Jezqazǵanda ánshi Qýandyq Rahymnyń toıyn uıymdastyrǵandar jazalanady

Jezqazǵanda 19 qazan kúni toı jasaǵandar men meıramhana ıesi jazalanady, dep habarlady Tengrinews.kz saıty.

Saıt málimetinshe, 19 qazanda Jezqazǵanda qazaqstandyq ánshi Qýandyq Rahymnyń úılený toıy týraly málimet tarady. Sharaǵa ánshi men onyń qalyńdyǵynyń jaqyndary ǵana emes, áriptesteri de kelgen. Olardyń qatarynda Tóreǵalı Tóreáli, Dıdar Qamıev, Nurbolat Abdýllın jáne basqalary bar.

Qaraǵandy oblysy taýarlar men qyzmetterdiń sapasy men qaýipsizdigin baqylaý departamenti baspasóz qyzmetiniń resmı ókili Aıgúl Shatekova toıdyń ıesi men meıramhana ıesi jazaǵa tartylatynyn aıtty.

– Jezqazǵan qalalyq Taýarlar men qyzmetterdiń sapasy men qaýipsizdigin baqylaý basqarmasy 19 qazanda "Ulytaý" meıramhanasynda júzge jýyq adam qatysqan úılený toıy ótkenin habarlaıdy. Materıal Jezqazǵan qalasynyń polısııa basqarmasynyń esep kitapshasyna tirkelgen. Jeke kásipkerik ıesi men is-sharanyń ıesi jaýapkershilikke tartylady, – dedi ol.