Prezıdent Toqaev beıneúndeý jasady

Qasym-Jomart Toqaev "Soltústik ekonomıkalyq yntymaqtastyq-2020" halyqaralyq forýmynda beıneúndeý jasady, dep habarlady Aqorda saıty.

Saıt málimetinshe, búgin Seýl qalasynda "COVID-19-dan keıingi jahandyq ózgerister jáne soltústik ekonomıkalyq yntymaqtastyqtyń keleshegi" taqyrybyndaǵy shara bastalǵan.  

"Memleket basshysy Ońtústik Koreıa prezıdenti Mýn Chje In bastamashy bolǵan "Jańa Soltústik saıasat" strategııasyn joǵary baǵalady. Onyń órkendegen, ózara baılanysy myǵym jáne turaqty Eýrazııa qurý kóregen ıdeıasyn quptady.

Toqaev Qazaqstan men Ońtústik Koreıa arasyndaǵy strategııalyq yntymaqtastyqtyń mańyzyn aıta kele, júz myń koreı qaýymdastyǵynyń eki el arasyndaǵy qarym-qatynasqa qosqan úlesin atap ótti" delingen prezıdent resmı saıtynyń habarlamasynda.

– Koreıanyń Qazaqstan ekonomıkasyna jasaǵan ınvestısııasy 7 mıllıard dollardan asty. Jahandyq turaqsyzdyqqa qaramastan, ekijaqty taýar aınalymy artty. Ortalyq Azııanyń barlyq bes eliniń ortaq jalpy ishki ónimniń 70 paıyzy Qazaqstannyń úlesine tıesili. Koreı memleketi jetekshi ınvestorlardyń arasyndaǵy 10-orynǵa ıe. Bul rette, ózara tıimdi yntymaqtastyqty odan ary jalǵastyrýdyń áli de paıdalanylmaǵan úlken áleýeti bar, – dedi Toqaev.

Memleket basshysy álemdegi uzaqqa sozylǵan munaı dáýiriniń aıaqtalyp kele jatqanyn aıtyp, Qazaqstan úshin jan-jaqty, turaqty ekonomıka qurýdyń erekshe mańyzdy ekenin atap ótti.

– Osyǵan baılanysty men jańa ekonomıkalyq baǵyttyń bastamashysy boldym. Bul baǵyt qurylymdyq reformalarmen ǵana emes, sondaı-aq barynsha qarqyndy ári myqty memleket qurýmen baılanysty. Qazaqstan koreı ınvestorlary úshin arnaıy ázirlengen quraldardy usynýǵa ázir. Bul rette, salyq jáne keden artyqshylyqtary, jobalardy qosa qarjylandyrý, eksportty qoldaýdyń ishinara kepildikteri men tetikterin aıtýǵa bolady, – dedi ol.

Sóz sońynda memleket basshysy forým qatysýshylaryna jumystyń tabysty bolýyn, Ońtústik Koreıa prezıdenti men úkimetiniń bastamalaryna sáttilik tiledi.