M.Qul-Muhammed: Zımanovtyń Jeltoqsandaǵy erligin umytpaý kerek

Kelesi jyly akademık, qazaq zań ǵylymyn qalyptastyrǵan tulǵa Salyq Zımanovtyń týǵanyna 100 jyl tolady. Alaıda aıtýly data aldaǵy jyly atalyp ótetin mereıtoılar tizbesinen tys qalǵan. Osyǵan oraı Muhtar Qul-Muhammed bastaǵan bir top senator úkimet basshysynyń atyna depýtattyq saýal joldady.

Saýalda akademıktiń táýelsizdigimizdi zańdyq turǵydan bekitýge sińirgen eńbegi, bilikti de bilimdi zańgerler daıarlaǵan ustazdyq qyzmeti jáne Uly Otan soǵysyndaǵy eren erligi aıtylǵan.

– Salyq Zımanov 1990 jyly Qazaq KSR Joǵarǵy Keńesine depýtat bolyp saılanyp, Komıtet tóraǵasy ári 1990 jyly 25 qazanda qabyldanǵan Qazaq KSR-niń "Memlekettik egemendigi týraly" Deklarasııasynyń jobasyn daıarlaǵan depýtattyq komıssııanyń basshysy boldy. Keıin 1991 jyly 14-16 jeltoqsanda "Qazaqstan Respýblıkasynyń Memlekettik táýelsizdigi týraly" konstıtýsııalyq zańyn qabyldaý barysynda kelisim komıssııasynyń quramyna kirip, tarıhı qujattyń qabyldanýyna zańger depýtat retinde zor úles qosty", – dedi Muhtar Qul-Muhammed.

Sonymen qatar senator akademık Zımanovtyń Jeltoqsan oqıǵasy kezindegi qaısarlyǵyn erekshe atap ótti.

– Aǵa býyn ókilderi qaharman Salyq Zımanovtyń azattyǵymyzǵa jarqyn jol ashqan Jeltoqsan kóterilisinen keıin zııaly qaýymnyń erik-jigerin basý úshin 1986 jyldyń 29 jeltoqsanynda Ulttyq Ǵylym akademııasyna kelgen M.S.Solomensev pen G.V.Kolbınniń aldynda aqyryp teńdik suraǵan aqsaraǵat sózderin de umytqan joq, – dedi senator óz saýalynda.

Shyn máninde, ómir boıy qaıtpas qaısarlyǵynan, prınsıpshildiginen jazbaǵan Salyq Zımanov barsha qazaqtyń qabyrǵasyn qaıystyrǵan qaharly Jeltoqsan oqıǵasy kezinde Máskeýden jedel jetken sol kezdegi KOKP ortalyq komıtetiniń hatshysy surqaı Solomensev pen "qańǵyp kelgen shúregeı" Kolbınniń aldynda qasqaıa qarsy sóz sóılep, jastarymyzdyń is-áreketin qorǵap qana qoımaı, ony ǵylymı turǵydan dáleldegen azamat ekenin umytpaǵan jón.

Búginde bir kezderi Jeltoqsan oqıǵasyna qatysqan jazyqsyz jas ulandardy sottaýǵa, jazalaýǵa, qýdalaýǵa atsalysqandar arasynda ózderin batyr retinde nasıhattap júrgender bar. Al naǵyz batyr – Salyq Zımanov, Safýan Shaımerdenov jáne Juban Moldaǵalıev sııaqty aǵalarymyz.

Osyǵan oraı, akademık Salyq Zımanovtyń ǵasyrlyq mereıtoıyn laıyqty atap ótý úshin: qaharman ǵalymnyń ómiri men shyǵarmashylyǵyna arnalǵan halyqaralyq ǵylymı-praktıkalyq konferensııa, tanym-taǵylymdyq sharalar ótkizý, onyń esimin Atyraý men Almaty qalalarynyń kóshelerine jáne Nur-Sultan qalasyndaǵy jańadan salynǵan mektepterdiń birine berý, týǵan jerinde onyń eńseli eskertkishin ornatý máselesin qarastyrýdy suraımyz", – delingen saýalda.

Biz de senatordyń saýalyn oryndy dep esepteımiz jáne onda aıtylǵan usynystardy tolyq qoldaımyz.