Taýly Qarabahta atysty toqtatý týraly kelisim jasalyp, Ázerbaıjan Qarabahtaǵy birneshe aýdandy ózine qaıtaratyn boldy. Ázerbaıjan prezıdenti Ilham Álıev, Armenııa premer mınıstri Nıkol Pashınıan men Reseı prezıdenti Vladımır Pýtın arasynda jasalǵan kelisim nátıjesindegi birlesken málimdeme 9 bólimnen turady.

Kelisimge saı, Taýly Qarabahtaǵy atys toqtatylyp, Gazah, Agdam aýdandary 20 qarashaǵa deıin Ázerbaıjanǵa qaıtarylady.

Taýly Qarabah pen Lashyn dálizi mańynda bitimgershilik aýmaq qurylady. Onyń myzǵymastyǵyna Reseı tarapy 5 jyl boıy kepil bolady. Taraptardyń biri atalǵan kelisimdi buzsa, bitimgershilik mıssııa taǵy 5 jylǵa uzartylady. Bul maqsatta 1960 atys qarýy bar ásker, 90 oq ótkizbeıtik kólik, 380 avtokólik pen arnaıy teknıka jiberiledi.

Kelisimniń oryndalýyn qadaǵalaý tıimdiligin arttyrý maqsatynda bitimgershilik ortalyq qurylady.

Armenııa 2020 jylǵy 15 qarashaǵa deıin Ázerbaıjanǵa Kelbadjar aýdanyn, 2020 jylǵy 1 jeltoqsanǵa deıin Lashyn aýdanyn qaıtarýǵa tıis. Taýly Karabah pen Armenııany eni 5 shaqyrymdyq Lashyn dálizi baılanystyryp turady.

Aldaǵy 3 jylda Lashyn dálizi arqyly ótetin jańa marshrýt qurylysynyń jospary bekitilýi kerek. Dáliz Stepanakert pen Armenııa arasyn jalǵamaq. Ázerbaıjan tarapy dáliz arqyly júretin azamattardyń, kólik quraldarynyń, júk kólikteriniń qaýipsizdigine kepil bolady.

Taýly Qarabahqa azamattardyń oralýy bosqyndar jónindegi BUU Joǵarǵy komıssarynyń qadaǵalaýynda bolady.

Áskerı tutqyndar men ustalǵan ózge azamattar, qaza tapqandardyń denesi almastyrylady.

Aımaqtaǵy ekonomıkalyq jáne kólik baılanystary qaıta qalpyna keltiriledi. Armenııa Ázerbaıjannyń batys aýdandary men Nahıchevan avtonomııalyq respýblıkasy (Ázerbaıjan quramyndaǵy avtonomııalyq respýblıka) arasyndaǵy kedergisiz qozǵalys pen kólik baılanysyn qamtamasyz etedi. Kólik qozǵalysy Reseı shekara qyzmeti tarapynan qadaǵalanady.

Nahıchevan avtonomııalyq respýblıkasy men Ázerbaıjannyń batys aýdandaryn baılanystyratyn jańa kólik kommýnıkasııalarynyń qurylysy bastalady.

"Qamshy" silteıdi
Ilmek sózder: Taýly Qarabah

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir