Kópten kórinbeı ketken aıtysker aqyn Rınat Zaıtov birneshe aptadan beri áleýmettik jelide belsendi. Youtube arnasynda birneshe baǵdarlama shyǵaratynyn aıtqan ol búginde alǵashqy túsirilimderin jarııalap ta úlgerdi. Aqyn Qamshy tilshisine kórinbeı ketýiniń sebebi, jańa jobasy, "NurOtan" partııasynyń qataryna qandaı jaǵdaıda kirýge ázir ekeni jóninde aıtyp berdi.

Rınat Zaıtov suhbattarǵa kelispeı, kózden tasa júrgenniń sebebin bastap jatqan jańa jobaǵa baılanysty sharýanyń qaýyrt bolýymen túsindirdi.

– Jobany ázirleý aıasynda kóp jumys isteý kerek boldy. Onyń ıdeıasy, daıyndyq kezeńi, túsirilimder taǵysyn taǵy degendeı. Jobany iske asyrý úshin kishigirim qarjy kerek. Sony izdeý jolynda júrdik. Munyń bári eńbek, bári jumys. Sosyn "aıdaǵanyń bes eshki, ysqyryǵyń jer jarady" degendeı kóringen jerge baryp "men búıtkeli jatyrmyn" dep aıta bergendi qup kórmedim. Suhbat bermeı ketýim jýrnalısterdiń Dımash jaıly qaıta-qaıta suraıtynymen baılanysty. Ol ótken, ketken, jabyq taqyryp qoı. Ony qaıta-qaıta qazbalaǵannan ne paıda?! Ol taqyryp maǵan qazir qyzyq emes, –  deıdi ol.

Aıtyskerdiń aıtýynsha, youtube jobalardy qolǵa alyp jatqandaǵy maqsat – qazaqqa tálim-tárbıe beretin, oı salatyn dúnıeler usyný. Baǵdarlamalarynda ultarazdyqty týdyratyn, el ishine iritki salatyn áńgimelerge jol berilmeıdi. Basqasynyń bárin aıtýǵa ázir.

Sondaı-aq aqyn sońǵy suhbattarynyń birinde "eger shaqyrsa, NurOtan partııasyna da barýǵa daıynmyn" degen sózine túsinik berdi.

 

– Eger eldiń sózin sóıleýge múmkindik beretin jer bolsa, men NurOtan-ǵa barýǵa ázirmin. Maǵan óz oıymdy aıtatyn jer bolsa, boldy. Belgili bir partııa belgili bir saıasat ustanady degenge senbeımin. Bizdegi partııalardyń bári tek bir baǵyt ustanady. Bul jerdegi basty másele – sol partııalardyń ishindegi adamdardyń ózgerýinde. Mine, solar ózgerýi kerek, – dep atap ótti aqyn.

 

Zaıtov bılik partııasyna ótken jaǵdaıda aýzy býylyp qalmaıtynyn, partııaǵa eldik múdde úshin ǵana baratynyn, mánsap ataýlyǵa qyzyqpaıtynyn jetkizdi. 

 

– Aýzym býylmaıdy. Ary ketse shyǵaryp jiberer (partııadan – red.). Partııaǵa "kreslo" úshin barmaımyn. Men bılikke qyzyqsam, baıaǵyda bir jerge otyryp alatyn edim, ondaı múmkindik bolmady dep aıtpaımyn, –  deıdi ol.

 

Onyń pikirinshe, ultty, eldi oılaıtyn azamat, eldiń sózin joǵaryǵa jetkizý úshin kez kelgen amalmen bılikke barýy kerek.

– Biz barlyǵymyz, ultty oılaıtyn, eldi oılaıtyn azamattar kez kelgen tesik arqyly bılikke qazir barmasaq, qazirgi tańda ol jaqqa baryp jatqan adamdardyń qarasy qorqynyshty. Al endi sol jerge jetý úshin adamdardy kóshege alyp shyqsam, ózgeris bolmaıdy. Sebebi joǵaryda zań bar, – dedi Zaıtov.

2019 jyly prezıdent saılaýynan keıin "zańdy jattap, partııa ashýdyń joldaryn qarastyramyn" degen ol qazirgi kezde partııa qurýdan nátıje shyqpaıdy degen pikirde.

– Partııa qurýdyń nátıjesi bolmaıdy. Men túsindirýden jalyqtym. Kez kelgen saıası qadam jaǵdaıǵa baılanysty jasalady. Mysaly, erteń partııa ashýǵa múmkinshilik berilse, nege qurmasqa? Biraq yryldasyp, 47 partııa quryp alǵansha, bar partııalar mámilege kelip, sonyń ishine ult dep sóıleıtin adamdardy, bir-birimen yryldasyp júrgenderdi kirgizý kerek. Meniń oıym bireý ǵana – halyqtyń sózin joǵary jaqqa jetkizý. Qaı jaq arqyly jetedi maǵan ol qyzyq emes, tek sony aıtatyn múmkindik berse boldy. Men máselen prezıdent, premer-mınıstr halyqtyń aýyr jaǵdaıyn kórip otyr degenge senbeımin. Olar júrgen jerde bárin jyltyratyp qoıady ǵoı. Bálkim, sol úshin kóp nárseni bilmeıtin shyǵar. Men sol úmitpen aıtqym keledi. Meniń taqqa, ıa bolmasa bılikke umtylǵan dymym da joq. Maǵan Toqaevtyń aldynda 15 mınýt sóıleýge múmkindik berse boldy. Sosyn men ketip, dombyramdy ustap, toıdyń aınalasynda betasharymdy aıtyp júre beremin, – dedi aqyn.

Zaıtov partııa quramyn degen málimdemesi emosııamen aıtylmaǵanynyn, al qazirgi bastamalary popýlızm emes ekenin atap ótti.

– Qazir halyqty bir ósekpen jyndy qylyp jiberýge bolatynyn men túsinip otyrmyn. Biraq men popýlızmdi qýalamaımyn. Men ata-babalarymyz tatý-tátti ómir súrgeni sekildi bizde de sol sııaqty bolsa deımin. Qazir aınaladaǵylar bir-birimen qatty yryldasyp jatyr. Solardy tatýlastyrmasa, arty jaqsylyqqa aparmaıdy, – dep sózin túıindedi Rınat Zaıtov.
Ilmek sózder: rınat zaıtov suhbat

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir