Foto: Máýlen Áshimbaevtyń facebook paraqshasynan

QR senatynyń tóraǵasy Máýlen Áshimbaev Qazaqstannyń halyq jazýshysy Ábdijámil Nurpeıisov jatqan aýrýhanaǵa arnaıy baryp, qalamgerdiń kóńilin surady. Bul týraly ol facebook paraqshasynda habarlady.
 
"Ábekeńniń densaýlyǵy jaman emes. Degenmen, sońǵy kezde bolǵan qaıǵyly jaǵdaı aǵamyzǵa aýyr tıgeni anyq. Ajar apamyzdyń jatqan jeri jaryq, topyraǵy torqa bolsyn.
 
Osydan birneshe kún buryn aǵamyz 96 jasqa toldy. Jalpy, Ábdijámil aǵa maǵan qajyr-qaırat pen erik-jigerdiń sımvolyndaı kórinedi. HH ǵasyrda halqymyzdyń basynan nebir qıyndyqtar ótti. Sonyń bári Ábekeńe de az zardabyn tıgizgen joq. Soǵys jyldarynda aǵamyz qan maıdannyń qaq ortasynda júrdi. Odan keıingi qıyndyqtardy da kórdi.
 
Qaısarlyq pen qajyrlyqtyń ozyq úlgisin kórsetip, ádebıetke aıanbaı eńbek etti. Mádenıetimiz ben rýhanııatymyzǵa ólsheýsiz úles qosty. Qazaq ádebıetiniń naǵyz klassıgine aınaldy.
 
Keıde Ábdijámil aǵaǵa qarap, halqymyzdyń ótken ǵasyrdaǵy shejiresin kórgendeı bolamyn. Shyn máninde, Ábekeńniń ózi de, sózi de, jazǵan dúnıesi de tarıh.
 
Sońyna mol mura qaldyryp, ǵasyrmen, ýaqytpen óz esebin tapqan, qazaq ádebıetiniń alyby ári abyzy bolǵan Ábekeńe myqty densaýlyq, amandyq tileımiz.
 
Jasaı berińiz, ardaqty Ábe!" delingen senat tóraǵasynyń jazbasynda.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir