«Nur Otan» partııasy óńirlik fılıaldarynda ótetin konferensııalardyń kestesin jarııalady. Onyń barysynda barlyq deńgeıdegi máslıhattarǵa partııalyq tizimder jáne ár óńirden Májiliske partııalyq tizimge kandıdattar anyqtalatyn bolady.

Sonymen, konferensııa 10 qarashada – Shymkent qalasynda, 11 qarashada – Almaty qalasynda, 12 qarashada – Nur-sultan qalasynda ótedi. Almaty, Qaraǵandy jáne Qyzylorda oblystarynda – 16 qarashada, al Aqmola, Shyǵys Qazaqstan, Jambyl, Batys Qazaqstan, Túrkistan, Atyraý, Qostanaı, Mańǵystaý, Pavlodar jáne Soltústik Qazaqstan oblystarynda – 17 qarashada ótpek.

Partııanyń baspasóz qyzmeti habarlaǵandaı, pandemııa jaǵdaıyna baılanysty partııalyq konferensııalar barlyq sanıtarlyq-epıdemıologııalyq talaptardy saqtaı otyryp uıymdastyrylady. Bul rette partııanyń resmı akkaýnttarynda barlyq óńirlik konferensııalardyń onlaın-kórsetilimi qamtamasyz etiledi.

Konferensııalarda sheshim qatysýshy delegattardyń kópshilik daýysymen qabyldanady. Daýys berý «Praımerız» aqparattyq júıesinde ótetin pikirsaıystardyń qorytyndylary boıynsha daýys berýdi qospaǵanda, delegattyń qol nemese mandatyn kóterýi arqyly ótkiziledi.

Konferensııa barysynda qatysýshylar arasynda pikirsaıys uıymdastyrylady. Birinshi raýndta úmitkerler aýdan nemese qalanyń máselelerin sheshýge qatysty ózderiniń kózqarastaryn usynýy kerek. Ekinshi raýnd – «suraq-jaýap» formatyndaǵy pikirtalas sessııasy.

Partııanyń Ortalyq apparaty bekitken fılıal konferensııalarynyń árbir kezeńin reglamentteıtin nusqaýlyqqa sáıkes, Májiliske úmitkerler, respýblıkalyq mańyzy bar qalalardy qospaǵanda, eki ret – aýdandyq, qalalyq jáne oblystyq konferensııalarda pikirsaıys ótkizedi.

Parlament tómengi palatasynyń qazir qyzmettigi depýtattary birden oblystyq, sondaı-aq respýblıkalyq mańyzy bar qalalardaǵy konferensııalardyń pikirsaıystaryna qatysa alady.

Pikirsaıys qorytyndysy boıynsha eń kóp daýys jınaǵan kandıdat Májilistiń partııalyq tizimine pikirsaıysqa qatysýshy retinde oblystyq konferensııaǵa usynylady. Árbir aýdan, qala Májilistiń partııalyq tizimine pikirsaıysqa bir qatysýshyny usynady. Oblys ortalyǵy Májilistiń partııalyq tizimindegi óńirdiń ókildik kvotasyna teń sanda pikirsaıysqa qatysýshylardy usynady.

Oblystyq máslıhattarǵa partııalyq tizimder tıisti konferensııalarda, al Májiliske qorytyndy tizim «Nur Otan» sezinde bekitiledi.

Aıta keteıik, óńirlik konferensııalarda úmitkerler arasynda pikirsaıystar praımerızdiń ekinshi kezeńi aıasynda ótkiziledi.

Partııaishilik irikteýdiń birinshi kezeńine 10 myńǵa jýyq kandıdat qatysty. Olardyń 37%-ti – áıelder, 29%-ti – 35 jasqa deıingi jastar. Bastaýysh partııa uıymdarynan kandıdattardyń 30%-i usynylsa, al 70%-i – ózin-ózi usynýshylar. Kandıdattardyń ortasha jasy – 43 jas. Bul rette daýys berýge 662 myńnan asa partııalyq qatysty.

Partııaishilik praımerız – Elbasy, «Nur Otan» partııasynyń Lıderi Nursultan Nazarbaevtyń bastamasymen qolǵa alynǵan partııa jumysyn qaıta jandandyrý baǵdarlamasynyń qorytyndy kezeńderiniń biri.

Bul týraly tolyǵyraq aqparatpen primaries.kz saıtynan tanysýǵa bolady

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir