Páter, kólik, aqshalaı granttar — Almatyda muǵalimderdi qalaı quttyqtady

Muǵalimderdiń kásibı merekesi qarsańynda Almaty ákimi Baqytjan Saǵyntaev megapolıs pedagogtaryn quttyqtady jáne «Jyl muǵalimi» baıqaýynyń jeńimpazdaryna baǵaly syılyqtar men aqshalaı garnttardy tapsyrdy.

Almaty TA-nyń tikeleı efırinde kórsetilgen sharaǵa pedagog ardagerler, muǵalimder jáne bilim uıymdarynyń basshylary qatysty.

Merekelik rásim barysynda muǵalimder — «Almatynyń jyl muǵalimi» jáne «Almaty qalasy ákiminiń arnaıy granty» qalalyq baıqaýlarynyń, sonymen qatar «Úzdik pedagog» respýblıkalyq baıqaýy qalalyq týrynyń jeńimpazdary ulyqtaldy.

«Almatynyń jyl muǵalimi» jáne «Almaty qalasy ákiminiń arnaıy granty» qalalyq baıqaýlary Almaty ákimi B. Saǵyntaevtyń bastamasy boıynsha ótken jyly alǵash ret uıymdastyrylǵan edi, onyń maqsaty — muǵalim mamandyǵynyń bedelin arttyrý, ozyq pedagogıkalyq tájirıbeni keńinen taratý.

«Jyl muǵalimi» qalalyq baıqaýynyń Gran-prı júldegeri №133 mekteptiń oqytýshysy Maqpal Shúkeevaǵa 2 bólmeli páterdiń kilti, al 1 oryndy jeńip alǵan №140 mektep-gımnazııanyń oqytýshysy Dáýren Saǵynǵalıevke kólik kilti tapsyryldy. Qalǵan jeńimpazdarǵa aqshalaı júldeler men granttar berildi. Birqatar muǵalimder Bilim jáne ǵylym mınıstrliginiń vedomstvalyq marapattarymen atalyp ótildi.

Qalanyń pedagogıkalyq qaýymdastyǵyn quttyqtaǵan Almaty ákimi B. Saǵyntaev ustazdardyń eń mártebeli mıssııa — óskeleń urpaqqa tárbıe men bilim beretinderin atap ótti.

«Muǵalimderge zor jaýapkershilik júktelip otyr, óıtkeni bolashaqta elimizde qandaı urpaqtyń ómir súrip, eńbek etetini ustazdarǵa tikeleı baılanysty. Sondyqtan, tek Muǵalim ǵana bilim berýdegi basty keıipker bolyp tabylady», — dedi qala ákimi Baqytjan Saǵyntaev.

Qala ákimi bilim júıesin damytý sharalary, bilim berýdiń jańa mekemelerin salý, jas mamandarǵa qoldaý kórsetý týraly da aıtyp ótti. Mysaly, aǵymdaǵy jyly qala mektepterinde ózderiniń eńbek joldaryn bastaǵan jas muǵalimderge materıaldyq kómek retinde birrettik tólem berý praktıkasy jalǵasatyn bolady. Qazan aıynda jalpy somasy 27 mln teńgeden asatyn tólemdi 549 jas muǵalim aldy.

Aıta keterligi, qala muǵalimderiniń turǵyn úı jaǵdaıyn jaqsartý máselesine aıryqsha nazar aýdarylady. Búgingi kúni jeńildetilgen nesıe beretin «Almaty jastary 3.0» qalalyq baǵdarlama aıasynda 187 jas muǵalim baspanaly boldy.

Almatynyń bilim júıesinde 32 myńnan astam pedagog bar, olardyń 500-den astamy aǵymdaǵy jyly ózderiniń alǵashqy eńbek joldaryn bastaǵan jas mamandar.