«Nur Otan» Májilis pen máslıhattarǵa partııalyq tizimderdi qalaı jasaıdy?

«Nur Otan» máslıhattar men Májiliske partııalyq tizimderdi anyqtaıtyn konferensııalar ótkizý jónindegi nusqaýlyqty ázirledi.

«Nur Otan» partııasynyń Ortalyq apparaty partııa fılıaldary konferensııalarynyń árbir kezeńin reglamentteıtin nusqaýlyqty bekitti, onyń barysynda barlyq deńgeıdegi máslıhattarǵa partııalyq tizimder jáne Májiliske partııalyq tizimge ár óńirden kandıdattar anyqtalatyn bolady.

Sonymen, partııaishilik irikteý – praımerızdiń ekinshi deńgeıi aıasynda kandıdattardy konferensııalarda pikirsaıystar kútýde.

Májiliske úmitkerler, respýblıkalyq mańyzy bar qalalardy qospaǵanda, eki ret – aýdandyq jáne oblystyq konferensııalarda pikirsaıysqa túsedi.

Parlamenttiń tómengi palatasynyń qyzmettegi depýtattary birden oblystyq sondaı-aq respýblıkalyq mańyzy bar qalalar konferensııalaryndaǵy pikirsaıystarǵa qatysa alady.

Partııanyń nurotan.kz resmı saıtynda jáne primaries.kz saıtynda jarııalanǵan nusqaýlyqqa sáıkes koronavırýs pandemııasyn eskere otyryp, aýdandyq, qalalyq jáne aımaqtyq partııalyq konferensııalar áleýmettik araqashyqtyq qamtamasyz etilgen úı-jaılarda, sondaı-aq barlyq sanıtarlyq-epıdemıologııalyq normalar saqtala otyryp ótkizilýi kerek.

Nusqaýlyqqa sáıkes aýmaqtyq partııa konferensııasyna delegattardy bastaýysh partııa uıymynyń jınalysy saılaıdy. Praımerızge qatysqan kandıdattar jáne olardyń senimdi ókilderi konferensııaǵa delegat retinde saılanbaıdy.

Eń joǵary reıtıngke ıe bolǵan kandıdattar arasynan aýmaqtyq partııa konferensııasyna pikirsaıysqa qatysýshylardyń tizimin fılıaldyń Saıası keńesiniń Bıýrosy bekitedi.

Konferensııalarda daýys berý «Praımerız» aqparattyq júıesinde ótkiziletin pikirsaıystardyń qorytyndylary boıynsha daýys berýdi qospaǵanda, delegattyń qol nemese mandatyn kóterýi arqyly ótkiziledi.

Ashyqtyqty qamtamasyz etý úshin barlyq pikirsaıys áleýmettik jelilerde tikeleı efırde kórsetiletinin atap ótken jón.

Pikirsaıys qorytyndysy boıynsha eń kóp daýys jınaǵan kandıdat Májilistiń partııalyq tizimine pikirsaıysqa qatysýshy retinde oblystyq konferensııaǵa usynylady. Árbir aýdan, qala Májilistiń partııalyq tizimine pikirsaıysqa bir qatysýshyny usynady. Oblys ortalyǵy Májilistiń partııalyq tizimindegi óńirdiń ókildik kvotasyna teń sanda pikirsaıysqa qatysýshylardy usynady.

Oblystyq máslıhattarǵa partııalyq tizimder tıisti konferensııalarda bekitiletin bolsa, al Májiliske qorytyndy tizim «Nur Otan» sezinde bekitiledi.

Eske sala keteıik, praımerız – Elbasy, «Nur Otan» partııasynyń Lıderi Nursultan Nazarbaevtyń bastamasymen qolǵa alynǵan «Senim. Dıalog. Bolashaqqa nyq qadam» partııany «qaıta jandandyrý» baǵdarlamasynyń qorytyndy kezeńderiniń biri.

Praımerızge 10 myńǵa jýyq kandıdat qatysty. Olardyń 37%-ti – áıelder, 29%-ti – 35 jasqa deıingi jastar. Bastaýysh partııa uıymdarynan kandıdattardyń 30%-i usynylsa, al 70%-i - ózin-ózi usynýshylar. Kandıdattardyń ortasha jasy – 43 jas. Bul rette partııaishilik saılaýdyń birinshi deńgeıindegi daýys berýge 662 687 partııalyq qatysty.