Toqaev bas prokýrorǵa tapsyrma berdi

Memleket basshysy Qasym-Jomart Toqaev bas prokýror Ǵızat Nurdáýletovti qabyldady, dep habarlady Aqorda saıty.

Saıt málimetinshe, prezıdent Toqaevqa prokýratýra organdary qyzmetiniń basym baǵyttary boıynsha atqarylǵan jumystarynyń qorytyndylary týraly esep berilgen.

"Ǵızat Nurdáýletov Qazaqstan prezıdentiniń qylmyspen kúresti kúsheıtý, quqyq qorǵaý jáne ózge de organdardyń quqyqtyq tártipti qamtamasyz etý qyzmetin úılestirý jóninde júktegen tapsyrmalarynyń oryndalý barysy týraly baıandady. Onyń aıtýynsha, ótken kezeńde elimizde qylmys kólemi úsh esege jýyq azaıǵan. Urlyq, qaraqshylyq shabýyldar, tonaý jáne buzaqylyq qylmystary eki ese az tirkelgen.

Qazaqstan Prezıdentine zańdylyqty saqtaýdy qadaǵalaý barysynda prokýrorlar sotqa deıingi tergeý isi boıynsha 63 tulǵaǵa qatysty negizsiz qylmystyq qýdalaýdyń toqtatylǵany, sondaı-aq, tergeý merzimin toqtatý jáne keıinge shegerý jónindegi 17 myń zańsyz qaýlynyń kúshin joıǵany týraly málimet berildi" delingen habarlamada.

Sondaı-aq memleket basshysyna bıznesti qorǵaý jáne baqylaýshy organdar tarapynan kásipkerlik qyzmetke zańsyz kedergi keltirýdiń jolyn kesý jumystary týraly baıandaldy.