Taldyqorǵan qalasynda Bolat Nazarbaevtyń «Salıqaly urpaq» qoǵamdyq qorynyń qarajatyna salynǵan jańa meshittiń ashylý rásimi ótti. Sharaǵa oblys ákimi Amandyq Batalov, belgili mesenat Bolat Nazarbaev, Qazaqstan Musylmandary dinı basqarmasynyń tóraǵasy, bas múftı Naýryzbaı qajy Taǵanuly qatysty.

"Táýbe" meshitiniń ashylýynda sóz alǵan oblys ákimi Amandyq Batalov:

 – Búgin jer jannaty Jetisýdyń ortalyǵy Taldyqorǵan qalasynda sáýleti asqaq, keskini keremet jańa meshittiń ashylýyna kýá bolyp otyrmyz. О́zderińiz jaqsy bilesizder, osydan jıyrma jyl buryn keleshektiń qandaı bolatynyn bilgen Elbasy batyl sheshim qabyldap, oblys ortalyǵyn Taldyqorǵanǵa aýystyrdy. Sodan beri munda kóptegen ıgilikti ister qolǵa alynyp, kórgen jandar tańǵalarlyq sharýalar atqaryldy. Onyń bári halyq úshin, – dep halyqtyń shynaıy peıili, ystyq yqylasy jaqsylyqqa jeteleıtinin atap ótti.

 – О́mirdiń kilti birinshi ımandylyqta, ekinshi bilimde. Adam eń aldymen Jaratqan Alla Taǵalanyń joly – syılastyq jolymen júrýi kerek. Sonda bolashaqtyń baǵyty jarqyn, keleshegi kemel bolady. Mynadaı keremet meshittiń ashylýyna qýanyp otyrmyn. Meshittiń úlken joldyń boıynda ornalasýy qalanyń kórkine kórik qosyp, kórgen jannyń kóńilin qýanyshqa keneltedi. Elbasy bastap bergen «Rýhanı jańǵyrý» baǵdarlamasy aıasynda kópshilik elimiz ben jerimizdiń, memleketimizdiń tynyshtyǵy úshin, turaqtylyǵy úshin tilek tilep, duǵa jasaıdy dep senemin. Jaratqan Allanyń jerdegi úıi meshittiń ashylýyna zor kómek jasaǵan jandardyń otbasyna amandyq, esendik berip, qýanysh ákelsin! «Salıhaly urpaq» qaıyrymdylyq qorynyń bastaýynda turǵan Bolat Ábishulyna Jetisý jurtshylyǵynyń atynan  rahmet aıtqym keledi. Elimiz aman, jerimiz bútin, aspanymyz ashyq bolsyn! Árqashan osyndaı jaqsylyqta kezdeseıik!

Jetisý jurty atynan oblystyq ardagerler keńesiniń tóraǵasy Ermek Kelemseıit kezekpen sóz alyp, jınalǵan qaýymǵa júrekjardy tilegin arnady. Tusaýkeser rásimi jasalǵan soń kópshiliktiń aldynda meshittiń ımamdyǵyn Qazaqstan Musylmandary dinı basqarmasynyń Taldyqorǵan óńirlik ókil ımamynyń naıby Kerimbek Dáýitovke arnaıy buıryqpen ótkizgen Naýryzbaı qajy Taǵanuly meshitte sálem namazyn oqyp, duǵa jasady.

         Saltanatty ashylýdan soń oblystyq aqsaqaldar keńesiniń músheleri jáne Qazaqstan musylmandary dinı basqarmasynyń Taldyqorǵan óńirindegi ımamdarymen «Islam qundylyqtaryn saqtaýdaǵy aqsaqaldar men aǵa býynnyń yqpaly» atty kezdesý ótkizgen bas múftı óskeleń urpaqtyń tárbıesine qatysty máselelerdi talqylap, elimizdegi yntymaq pen birliktiń ómirsheńdigi jaıly salıhaly oıyn ortaǵa saldy.

 «Táýbe» qalalyq meshiti úsh myńǵa jýyq adamdy qabyldaı alady. Zamanaýı arhıtektýralyq sheshimder qabyldanǵan meshittiń qurylysy erekshe salynǵan. Eki qabattan turatyn «Táýbe» meshitinde bıiktigi 40 metr bolatyn eki munara bar. Kúmbezdiń dıametri – 18 metr, bıiktigi – 10 metr. Meshitte namaz oqý úshin qolaıly jaǵdaı jasalǵan. Ǵımaratta kondısııalaý júıesi qoldanylyp, barlyq namaz oqý zaldarynda «jyly eden» júıesi engizilgen. Qaýipsizdikti saqtap, respıratorlyq ınfeksııasynyń taralýynyń aldyn-alý maqsatynda meshitte sanıtarııalyq-epıdemıologııalyq talaptar saqtalǵan. «Meshit – qalanyń damýynyń aıqyn úlgisi. «Salıqaly urpaq» qoǵamdyq qory dindar jáne muqtaj jandarǵa erekshe kóńil bóledi. Qordy 2016 jyly Bolat Nazarbaev qurǵan edi. Osy ýaqytqa deıin onyń qoldaýymen Almaty oblysynda 350 orynǵa arnalǵan meshit, Almaty qalasynda 1 000 adamǵa arnalǵan meshit salyndy. 2020 jyly qor koronavırýsqa qarsy kúres úshin 150 mıllıon teńge bóldi. Túrkistan oblysynyń Maqtaral aýdanynda sý tasqynynan zardap shekken otbasylarǵa jıyrma úı salyp berdi. Alǵashqy kúni-aq japa shekken jandarǵa 20 tonna gýmanıtarlyq júk jetkizdi. Az qamtylǵan otbasylardyń 20 balasy jazǵy lagerde demaldy. Sonymen qatar, Almaty qalasy men Almaty oblysynyń az qamtylǵan otbasylardyń oqýshylaryn qoldaý maqsatynda jeke qarajatynan qashyqtan bilim alý úshin 1 000 noýtbýk úlestirdi.

