17 Qazan, 2020 NEWS

Jańa qaýly. Qazaqstannyń birneshe oblysynda karantın kúsheıtiledi

Foto: Ashyq derekkóz

Nur-Sultan qalasy jáne Qaraǵandy, Shyǵys Qazaqstan, Pavlodar, Aqmola, Almaty oblystarynda karantın rejımi kúsheıtiledi. Bul týraly oblystardyń bas sanıtar dárigerleri málimdedi.

Nur-Sultan qalasynyń bas sanıtar dárigeri Janna Pralıeva karantındi kúsheıtýge qatysty qaýly shyǵardy.

Ol adamdar kóp bolatyn ýaqyttarda avtobýs sanyn ulǵaıtyp, qoǵamdyq kólikte barlyq esikti ashýdy tapsyrdy. Jeksenbide avtobýstar júrmeıdi, jumys kúnderi tańǵy 6.00-den 23.00-ge deıin qatynaıdy.

Elordanyń bas sanıtar dárigeri 65 jastan asqan turǵyndarǵa kitaphana, teatr jáne mýzeılerge barýǵa tyıym saldy. Teatrlarǵa spektaklderge baratyndar sany bir ýaqytta 50 adamnan aspaýǵa tıis. 

Al Qaraǵandy oblysynyń bas memlekettik sanıtar dárigeri Iýrıı Zalygın 19 qazannan bastap karantın kúsheıtiletinin habarlady.

"19 qazan saǵat 00:00-den bastap oblys aýmaǵynda sanıtar beketteri qoıylady" delingen habarlamada.

Ol karantın rejıminiń kúsheıtilýi kórshi óńirlerde koronavırýs ınfeksııasyn juqtyrǵandar sanynyń artýymen baılanysty ekenin atap ótti.

Sondaı-aq 65 jastan asqan turǵyndarǵa múmkindiginshe úıde otyrý qajet. Memlekettik organdar men uıymdar jetekshilerine qyzmetkerlerdiń 50 prosentin qashyqtan jumys isteýge kóshirý usynyldy (30-dan astam qyzmetker bolsa).

О́nerkásiptik kásiporyndar, avtovokzaldar men avtostansııalarda smart beınebaqylaýy bar teplovızerler bolýy kerek ekeni aıtyldy.

Shyǵys Qazaqstan oblysynda 17 qazan - 31 qazan aralyǵynda karantın kúsheıtiledi.

Bul týraly óńirdiń bas memlekettik sanıtar dárigeriniń orynbasary Gýlıaım Taǵaeva málimdedi.

Qaýlyǵa sáıkes, adam kóp jınalatyn, otbasylyq sharalardy ótkizýge, aýdandar men oblys ishindegi qalalar arasyndaǵy avtobýstar qatynaýyna salynǵan tyıym saqtalady.

Pavlodar oblysynda karantın sharalary 18 qazannan bastap kúsheıtiledi. Bul týraly oblysynyń bas memlekettik sanıtar dárigeri málimdedi.

Qaýlyǵa sáıkes:

  • Qujatta ǵımarat ishindegi qoǵamdyq tamaqtaný oryndaryna (ashyq aýada qyzmet kórsetýdi qospaǵanda) saǵat 08.00-den 22.00-ge deıin jumys isteýge ruqsat beriledi. Bul rette, nysannyń tolymdylyǵy 30 orynnan aspaýy, áleýmettik ara qashyqtyq jáne ústelder arasyndaǵy 2 metr qashyqtyq, bir ústel basyna 4-6 adamnan otyrǵyzý talaptary saqtalýy tıis.
  • Ujymdyq, saltanatty, otbasylyq, jáne basqa da is-sharalarǵa tyıym salynady.
  • Azyq-túlik dúkenderiniń jumys ýaqyty saǵat 22.00-ge deıin ǵana ruqsat beriledi.
  • Fıtnes-ortalyqtardyń, jattyǵý zaldary men sporttyq-saýyqtyrý ortalyqtarynyń qyzmetteri 30 paıyzdyq tolymdylyqpen saǵat 08.00-den 20.00-ge deıin júrgiziledi.
  • Saýda ortalyqtarynyń, saýda úıleriniń, saýda jelileriniń jumys ýaqyty saǵat 18.00-ge deıin ǵana bolady.

Al, 16 qazannan bastap Aqmola oblysynda karantın kúsheıtildi.

Qaýlyǵa sáıkes: 

  • 65 jastan asqan azamattardyń dalaǵa shyǵýyna shekteý engizildi; túngi saǵat 23:00-den tańǵy 06:00-ge deıin komendanttyq saǵat engizildi (óńirdiń kóshelerinde júrý);
  • demalys kúnderi avtobýstardyń júrýine tyıym salyndy;
  • taksı eki adamnan artyq tasymaldamaýy tıis;
  • saıabaq, skverlerde 3 adamnan artyq top bolyp júrýge bolmaıdy;
  • aýmaǵy 1000 sharshy metrden asatyn saýda ortalyqtary, saýda, oıyn-saýyq ortalyqtary men azyq-túlik emes dúkenderdiń jumysy shekteledi. Jumys kúnderi saǵat 19:00-ge deıin ashyq bolsa, demalys jáne mereke kúnderi jabyq bolady;
  • jumys kúnderi azyq-túlik dúkenderi men jabyq bazarlardyń jumys ýaqyty 17:00 deıin shekteledi. Demalys jáne mereke kúnderi jumys istemeıdi;
  • azyq-túlik dúkenderi men meıramhanalardyń jumys ýaqyty saǵat 09:00-den 22:00-ge deıin belgilendi;
  • qoǵamdyq tamaqtaný oryndary 30 kelýshi nemese syıymdylyǵynyń 50 paıyzyn ǵana qabyldaýy tıis;
  • memlekettik organdar qyzmetkerleriniń 80 paıyzy qashyqtan jumys isteýge kóshiriledi;
  • HQO jumys kestesi shekteledi;
  • fıtnes-ortalyqtar syıymdylyǵynyń 50 paıyzyn ǵana qabyldaýy tıis;
  • 5-ten 180-ge deıin oqýshysy bar mektepterge synypta balanyń sanyn 15-ten asyrmaı jumys isteýge ruqsat etiledi;
  • poshtalar saǵat 14:00 deıin ǵana jumys isteıdi.

Almaty oblysynyń bas memlekettik sanıtar dárigeri E. Sydymanov oblysta karantın sharalaryn kúsheıtetin jańa qaýlysyn shyǵardy.

Qaýlyǵa sáıkes:

  • 50 orynnan joǵary qoǵamdyq tamaqtaný oryndary (meıramhana, kofehanalar, dámhanalar, banket zaldary, ashanalar,  doner, barlar);
  • Barlyq menshik nysanyndaǵy mektepke deıingi uıymdarda 15 adamnan aspaýy tıis;
  • Oıyn-saýyq nysandary (túngi klýbtar, kalıanhanalar, barlar, býkmekerlik, kórmeler, bılıard, karaoke, kvester, loto, kompıýterlik klýbtar t.b)
  • Qoǵamdyq kólikterdiń tasymaldaý qyzmeti 10:00-17:00 deıin kestege sáıkes, saǵat 6:00-10:00 deıin jáne saǵat 17:00-20:00 deıin 5 mınýttan aspaıtyn reısaralyq ıntervalmen;
  • 65 jastan asqan azamattarǵa kóshege shyǵýǵa tyıym salynady.

Qaýlynyń tolyq mátini myna siltemede

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir