Fransııa Islamǵa qatysty karıkatýradan bas tartpasa, Kadyrov otstavkaǵa ketedi

Fransııa prezıdenti Emmanýel Makron Islam dinine qatysty karıkatýra men syzbalardan bas tartpaıtyny týraly málimdeme jasady. Eger Makron pozısııasyn ózgertpese, Sheshenstan basshysy Ramzan Kadyrov  otstavkaǵa ketýge daıyn ekenin jetkizdi. Bul týraly ru.euronews.com habarlady. 

Kadyrov óziniń telegramm paraqshasynda Makronnyń áreketine qatysty jazba jarııalady. Ol Fransııa basshysyn "musylmandardy qylmys jasaýǵa úgitteıdi" dep narazylyq bildirdi. Sondaı-aq Kadyrov Makrondy dinı shabýyldar men arandatýshylyq áreketterdi  kesh bolmaı turyp toqtatýǵa shaqyrdy.

– Fransýz bıligine saıasatker retinde emes, musylman retinde pikir bildirgenimdi eskerý qajet. Dinimdi sheksiz súıetin jáne qasıetti Quran men Súnnettiń barlyq sharttaryn qatań saqtaıtyn adam retindegi quqyǵymdy eskere otyryp, Makron týraly burynǵy sózderimdi myń ret qaıtalaýǵa daıynmyn. Qajet bolsa, men otstavkaǵa ketýge, azap shegýge nemese óz ómirimdi berýge daıynmyn! Biraq dinsizderdiń dindi mazaq etip otyrǵanyna únsiz qarap otyra almaımyn, – dedi Kadyrov.

Aıta keteıik,  sheteldik BAQ quraldarynyń málimetinshe, ıslamdyq radıkaldy toptyń múshesi mektep oqýshylaryna "sóz erkindigi" sabaǵynda fransýzdyq Charlie Hebdo satıralyq basylymynda jarııalanǵan Muhammed paıǵambardyń karıkatýralaryn kórsetken muǵalimniń basyn kesip tastaǵan. Fransııa prezıdenti bul oqıǵany terrakt dep baǵalyp, sol muǵalimdi  eske alyp, aza tutý rásimine qatysty. Sonda  Makron  sóz sóılep, Fransııa musylmandar keńesimen birge "aǵartýshylyq ıslamdy" qurýǵa kómektesetin uıym qurý kerektigin aıtty. Onyń pikirinshe, bul dindi "sheteldikterdiń yqpalynan bosatyp, meshitterdiń qarjylandyrylýyna baqylaýdy kúsheıtý kerek". Sondaı-aq Makron  karıkatýra men syzbalardan bas tartpaıtynyn basa aıtqan.