«Qaıyr-sadaqa retinde ne berseńder de ózderiń úshin (jaqsy bolady). Ne berseńder de, tek Allanyń razylyǵy úshin berýleriń kerek. Izgilik jolynda ne jumsasańdar da, sonyń bári ózderińe tolyq qaıtarylady jáne sender ádiletsizdikke ushyramaısyńdar (ıaǵnı, saýaptaryńdy tolyq alasyńdar)», – deıdi qasıetti  Quran Kárimde.

Árbir ımandy jannyń osy aıattan alatyn ǵıbraty mol. Qoǵamda da  kúndelikti jıi qoldanylyp otyratyn dana sózderdiń biri – «Keń bolsań, kem bolmaısyń». Mánine úńilseńiz, adam boıyndaǵy jomarttyq, qaıyrymdylyq qasıetterdiń qanshalyqty mańyzdy ekenin meńzep otyr. Turmysy tómen otbasy múshelerine kómek qolyn sozyp, qaıyrymdylyq sharalaryn uıymdastyryp júrgen qordyń jumysy kópke úlgi.

Shara barysynda Taldyqorǵan qalasyna arnaıy issaparmen kelgen Qazaqstan Musylmandary dinı basqarmasynyń tóraǵasy, bas múftı Naýryzbaı qajy Taǵanuly jańa ashylǵan oblystyq ınfeksııalyq aýrýhana ujymymen kezdesip, pandemııa kezinde kún-tún demeı halyqtyń densaýlyǵy úshin janushyra eńbektengen Kúláıhan Jumashqyzy, Saıra Dosjanqyzy, Aıgúl Tumarbaıqyzy syndy dárigerlerge Alǵys hat jáne aýrýhanaǵa 17 pýlsometr men 1 ottegi konsentratyn tabystady. Paıdalanýǵa jaqynda berilgen Stýdentter jataqhanasynda erikti jastarmen kezdesip, óskeleń urpaqtyń yqylas-peıiline qanyqqan bas múftı oblystyq Qazaqstan halqy Assambleıasynyń músheleri, etnomádenı birlestikterdiń belsendilerimen áńgime dúken qurdy. Elimizdegi yntymaq pen birliktiń bastaýynda Qazaqstan Respýblıkasynyń sarabdal saıasaty jatqanyn jetkizgen Naýryzbaı qajyny kópshilikke oblys ákiminiń orynbasary Rýstam Álıuly tanystyrdy.

         Adamǵa jaqsylyq jasaý, qaıyrymdylyq kórsetý –  halqymyzdyń maqtan eterlik dástúrleriniń biri. Bir-birine kómek kórsetý arqyly baýyrmaldyq tanytady. «Meıirim tanytpaǵan jannyń meıirimge bólenbesi anyq». Al álimsaqtan Quranǵa amal edip, hadısti saltyndaı kórgen tekti eldiń asyl qasıetteri jaıly sóz qozǵaýdyń ózi shabytyńdy sharyqtata túsetini bar. «Jasasań qaıyr, qaryz dep aıtpa jarqynym, qaryz ǵyp berseń kerek te emes altynyń», – dep aqıyq aqyn Muqaǵalı jyrlaǵandaı, arda jurt jaqsylyqty aqy alý úshin jasamaǵan. Ony taraý da taraý tarıhtan aıqyn ańǵaramyz. Qashan da qaıyrym jasaý, meıirim tanytýǵa quraq ushatyn sol tekti halyq búgingi sharada da baba jolyn jalǵady. Taldyqorǵan qalalyq ortalyq «Iman» meshitinde bastalǵan respýblıkalyq «Júrekke jylý» qaıyrymdylyq kerýenimen 11 tonna azyq-túlik, 10 tonna kómir tıegen júk kólikteriniń saparyna aqjol tilegen qurmetti qonaqtar Qazaqstan Musylmandary dinı basqarmasynyń 30 jyldyq mereıtoıyna oraı «El úlesi páterge» jobasy aıasynda kópbalaly 10 otbasyǵa úıdiń kiltin tabys etti. Atap aıtqanda, Jarkent qalasynda 7 otbasy, Sarqan qalasynda 1 otbasy, Aqsý aýdanynda 1 otbasy, Alakól aýdanynda 1 otbasy baspanaly bolyp, qýanyshqa keneldi. Jergilikti janashyr azamattardyń birlesýimen alynǵan úılerge 25 mıllıon teńge jumsalǵan.

 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir