Taldyqorǵanda densaýlyq saqtaý uıymdaryna jedel-járdem kólikteri tabystaldy

Taldyqorǵan qalasynyń ortalyq alańynda densaýlyq saqtaý uıymdaryna «Jedel járdem» kólikteriniń kilti tapsyryldy. Saltanatty sharaǵa oblys ákimi Amandyq BATALOV qatysty.

Memleket basshysy QasymJomart Toqaev Joldaýynda: «Ulttyq densaýlyq saqtaý salasyn odan ári damytý jónindegi sharalar barlyq medısınalyq mekemelerin qajetti qural-jabdyqtarmen tolyq jaraqtandyrýǵa, naýqastarǵa arnalǵan oryndar qoryn 50 paıyzǵa jańartýǵa, eskirgen ınfraqurylymdy aýystyrýǵa, ómir uzaqtyǵyn boljamdy 75 jasqa deıin jetkizýge múmkindik beredi», – dep halyqtyń densaýlyǵyn nyǵaıtýdy negizgi mindet retinde atap kórsetken edi. Memleket basshysynyń tapsyrmasyna oraı oblys ortalyǵynda jańa 200 oryndy ınfeksııalyq aýrýhana boı kóterip, zaman talabyna saı medısınalyq quraldarmen jabdyqtaldy. Halyq densaýlyǵyn nyǵaıtý maqsatynda medısına salasyna 305 jas maman jumysqa tartyldy. Jyl sońyna deıin taǵy 64 maman jumysqa qabyldanbaq. Aq halatty mamandardy turaqtandyrý maqsatynda bıyl oblysta 127 páter satyp alyndy. Keler jyly oblys ortalyǵynda medısına qyzmetkerlerine arnalǵan 60 páterli turǵyn úı boı kóteredi dep josparlanýda.

Densaýlyq salasy qyzmetkerlerine medısınalyq kóliktiń kiltin oblys ákimi Amandyq Batalov saltanatty jaǵdaıda tabystap, pandemııa kezinde qajyr-qaıratyn aıamaı qyzmet etken dárigerlerge rızashylyǵyn bildirdi.

– Halyq – memlekettiń basty baılyǵy. Sol sebepti biz birinshi kezekte eldiń amandyǵyn oılaýymyz kerek. Indet elge engeli birshama aýyr jaǵdaıdy bastan keshirdik. Birinshi tolqynda kemshilik te oryn aldy. Endi ondaı olqylyqqa oryn bermeýimiz kerek. Pandemııamen kúreske jergilikti bıýdjetten 13,8 mıllıard teńge bólindi. Onyń 8,8 mıllıard teńgesi ekinshi tolqynnyń daıyndyq jumysyna jumsaldy. Atalǵan qarajatqa 3 kompıýterlik tomografııa, 18 rentgen apparaty, 150 ókpeni jasandy jeldetý apparaty alyndy. Sonymen qatar, oblystyń 13 aýrýhanasy ottegi stansylarymen jáne 1070 ottegi konsentratorymen qamtyldy. Jalpy, ekinshi tolqynǵa 5 myń 280 tósek-oryn daıyndaldy. 180 «Jedel járdem» kóligi men 12 jyljymaly medısınalyq keshen satyp alyndy. Nátıjesinde, «Jedel járdem» brıgadalarynyń sany 165-ten 205-ke kóbeıdi. Endi halyqqa tek sapaly qyzmet kórsetýimiz kerek. Eń bastysy – halyq medısına mamandarynyń aıtqan keńesine qulaq túrip, barlyq saqtyq sharalaryn oryndasa bolǵany. Jaqyndarymyzǵa janashyr bolyp, tártipke baǵynyp júrýdi umytpaıyq. Jaýapkershilikti árbir adam sezinse deımin. О́ıtkeni, adam ómirinen artyq eshteńe joq. Sondyqtan, osyndaı syn saǵatta yntymaǵy jarasqan halqymyz judyryqtaı jumylyp, indetpen birge kúresýge tıis, – degen oblys basshysy aýdan, qala aýrýhanalarynyń dırektorlaryna «Jedel járdem» kólikteriniń kiltin tabys etti.

Bul kólikter zaman talabyna saı arnaıy tehnıkalarmen jabdyqtalǵan. Kólikte qosymsha reanımasııalyq baǵyttaǵy, ıaǵnı, ınsýlt alǵandarǵa, júrek talmasyna shaldyqqandarǵa jyldam kómek kórsetý úshin arnaıy medısınalyq qural-jabdyqtyń barlyq túri ornatylǵan. Dıagnostıkalyq medısınalyq keshen ishinde naýqastardy qabyldaý bólmesi, rentgen, ýltradybystyq zertteý jasaıtyn túrli zamanaýı quraldar, akýsher-gınekolog mamandardyń jeke kabıneti, arnaıy zerthana, radıasııalyq dıagnostıka, jalpy dárigerlerdiń tájirıbe almasý aımaǵy ornalasqan. Múmkindigi shekteýli azamattarǵa arnalǵan pandýslıft ta qarastyrylǵan. Oblystyq jedel jáne shuǵyl medısınalyq kómek stansysynyń aǵa feldsheri Sholpan Nurǵalıeva jańa «Jedel járdem» kóliginde ornalasqan qurylǵylarmen tanystyrdy. Onyń aıtýynsha, barlyq medısınalyq qurylǵy Germanııa memleketinde shyǵarylǵan. Birinshi medısınalyq kómekke qajetti ozyq tehnologııalyrmen jabdyqtalǵan. Eń bastysy, barlyq «Jedel járdem» kóliginde ókpeni jasandy jeldetý apparaty ornalastyrylǵan.

Saltanatty shara sońynan oblystyq jedel jáne shuǵyl medısınalyq kómek stansysynyń basshysy Savelıı Pak Prezıdent Qasym-Jomart Toqaevqa, oblys ákimi Amandyq Batalovqa medısna qyzmetkerleriniń atynan alǵys aıtyp, halyqtyń amandyǵy jolynda talmaı eńbek etetindigin jetkizdi. Kerbulaq aýdandyq analar keńesiniń tóraıymy Ǵalııa Aqbasova da aq halatty abzal jandardyń jumysyna tabys tilep, analyq alǵys aıtty.