtalaı azamattar atsalysqan. Jumyla kótergen júk jeńil demekshi, solar birige qol ushyn sozǵandyqtan búginde qos bolashaǵymyz ýaıym-qaıǵysyz ómir keshýde.

Áleýmettik turǵydan álsiz azamattarǵa, týa sala taǵdyr tálkegine túsken jetim balalar men kómekke muqtaj otbasylardan shyqqan jasóspirimderge, erekshe kútimdi qajet etetin jandar men egde jastaǵy jalǵyz basty qarttarǵa kómek kórsetip, olardyń kóńilderine uıalaǵan bir armanyna jan bitirý baǵytyn ustanǵan alakóldik eriktilerdiń jumysy osylaı órbýde.

Jýyrda qaıyrymdylyq atalǵan qozǵalysy aıasynda «Búldirshinder serpilisi – Proryv deteı» baıqaýy uıymdastyrylyp, balalar arasynda úzdikteri anyqtaldy.

2019 jyldan kómekke muqtaj otbasylar men kópbalaly januıalarǵa kómek kórsetý baǵytyn ustanyp, Beskól, Úsharal, Qazaqstan aýyldaryndaǵy áleýmettik turǵydan álsiz azamattarǵa qystyq otyn-kómir, ydys-aıaq, kórpe-jastyq, azyq-túlik tabystap, alǵystaryna keneldi. Barlyǵy segiz otbasyǵa septesýge múmkindik týdy.

Kelesi kezekte «Muqtajdarǵa meıirim» jobasy aıasynda Qazaqstan aýylynyń turǵyndary, úılerin órt shalǵan qos jetim balaǵa aýdan ákimi baspana syılaǵannan keıin eki bólmeli páterdi tolyqtaı jıhazben toltyryldy. Atap ketsek, eki balaǵa jatyn  tósekter, kıim shkaftary (spalnyı garnıtýr), kire beris bólmeniń, as úıdiń jáne qonaq bólmeniń jıhazdaryn, teledıdar, kir jýǵysh mashınasyn, azyq-túlik, kıim-keshek, kórpe-jastyq, ydys-aıaqtar alynyp berildi. Sóıtip, jastardyń muryndyq bolýymen qos bolashaǵymyz qazirgi mezette alańsyz tirlik keshýde.

Aýdandyq aýrýhanasynyń balalar bóliminde syrqat búldirshinderdiń kóńilin aýlap, olardyń emhanadaǵy ýaqytyn qyzyqty ótkizý maqsatynda aýrýhana basshylyǵymen aqyldasa kelip, arnaıy bir bólmesin oıyn zaly retinde jabdyqtaldy. Ol jerge kerekti quraldar, túrli oıynshyqtar, átkenshekter, velosıpedter, oıyn mashınalary qoıyldy.

Sonymen qatar «Qarııalarǵa kómek» aksııasynyń túńligin túrip, jalǵyz basty qarttardyń úı sharýasyn retteý, kóshe ataýlarynyń taqtaıshalary men ýly gazdy anyqtaý qurylǵylaryn ornatýda. Bul is toqtaýsyz júzege asa bermek.

Sońǵy ýaqytta qolǵa alǵan bastamanyń biri «Tegin dúken» aksııasy. Bul jerde zeınetkerler men kópbalaly otbasylarǵa, múgedekter men muqtaj azamattarǵa eki aptada bir ret tegin azyq-túlik, ózge de kerekti zattardyń dúkeni qoıylady. Tizim boıynsha azamattar ózderine qajetti dúnıelerin tegin alyp, aqysyna tek alǵys tóleýde. Bul bastamany Eskeldi, Qaratal, Uıǵyr, Sarqan aýdandary men Taldyqorǵan qalasynyń belsendi qyz-jigitterie estafeta retinde joldady.

Qazirgi mezette jetim jáne kópbalaly otbasylardan shyqqan balalarǵa tegin aǵylshyn, túrik tilderiniń úıirmeleri men Alakól ortalyq bazarynan «Tegin dúńgirshek» ashý boıynsha jumystar atqarýda. «Tegin dúńgirshekte» muqtaj azamattar tegin kıim-keshek ala alady.

Qazirgi tańda óńirimizde jastardyń osy istegi belsendiligi aıqyn baıqalady. Keıingi tolqyn ókilderi, kósh bastaǵan, kópti kórgen ata-ájelerimen keńese júrip, keń kólemde qaıyrymdylyq isin qolǵa alyp otyr.

Jastar bastaǵan jobanyń aldaǵy jospary da aýqymdy. Demeýshilerdiń arqasynda kóptegen istiń ushyn shyǵaryp, halyqtyń paıdasyna jaratý maqsaty kózdelip otyr. Buǵan ár azamat ta tilekshi ári terek bola alady. О́ıtkeni bizdiń saýapty iske degen bir qadamymyz kómegimiz tıgen jandardyń keleshegine baǵyttalǵan myń qadammen para-par.

«Saýsaq birikpeı, ıne ilikpeıdi demekshi» el bolyp birigip, jurt bolyp jumylǵan istiń kenjelep qalmasy anyq. Aýyzbirlik pen tastúıin tatýlyqtyń tuǵyry bıik turǵanda alynbas qamal joq. Bir aspannyń astynda, bir aýdannyń aýmaǵynda ǵumyr keship jatqan kómekke zárý jerlesterimizge qol ushyn sozýda qarymdy qadamdar jasap jatqan jobanyń keleshegine úmit zor. Bir aıta keterligi aksııa aıasynda «Bir Arman» jobasy úshin álemge belgili sportshylarymyzdan alakóldik jastarǵa vıdeo úndeý jasaldy.

Vıdeo arqyly joldanǵan úndeýde Qanat Islam, Bahtııar Artaev, Nurbaqyt Teńizbaev, Aıdan Smaǵulov, Arman Ospanov syndy sańlaqtar jastardi jigerlendirdi. Aldaǵy ýaqytta Qýat Hamıtov, Jánibek Álimhanuly, Baýyrjan Orazǵalıev syndy jerlesterimiz ben Ardaq Nazarov, Máýlen Mamyrov, Dáýren Jumaǵazıev sekildi beldi sportshylar alakóldik jastarǵa joldanǵan úndeýge ún qospaq. Bir aıta keterligi, byltyrǵy jyldyń qorytyndysy boıynsha «Bir arman» eriktiler toby oblysymyzdyń úzdik volonterlarynyń qatarynan tabyldy. Oblystyq jastar saıasaty máseleleri basqarmasynyń uıytqy bolýymen ótken dodada bas júlde ıemdendi. Sondaı-aq respýblıka kóleminde baıqaýlardan da marapattar barshylyq. Toptyń ár múshesi de belsendi azamattar.

 Barlyǵy da qazigi tańda qyzmettegi jandar bolǵanymen, qaıyrymdylyq isine de kóńil bólýdi esten shyǵarmaǵan. Únemi jaqsylyq pen jasampazdyqqa jaqyn bolyp, bos ýaqyttaryn saýapty iske arnaýǵa umtylýda. Bul eń aldymen alakóldik jastardyń uıymshyldyǵy men iskerliginiń bir kórinisi dep bilemiz.

Top quramyndaǵy talapty jastardy da atap ótpesek bolmas. Joba jetekshisi Almat Esenbekovten ózge Lepsi orta mektebi dırektorynyń orynbasary Aıan Orazov, «Alakól» gazetiniń jýrnalısi Aıjan Janatova, Dostyq aýyldyq okrýginiń jastar nusqaýshysy Aıgerim Sarsenbaeva, Yntaly aýyldyq okrýginiń jastar nusqaýshysy Qadyrsultan Núsiphan, Úsharal qalasynyń jastar nusqaýshysy Almas Samarhanov, shekarashylar Azamat Baýkenov, Baýberik Qasymseıit, Úsharal qalasynyń sport nusqaýshysy Maqsat Samarhanov, temirjolshylar Serjan Kúmpeıisov, Baǵlan Keńesov, aýdandyq biryńǵaı personaldy basqarý bólimshesiniń mamany Ǵalymbek Kamıtov, Úsharal qazaq gımnazııasynyń aǵylshyn pániniń muǵalimi Erkejan Esenbekova, «Alakól jylý» KMM-nyń ınspektory Aıdos Ybraev, Qońyr orta mektebiniń fızıka-matematıka pániniń muǵalimi Anýar Bazarbekov, aýdandyq ortalyq aýrýhananyń felsheri Qaısar Azatbek ózgelerge kómek kórsetýde aıanyp qalmaýda.

Eriktiler jylynda da top jumysy toqtap qalmady. Karantın kezinde muqtaj otbasylar azyq-túlik jetkizý, jalǵyz basty qarmıalarǵa qolǵabys eti syndy ister atqarylýda. Sonymen qatar eki dana tigin mashınalary satyp alynyp, kóprettik betperde tigý isi de qolǵa alynǵan.

Minekeı, jalyndy jastarymyzdyń jasampaz bastamasy osy. Qazirgi zaman aǵymymen arpalysa júrip, ózgelerge de demdesýdi umytpaıtyn bolashaq ıeleriniń isi sátimen jalǵasa bersin degimiz keledi.

Izgilikti iske qumarmyz

Jastyq jalyn men kúsh-jigerimizdi jasampaz isterge jumsaý biz úshin mańyzdy sanalady. Qazaqstandaı qýatty eldiń bolashaǵy bizdiń qolda bolǵandyqtan el múddesine qaraı qam qylý basty prıorıtet bolýy kerek.

Osy rette prezıdent Q.Toqaevtyń qoldaýymen aǵymdaǵy jyl «Volonterlar jyly» dep belgilenip, úlken jumystar atqarylyp jatyr. Bul izgilikti isten aýdan jastary da kende qalmady. Jerlesterimizge qolǵabys etýde biz bir adamdaı atsalysyp, júkti jumyla kóterýge umtylýdamyz.

Bir jaǵynan aýdannyń jany jaısań jandaryna aıtar alǵysymyz da zor. Bizdiń bastamamyzdy qoldap, óz taraptarynan barynsha kómek kórsetýde. Bul jaqsylyqqa umsynǵan jastardy jigerlendirýge, eńbegimizdiń ónimdi bola túsýine úlken septigin tıgizip otyr.

M.SAMARHANOV, Úsharal qalasy boıynsha sport nusqaýshysy, «Bir arman» eriktiler tobynyń múshesi.

Oıymyz ortaq, baǵytymyz bir

Biz san salada eńbek etip, árqaısymyz óz taǵdyr jolymyzben júrip kele jatsaq ta oıymyz ortaq arnada toǵysyp, eriktiler qyzmetin baǵdar ettik. Tirligimiz bólek bolsa da, tilegimizdiń baǵyty birigip, aýdan halqyna birige septesýdemiz.

Erikti bolý – bireýdiń nusqaýymen ıakı buıryǵymen istelip jatqan dúnıe emes. Bul eń aldymen júrek qalaýymyz jáne qazaqy qaıyrymdylyq pen meıirimdilikke qumar tól minezimizdiń boıymyzdan kórinis tabýy. Elimiz tarıhtyń talaı taǵdyrsheshti ótkelderin eńserip, óziniń bereke qumarlyǵy men tatýlyǵynyń arqasynda búgingi dárejesine jetti. Bizdiń maqsat osy birligimizdiń tuǵyryn teńseltpeı, baıandy bolashaqty qalyptastyrýǵa jumylý.

A.YBRAEV, «Alakól jylý» KMM-nyń ınspektory, «Bir arman» eriktiler tobynyń múshesi.

Júregimiz jylylyqqa jaqyn

Álem halqyn ábigerge salǵan pandemııa, dúnıejúzin dúrliktirgen daǵdarys daýyly – bunyń barlyǵy memleket ekonomıkasyna, sondaı-aq halyqtyń áleýmettik jaǵdaıyna teris áser berip otyrǵany málim. Karantın saldarynan kóptegen otandastarymyz jumyssyz qaldy ıakı jalaqylary toqtady. Bul karantınmen qabattasqan aýyr soqqy bolǵany jasyryn emes.

Osy rette ózgeniń muńyn óz muńyndaı kórip, halyqtyń joǵyn joqtap, baryn túgendeýge atsalysyp júrgen jalyndy jastardyń eńbegi erekshe. Sonyń ishinde «Bir arman» eriktiler tobynyń qarqyndy isteri kópshiliktiń alǵysyn da alyp úlgerdi. San baǵyttaǵy jobalar men bastamalar óz retimen jalǵasyp, júıeli túrde atqarylyp keledi. Birshama qaltaly jerlesterimiz de atsalysýda. Barlyq qarymdy qadamdar eń aldymen alakóldikterdiń saf altyndaı saqtalǵan tatýlyǵy men biriliginiń arqasy dep bilemin.

A.SAMARHANOV, Úsharal qalasy boıynsha jastar nusqaýshysy, «Bir arman» eriktiler tobynyń múshesi.

Qaıyrymdylyqtyń qaıtarymy mol

Tegershigi shyr aınalǵan tynymsyz tirligimizdiń sońynan qýyp, keıde aınalamyzda bolyp jatqan dúnıelerdi ańǵarmaı da qalamyz. О́zimizdiń isimizdi ilgeriletemiz dep, ózgeniń muńyna nemquraıly qaraıtynymyz da jasyryn emes. Bul zaman aǵymynyń qalaýy dep bilemiz.

Alaıda óńirimizde «Bir arman» eriktiler toby qurylyp, qaıyrymdylyq qozǵalysy bastalǵaly beri bóten adamǵa baqyt syılaýdyń da erekshe qýanysh ekendigin baıqadyq. О́mirden úmitin úzip, saly sýǵa ketken pendege kómek qolyn sozý arqyly olardyń kóńiline nur uıalatý tańǵajaıyp sezimge bóleıdi. Jasaǵan isińnen basqalardyń ezýine kúlki úıirilý – eńbektiń naǵyz óteýi.

Osy baǵytta qam qylyp júrgen barsha qatarlastarymdy el kelesheginiń kepili deýge bolady. Búginnen bastap bolashaq úshin qyzmet etip jatqan olardyń ónimdi jumystary maqtaý men madaqtaýǵa ábden laıyq.

Ǵ.KAMITOV, aýdandyq biryńǵaı personaldy basqarý bólimshesiniń mamany, «Bir arman» eriktiler tobynyń múshesi.

Eriktiler eldiń qamyn oılaıdy

Biz bala kúnimizden talaı taǵdyrlardyń qıraǵanyn, qanshama adamdardyń ómir zańyna shydas bermeı, berilip jatqanyn kórdik. Bala-shaǵany asyraý bylaı tursyn, bir úzin nan tappaı, kóshede qolyn jaıǵan jerlesterimizge qarap, kóńilimizge muń uıalaıtyn.

Qazir erjettik, eseıdik. Árkimge kómek kórsetýge shaamyz jetpese de, álemdi qoparyp tastaýǵa kúsh-qýatymyz barshylyq, boıymyzda jastyq jalynymyz órship, erik-jigerimiz tepship tur. «Temirdi qyzǵan kezinde ur» demekshi, mańdaıymyzǵa jazylǵan ýaqytymyzdy bekerge jumsamaı, el ıgiligine qaraı qyzmet etýdi basty maqsattarymyzdyń qataryna qoıyp otyrmyz. Bul bizdiń tańdaýymyz.

Erikti bolý erikkenniń isi emes. Bunda tózimdilik pen meıirimdilik, lezde sheshim qabyldaý men jaýapkershilikti kótere bilý syndy qasıetterdi tolyq meńgerýiń kerek. Sonda ǵana halyqqa jaqyndasyp, olarǵa barynsha kómek kórsetýge múmkindigiń de, ýaqytyń da tabyla ketedi.

A.BAÝKENOV, jas sarbaz, «Bir arman» eriktiler tobynyń múshesi.

Tas túsken jerine aýyr

Taǵdyr... Birine kúle qarap, qushaǵyn keńinen jaısa, ekinshisine syny men synaǵyn molynan berip, qınaýǵa da sheber-aq. Amal neshik, kónýińe týra keledi.

О́ziminiń ómir jolymda men de talaı taǵdyry qınaǵan, tuǵyry qıraǵan azamattardy jolyqtyrdym. Kóńilinde muń, kózinde sharasyzdyq, júreginde sóngen úmit. Osyndaı jerlesterimizge súıemdeı bolsa da yqpaldasyp, aıaqqa turyp ketýlerine septesý kez kelegen adamnnyń qolynan kele bermeıdi. Osy rette jastyq jalynymyz ben el múddesin kózdegen qarymdy umtylysymyzdy bir arnaǵa toǵystyrǵan «Bir arman» jobasynyń arqasynda biz de birshama taǵdyrlardyń tik turýyna demdestik. Isimiz ilgeri jyljyp, saparymyz sátimen jalǵassa, qaıyrymydylyq jolyndaǵy qyzmetimizdi odan ári jalǵaı beremiz.

Eńbegimizdiń aqysy eldiń alǵysy men ystyq yqylasy. Budan asqan bizge baqyttyń da keregi shamaly. Bizdiń búgingi kishkentaı ǵana isimiz ózgeniń erteńi úshin úlken qadam bolýy da yqtımal. Sondyqtan bet alysymyzdan tanbaı, tek aldyǵa qaraı adymdaı bermekpiz.

S.KÚMPEIISOV, jas temirjolshy, «Bir arman» eriktiler tobynyń múshesi.

Bireýge kúlki syılaý da baqyt

Zaman aǵymy aldyǵa jyljyp, ýaqyt syrǵyǵan saıyn álemde meıirimdilik azaıyp bara jatyr ma dep qalasyz. Ǵalamtorǵa úńilseńiz qaptaǵan jantúrshigerlik jańalyqtar, zorlyq-zombylyq, alasapyran. Jaqsylyqqa oryn joq pa dep te qalasyz keıde.

Bir qýanarym, tektiligine taımaǵan qazaq eliniń tamyrly qasıetteriniń ishinde «qaıyrymdylyq» syndy izgiliktiń joǵalmaýy. Yqylym zamandardan beri jalǵasyp kele jatqan bul mineziniń arqasynda elimiz talaı taǵdyr ótkelderinde birin-biri demep, jebep, osy kúngi dańqy men daqpyrtynyń bıigine shyǵyp otyr.

Biz de óz tarapymyzdan buqaranyń bir keregine jaraý úshin qaıyrymdylyq isine atsalysyp, barynsha kómek kórsetýge umtylýdamyz. Bul ýaqyttyń moldyǵy ıakı artyq aqshamyzdyń shashylyp jatqanynan týyndaǵan dúnıe emes. Kerisinshe sharasyzdyqtan sharshaǵan jerlesterimizdiń muńyn elep, bolashaǵyna kishkentaı bolsa da sáýle shashý. Osy jolda áli talaı asýlardy baǵyndyratynymyzǵa kámil senimdimim.

Q.AZATBEK, jas dáriger, «Bir arman» eriktiler tobynyń múshesi.

Ultqa qyzmet etýge tıispiz

Ulylyq – qyzmettegi órleýiń men laýazymdyq óristeýińe emes, ultyń úshin atqarǵan jumysyńyzdyń salmaǵymen ólshenbek. Sebebi tamyrly tarıhymyzǵa zer salsaq, esimderi ǵasyrlarǵa jalǵasqan uly tulǵalarymyzdyń barlyǵy derlik el úshin ot keshken azamattar.

