Mamın prezıdentke eldegi epıdemıologııalyq jaǵdaıdy baıandady

Premer-mınıstr Asqar Mamın memleket basshysy Qasym-Jomart Toqaevqa sanıtarlyq-epıdemıologııalyq jaǵdaıdy turaqtandyrý úshin qabyldanyp jatqan sharalar jáne eldiń áleýmettik-ekonomıkalyq damýynyń ózekti máseleleri týraly aıtty. Bul týraly Aqorda saıty málimdedi.

Asqar Mamın prezıdentke eldegi sanıtarlyq-epıdemıologııalyq jaǵdaıdyń baqylaýda ekenin jetkizdi.

Sondaı-aq koronavırýs indetiniń jańa tolqynyna daıyndyq jumystary aıasynda júzege asyrylyp jatqan sharalar týraly da málimet berdi. Atap aıtqanda medısınalyq uıymdar men halyqty dári-dármekpen qamtamasyz etý, emdeý nysandaryna jasandy tynys berý apparattary men ottegi konsentrattaryn jetkizý, aımaqtardy jyljymaly dıagnostıkalyq keshendermen, sıfrlyq rentgen-apparattarmen, mobıldi toptarmen jáne jedel medısınalyq kómek kórsetý kólikterimen jabdyqtaý jumystary júrgizilip jatqanyn aıtty.

Onyń aıtýynsha, qazirgi ýaqytta 13 aımaqtyń 10-ynda modýldik juqpaly aýrýhanalardyń qurylysy aıaqtalǵan, qalǵan 3 nysan osy jyldyń qarasha aıynyń sońyna deıin paıdalanýǵa beriledi.

Sonymen qatar mınıstr Toqaevqa respýblıkalyq jáne aımaqtyq turaqtandyrý qorlarynyń qurylǵany jáne densaýlyq saqtaý júıesine arnalǵan 91 túrli dári-dármek pen jeke qorǵanysh quraldarynyń eki aılyq qory jasaqtalǵany týraly atap ótti.

Onyń sózinshe, dári-dármekterdiń tapshylyǵyn boldyrmaý úshin dárihanalardyń bólshek saýda júıesinde suranysqa ıe 33-ten astam preparat qory qosymsha jasaqtalýda. 

Asqar Mamın Qasym-Jomart Toqaevqa PTR test synamalaryn alý kólemin arttyrý jumystary týraly  da aıtty.

Onyń sózinshe, zerthanalar sany 124-ke deıin kóbeıip, testileý qýaty táýligine 66 myńǵa deıin jetti. Bul rette, turǵyndardy test synamalarymen qamtý 2,5 ese ulǵaıtylyp, PTR test synamalaryn alý quny tómendetildi.

Budan bólek, Asqar Mamın prezıdentke shekaralyq ótkizý beketterinde, sondaı-aq, kóliktiń barlyq túrleri men ınfraqurylymdarynda sanıtarlyq-epıdemıologııalyq baqylaýdyń kúsheıtilgeni týraly baıandady.

Sonymen qatar óńirlerdegi bıznes sýbektileriniń jumysy birtindep qaıta qalpyna keltirilip jatqanyn jetkizdi.

Prezıdent koronavırýs pandemııasynyń aldaǵy aılardaǵy taralýyna qatysty Dúnıejúzilik densaýlyq saqtaý uıymynyń pessımıstik boljamdaryn eskerip, Úkimet belgilegen jospardyń múltiksiz oryndalýynyń mańyzdy ekenin atap ótti.