Qaıyrymdy qalanyń ınspektorlary men eriktileri

Almaty qalasynyń Jetisý aýdanynyń probasııalyq qyzmetinde 396 adam tirkeýde tur. Solardyń biri – Maral (aty-jóni óz ótinishi boıynsha ózgertildi) esimdi kelinshek. «Súrinbeıtin tuıaq joq» demek babalarymyz aıtpaqshy, Maral da biraz jyldar buryn zańnan attap, jaza basqan edi. Kez kelgen sotty bolǵan kisiler sııaqty ol da túzeý mekemesinde jazasyn ótep shyǵyp, qazir otbasymen birge tirshilik etip jatyr.

14-qazan – Maraldyń qyzy Sabınanyń (belgili sebepterge baılanysty onyń da esimi ózgertilip otyr) týǵan kúni bolatyn. Úı ıelerin quttyqtap shyǵý maqsatynda Jetisý aýdany probasııa qyzmetiniń bastyǵy, Erbol Jaqypov,  aǵa ınspektor Gúlnur Dýsheva, ınspektorlar Ashat Bolat, Almas Namazbekov, «Máńgilik Qazaqstan» qoǵamdyq qorynyń qyzmetkerleri jáne «Arman – Mechta» eriktiler toby Maraldyń shańyraǵyna bas suqty. Qonaqtar úıge kirgen boıda týǵan kún ıesine syı-syıapat jasap, tartý-taralǵy taratty. «Biz probasııa qyzmetinde esepte turǵan azamattar men azamatshalarǵa únemi qolymyzdan kelgen kómegimizdi kórsetip kelemiz, – dep sóz bastady delegasııa basshysy E.Jaqypov. – Qaıǵysy bolsa bólisemiz, qýanyshy bolsa da osylaı ortaqtasamyz. Búgingideı sharalar bizdiń aýdanda óte jıi ótedi. Olardyń bárin úkimettik emes uıymdarmen jáne eriktilermen tize qosyp uıymdastyramyz. Maraldyń isine sáttilik, januıasyna bereke tileımiz». Eriktiler toby da lebizin bildirdi. «Prezıdent Q.Toqaevtyń 2020 jyldy eriktiler jyly dep jarııalaǵany barshaǵa aıan. Memlekettik saıasatty qoldaý maqsatynda bir top jastar eriktiler uıymyn quryp, kóptegen qoǵamdyq, áleýmettik is-sharalardyń basy-qasynda júrmiz. Sabınanyń qýanyshyna ortaqtasyp, onyń rızashylyǵyna bólený biz úshin úlken abyroı. Oǵan tek qana jaqsylyq tileımiz. Aýrý-syrqaýdan, pandemııadan aman bolyńyzdar. Bizdi osyndaı sharaǵa shaqyrǵan Jetisý aýdandyq probasııa qyzmetine rahmet», dep Altynaı esimdi eriktiler tobynyń múshesi júrekjardy tilegin aıtty. Quttyqtaýshylar qatarynda júrgen úkimettik emes uıymnyń joba jetekshisi B.Nálibaev bul qýanyshqa Almaty qalasy Qoǵamdyq damý basqarmasynyń da yqpaly bar ekenin atap ótti. Onyń aıtýynsha basqarma bıyl bas bostandyǵynan aıyrý ornynan shyqqan adamdardy áleýmettik beıimdeýge baǵyttalǵan jobany jarııalap, túrmedegi jáne túrmeden shyqqan adamdarǵa quqyqtyq, psıhologııalyq, áleýmettik qoldaýlar kórsetip jatyr. Sabınanyń týǵan kúnine syı-syıpat jasaý osy ıgi isterdi bir parasy eken. «Biz buǵan deıin qala boıynsha 3 otbasyǵa kirip, osyndaı qoldaý jumystaryn uıymdastyrdyq. Mine, búgin tórtinshi shańyraqqa da at basyn burdyq. Tıtteı jumystar kóp istelgen jerde úlken ister bitedi ǵoı. Biz úlken iske úles qosyp jatqanymyzǵa senimdimiz», deıdi qoǵamdyq qor qyzmetkeri.

Shara aıaqtalǵan soń úı ıeleri qonaqtarǵa alǵys aıtyp, shyǵaryp saldy.

 N.Naýryzálıev