Qazirgi jastar úshin múmkindikter kókjıegi keńeıgen mezette qol qýsyryp otyrý bizge syn. О́ıtkeni qyzmetimiz bar, taǵdyrdan tarshylyq ta kórip jatqanymyz joq. Memlekettiń de qoldaýy mol, jastyq jalynymyz da alaýlap tur. Qolymyzdy mezgilinen kesh sermemeý úshin, dál osy ýaqyttan bastap halyq qamyn kózdeýge tıispiz. Barsha qatarlastarymyzdy osy jolǵa shaqyrý da mindetim dep bilemin.

Táýbá, talaı jumystar atqardyq. Bastama kótergen sátte «Qolymyzdan kele me?» dep kúmán keltirgenimizben, búginde sol kezeńderi kúlkimen eske alamyz. Erikti bolý – men úshin jáne tilegimiz ortaqsatqan qatarlastarym úshin qurmet.

A.BAZARBEKOV,

Qońyr orta mektebiniń fızıka-matematıka pániniń muǵalimi, «Bir arman» eriktiler tobynyń múshesi.

Erteńimiz elge tıesili

Búginimiz ózimizge bolǵanymyz, erteńimiz elge tıesili. Sebebi ortaq Otanymyzdyń patrıoty retinde bolashaǵymyzdy buqaranyń taǵdyrymen sabaqtastyrý týǵan jerge tý tikken ár er-azamatqa mindet.

Talaı batyrlar men bahadúrler, kóptegen tekti tulǵalar topyraǵynda aýanp ósken kıeli Alakóldiń týmasy bolǵandyqtan, óńirimizdiń jáne áleýmettiń áleýetin kóterý úshin qyzmet etý basty maqsattarymyzdyń qataryn tolyqtyryp otyr.

Prezıdent Q.Toqaevtyń sarabdal saıasatynyń arqasynda el qamyn kózdegen jastarǵa mol múmkindikter usynylyp otyr. Bıylǵy «Eriktiler jyly» sol múmkindikterdiń kókjıegin keńeıte túskeni málim.

Shyny kerek, eldiń múddesine qaraı adymdaý ózgeshe baqytqa keneltedi. Qýanyshymyzǵa qýanysh qosyp otyrǵan eriktilik qyzmetti jalǵastyra berý – maǵan jáne qatarlastaryma úlken abyroı.

B.QASYMSEIIT,

jas sarbaz, «Bir arman» eriktiler tobynyń múshesi.

 

Jastyq jalynymyzdy tolyq paıdalanaıyq

Jastar – erteńgi Qazaqstannyń qýatty tiregi, eldiń kelesheginiń kepili. Olardyń bilimdi, bilikti bolýynan bólek, baýyrmaldyǵy men meıirimdilig, janashyrlyǵy men jasampaz isterge qumarlyǵy quptarlyq is.

Sondyqtan da biz «Alakóldik jastar» degen brendti qalyptastyrýǵ básekege qabilettiligimizdi arttyrý jáne jerlesterimizge yqpaldasý maqsatynda «Bir arman» qaıyrymdylyq jobasynda basymyzdy biriktirip, alǵa qaraı birige qadamdar basyp kelemiz. Ortaq dúnıege jumylǵan uıymshyldyǵymyzdyń arqasynda birshama jumystardy atqaryldy.

Alǵa qoıǵan josparlarymyz da aýqymdy. Qyzmetimizden bosaǵan ýaqytta muqtaj jandardyń hal-ahýalyn baǵamdap, qalaı qolǵabys etsek dep júremiz. Bul ómirimizdiń úırenshikti bólshegi bolyp ta ketti.

«Eriktiler jyly» bizge jańasha tynys syılaǵany jasyryn emes. Isimizge órge domalap, pandemııa kezinde halyqtyń bir keregine jaradyq dep oılaımyn. Aldaǵy ýaqytta da osy betalysymyzdan tanbaı, shyńdarǵa qaraı qadam basa bermekpiz.

B.KEŃESOV,

jas temirjolshy, «Bir arman» eriktiler tobynyń múshesi.