Qazaqstannyń taǵy bir aımaǵynda karantın kúsheıtilmek

COVID-19-dyń taralýyn tejeý máseleleri jónindegi vedomstvoaralyq komıssııanyń tóraǵasy, premer-mınıstrdiń orynbasary Eraly Toǵjanovtyń Soltústik Qazaqstan oblysyna jumys sapary barysynda oblysta 9 qarashadan bastap jańa shekteý sharalary engiziletini habarlandy.

Petropavl qalasynda qalanyń perımetri boıynsha blokposttar ornata otyryp karantın engizý kózdelýde. Sondaı-aq kún saıynǵy indet boıynsha ósim 10-nan astam jaǵdaıdy quraıtyn eldi mekenderde sanıtarlyq blokposttar ornatylmaq.

Petropavl-Almaty baǵyty boıynsha temirjol tasymaldaryn aptasyna 7-den 3 retke deıin qysqartý, Petropavl qalasynan shyǵatyn áýe jolaýshylary úshin teris nátıjesi bar PTR anyqtamasynyń (berilgen sátten bastap 3 táýlikten aspaıtyn) bolýyn mindetteý, dinı obektilerdiń, teatrlardyń, kınoteatrlardyń, mádenıet obektileriniń qyzmetin toqtatý josparlanǵan.

Jumys kúnderi qoǵamdyq tamaqtandyrý obektileri bir mezgilde 30-dan aspaıtyn kelýshilerdi qabyldaı alady. 30-dan kem oryndy obektiler úshin orynnyń 50%-y ǵana tolýǵa tıis.

Demalys kúnderi qoǵamdyq tamaqtaný obektilerinde jetkizý qyzmeti ǵana isteıdi. Saýda úıleri, saýda ortalyqtary, aýdany 500 sharshy metrden asatyn azyq-túliktik emes dúkender jumysy shekteledi. Sulýlyq salondarynyń, shashtarazdardyń, basseınderdiń, fıtnes-klýbtardyń, jattyǵý zaldarynyń jumystary toqtaıdy.

Áýejaılarǵa, temir jol vokzaldaryna kútip alatyn jáne shyǵaryp salatyn tulǵalarǵa kirýge tyıym salynady.