Áleýmettik jelide Atyraý oblysy Qarabatan aýylyndaǵy zaýytqa bir top Qytaı azamattarynyń kelip jatqan vıdeosy tarady. Beınejazbaǵa qatysty Atyraý oblysy boıynsha memlekettik eńbek ınspeksııasy basqarmasynyń basshysy Igilik Áýbákirov túsinik berdi, dep habarlady Aq Jaıyq óńirlik gazeti.

Oblystyń bas eńbek ınspektorynyń aıtýynsha, 22 qazanda "CNCEC" (China National Chemical Enginnering Co) kompanııasynyń 124 qytaılyq mamany ıntegrasııalanǵan gaz-hımııa kesheniniń I fazasy jobasynda jumys isteý úshin Nur-Sultannan Atyraýǵa charterlik reıspen kelgen.

Keshki ýaqytta kelgen qytaılyq jumysshylar CNCEC vahtalyq qalashyǵyna qonystandy. Dál osy sátti qazaqstandyq qyzmetkerler vıdeoǵa túsirgen.

– Atalǵan fakti boıynsha CNCEC fılıaly jáne KPI JShS (jobanyń tapsyrys berýshisi) qaýipsizdik qyzmetiniń qyzmetkerleri beınejazbany túsirgen adamdarmen sóılesti. Olar beınejazbany túsirgende aram oıymyz bolǵan joq degen, – dedi Igilik Áýbákirov.

Eńbek ınspeksııasy basqarmasy qytaılyq azamattar Qazaqstanǵa iskerlik vıza boıynsha kelgenin jáne sheteldik jumys kúshin tartýǵa ruqsat alý boıynsha sanatqa jatpaıtynyn atap ótti.

Integrasııalanǵan gaz-hımııa kesheniniń I kezeńi Qytaı Damý Bankiniń aqshasyna salynyp jatqan Qarabatandaǵy polıpropılen óndiretin zaýyt. Joba merdigeri CNCEC kompanııasy.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir