N.Nyǵmatýlın: Jańa normalar 2021 jyldan azamattarǵa zeınetaqy jınaǵyn qoldanýǵa múmkindik beredi

Májilis tóraǵasy Nurlan Nyǵmatýlın palatanyń jalpy otyrysynda memleket basshysynyń bıylǵy parlamenttik sessııanyń ashylýynda júktegen tapsyrmalaryn oryndaýǵa baǵyttalǵan zańnamalyq normalarǵa nazar aýdardy.

Atap aıtqanda, halyqtyń zeınetaqy jınaqtarynyń bir bóligin paıdalaný, sondaı-aq qoǵamdyq keńesterdiń rólin kúsheıtý.

Osyǵan oraı, májilis depýtattary ekonomıkalyq ósýdi qalpyna keltirý, sondaı-aq qoǵamdyq keńesterdiń qyzmetine qatysty túzetýlerdi qamtıtyn zań jobalaryn birinshi oqylymda maquldady.

Otyrys barysynda májilis tóraǵasy qoǵamda qyzý talqylanǵan zeınetaqy jınaqtarynyń bir bóligin paıdalanýǵa múmkindik berýge baǵyttalǵan normalar týraly aıtty.  

Nurlan Nyǵmatýlın atalǵan zań jobasynyń qabyldanýymen osy máseleni sheshý boıynsha Zańnamalyq baza qurylatynyn atap ótip.

– 2021 jyldyń basynan bastap zeınetaqy qorynyń salymshylary óz jınaqtarynyń bir bóligin turǵyn úı satyp alýǵa, emdelýge nemese qarjy kompanııalarynyń basqarýyna berý úshin paıdalana alady, – dedi májilis spıkeri.

Osy normany talqylaý kezinde Májilis depýtattary zań jobasynda kózdelgen zeınetaqy jınaqtarynyń "jetkiliktilik shegin" belgileý ádistemesine qatysty máseleni kóterdi.

Eńbek jáne halyqty áleýmettik qorǵaý mınıstrliginiń ókilderi túsindirgendeı, zeınetaqy jınaqtarynyń "jetkiliktilik shegin" aıqyndaý ádistemesin Úkimet anyqtaıtyn bolady. "Jetkiliktilik shegin" belgileýdiń basty maqsaty – azamattardy zeınetkerlik jasqa tolǵan kezde bolashaqta laıyqty zeınetaqymen qamtamasyz etý múmkindigi.

Sonymen qatar, májilis spıkeri zeınetaqy jınaqtaryn paıdalaný tetigi qoljetimdi ári túsinikti bolýǵa tıis ekenin atap ótip, aldaǵy ýaqytta memlekettik organdar osy talaptardyń júzege asyrýdyń naqty tetikterin qalyptastyrýy kerek dedi.

Sondaı-aq búgingi jalpy otyrysta qoǵamdyq keńesterdiń qyzmetine qatysty normalar talqylandy.

Atap aıtqanda, depýtattar qoǵamdyq keńester qazirgi ýaqytta memlekettik organdarda ǵana emes, kvazımemlekettik sektorǵa da qatysty  túzetýler engizdi.

Budan basqa, depýtattar qoǵamdyq keńesterge kvazımemlekettik sektor sýbektisiniń damý strategııalary men josparlarynyń jobalaryn, bıýdjetiniń atqarylýyn, satyp alý komıssııalarynyń qyzmetine qatysýmen qatar talqylaý fýnksııasyn berýdi usynady.

Osyǵan qatysty pikir bildirgen Nurlan Nyǵmatýlın bul máseleler árdaıym qoǵamnyń nazarynda ekenin aıtyp, atalǵan norma qoǵamdyq keńesterdiń qyzmetindegi eleýli ilgerileýshilikti bildiretinin jetkizdi.

Sonymen qatar, Májilis depýtattary zań jobasyn ázirleýshilerdiń ýákiletti organnyń qoǵamdyq keńesterge "basshylyq etýdi" júzege asyrýyn kózdeıtin tujyrymyna qatysty alańdaýshylyqtaryn bildirdi.

Májilis spıkeri atap ótkendeı, qoǵamdyq keńesterde memlekettik organnan basshylyq bolmaýy mańyzdy. Sonda ǵana olardyń jumysynyń derbestik qaǵıdattary saqtalady.

Ekinshi oqylym aldynda jumys toby osy normanyń tujyrymdamasyn naqtylaýy kerek.

Osyǵan qatysty sózin qorytyndylaǵan májilis tóraǵasy:

– Osy qoǵamdyq keńester  qurylǵan kúnnen bastap, respýblıkalyq, jergilikti deńgeıde barlyq máselelerdi táýelsiz jáne ashyq sheshýge zor yqpal etip keledi. Sondyqtan, búgin biz maquldaǵan zań jobasy, eń aldymen, qoǵamdyq keńes jumystaryn odan ári kúsheıtýge serpin beredi. Sonymen birge, qoǵamdyq dıalogtyń jańa úlgisin qalyptastyrýǵa jol ashady dep senemiz, – dedi.

Májilistiń baspasóz qyzmeti