Foto: Qýyrshaq teatrynyń baspasóz hatshysy

Búgingi tańda 85 jyldyq tarıhy bar ónerdiń qarashańyraǵy Almaty Memlekettik qýyrshaq teatry 22 qazan kúni saltanatty túrde kezekti 86-maýsymyn ashady. Búldirshin qııalynyń shamshyraǵyna aınalǵan óner ordasy jańa maýsym shymyldyǵyn jas kórermenderdi meıirimdilikke, dostyqqa, eńbekqorlyqqa, tereń túsinik pen keshirimdilikke jeteleıtin rejısser Anton Zaısev sahnalaǵan orys halyq ertegisi «Úıshik» qoıylymymen ashpaq.

Sondaı-aq, saǵat 17.00-de teatr ujymy asa kórnekti sazger Shámshi Qaldaıaqovtyń 90 jyldyq mereıtoıyna oraı rejısser Erkebulan Qabdyl sahnalaǵan «О́mir – О́zen» mýzykalyq teatrlandyrylǵan qoıylymynyń premerasyn kórermen nazaryna usynady. Ǵajaıyp sazdylyǵy, kórkem tabıǵaty, lırıkalyq álemi, nazdylyq sıpatymen mıllıondaǵan tyńdarmandardyń júreginen ardaqty oryn alǵan kórnekti kompozıtor, qazaq estradasynyń negizin salýshy – Shámshi Qaldaıaqov ánderin spektakl rejısseri Erkebulan Qabdyl búgingi kún kórermenderine laıyqtap, talant tabıǵatyn aıqyndaıtyn ózgeshe qyrlaryn názik elementtermen tolyqtyra, jańasha baǵytta kórsetýdi basty nazarǵa alǵan.

85-maýsym jetistikteri:

Almaty Memlekettik qýyrshaq teatry búgingi tańda ár baǵytta, ár janrda jumys jasap keledi. 85-maýsym da teatr úshin erekshe shyǵarmashylyqqa toly jyldyń biri boldy. О́ner ordasy kezekti eńbek demalysynda 84-shi maýsymyn jappastan úzdiksiz jumys atqaryp, óz kórermenderin kúndelikti qoıylymdarymen qaýyshtyrdy.

Sondaı-aq karantın ýaqytynda teatr ujymy onlaın formatta jumys jasady. Kórermenderge teatrdyń YouTube kanaly arqyly sapaly da maǵynaly qoıylymdar men mańyzdy da paıdaly jobalar usyndy. Baldyrǵandarymyzdyń baldaı kúlkileri men tańdaı qaǵar tańdanystaryn týǵyzatyn qarapaıym qýyrshaq arqyly ǵana búkil bir sheksiz álemdi jasap shyǵaryp, jan saraıyńa sáýle sebetin qasıetti orda kishkentaı kórermenderge arnalǵan «Balalarǵa bazarlyq», «Qaıyrly tún, balaqaı!», «Qýyrshaqty saǵynǵan qulynshaq», «Úıren de, jıren», «Tańǵy jattyǵý jasaıyq», t.b. aıdarlarmen jáne kásibı qýyrshaq álemin tanytatyn «Teatrtanýshylar taldaýy», «Onlaın suhbat» syndy aqparattyq-tanymdyq aıdarlar arqyly oqyrmandarmen tyǵyz baılanysta jumys jasady.

 Maýsym barysynda tómende kórsetilgen halyqaralyq teatr festıvalderine qatysty:

  • 2019 jyldyń 19-27 qazan aralyǵynda Túrkııa Respýblıkasy, Ankara qalasynda ótken V Halyqaralyq «Ankara» qýyrshaq teatrlar festıvaline  «Ana júregi» qoıylymymen qatysty;
  • 2019 jyldyń 30 qazan – 4 qarasha kúnderi aralyǵynda Kókshetaý qalasynda ótken «TeART-Kókshe» I Halyqaralyq teatr festıvaline «Ana júregi» qoıylymymen óner kórsetti;
  • 2019 jyldyń 15-18 jeltoqsan kúnderi aralyǵynda Qaraǵandy qalasynda ótken «Kýklıandııa» I Halyqaralyq qýyrshaq teatrlar festıvaline «Qýyrshaq dýman» qoıylymymen qatysty;
  • 2020 jyldyń aqpan aıynyń 13 kúni teatr ujymy rejısser D.Býrman sahnalaǵan «Aıko jáne Strashko» qoıylymy úshin Halyqaralyq teatr synshylary birlestiginiń «Synshylar júldesimen» marapattaldy;
  • Sonymen qatar, 2020 jyldyń qazan aıynyń 17-25 kúnderi aralyǵynda Túrkııa Respýblıkasy, Ankara qalasynda onlaın formatta ótken VI Halyqaralyq «Ankara» qýyrshaq teatrlar festıvaline  «Romeo men Djýletta» qoıylymymen qatysyp, baq synaýda. 

Festıvalder barysynda teatr ujymy festıval qatysýshylarymen jan-jaqty tájirıbe almasyp, búgingi kúnde balalar taqyrybynda jazylǵan pesalardy talqylap, kásibı teatr mamandary uıymdastyrǵan sheberlik-saǵattaryna qatysty.

Sondaı-aq, 2019 jyldyń qarasha aıynyń 14-15 kúnderi aralyǵynda teatr ujymy qazaqtyń uly aqyny, aǵartýshysy Abaı Qunanbaıulynyń 175 jyldyq mereıtoıyna oraı  tálimi bólek, máni zor «Men bir jumbaq adammyn... Abaı» (rej.: A.Zaısev) qoıylymynyń premerasy kórermen nazaryna usynyldy. Oıly ortany tolǵandyryp júrgen oqıǵalardy qýyrshaq beınesinde kórsetip, zamanaýı teatr stılıstıkasynda sahnalanatyn sımvolıkalyq sheshimderge toly spektakl fantasmagorııa janrynda jol tartty. Maqsat – Abaı taqyrybyn kóterý ǵana emes, sol arqyly aqyndyqpen ushtalyp danalyqqa ulasqan kemeńgerdiń oı-tolǵamdaryn keńinen dáripteý.

Baldyrǵandardyń jan-jaqty azamat bolyp qalyptasýyna óz úlesin qosyp kele jatqan respýblıka tarıhyndaǵy tuńǵysh qýyrshaq teatry jeltoqsan aıynyń 5-6 kúnderi aralyǵynda balalarǵa arnalǵan «Aqqutan men qaraqshy» ertegisiniń jelisimen «Aıko men strashko» (rej.: D.Býrman) ertegisiniń premerasyn kórermen nazaryna usyndy.

Teatr ujymy jeltoqsan aıynyń 21 men 2020 jyldyń 7 qańtary aralyǵynda kórermen nazaryna qazaq jáne orys tilderinde balalarǵa  arnalǵan «Qupııaǵa toly ǵajaıyp – 2020» (rej.: E.Qabdyl, R.Janyamanov) atty jańa jyldyq dýmandy shoý baǵdarlamasyn usyndy.

Jeltoqsan aıynyń 17 kúni Qazaqstan Respýblıkasynyń Mádenıet jáne sport mınıstrligi Qazaqstan teatrlar assosıasııasynyń uıymdastyrýymen «Sahnager – 2019» Ulttyq Teatr syılyǵynyń saltanatty marapattaý keshin ótkizdi. Aıtýly teatr báıgesinde QR mádenıet qaıratkeri, Memlekettik qýyrshaq teatrynyń dırektory T.Esenalıev «Úzdik teatr menedjeri» júldesine, aktırsa A.Baıyrbekova «Úmit» júldesine ıe boldy.

86 maýsymda óner ordasy qazaq halyq ertegisi «Er Tóstik», Sharl Perronyń «Kúlshe qyz» jáne Ýılıam Shekspırdiń «Makbet» týyndylaryn sahnalaýdy josparlaýda. 

Qýyrshaq teatrynyń ujymy Almaty qalasynyń baldyrǵandary men qala qonaqtaryn ǵajaıypqa toly qýyrshaqtar álemine birge saıahat jasap, kóńil perdesin ásem kúıge bóleý úshin repertýardaǵy súıikti keıipkerlerimen qaýyshýǵa shaqyrady!

Gúlim KО́PBAIQYZY

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir