15 Qazan, 2020 NEWS

"Sózsiz qan tógiledi". Otstavkaǵa ketemin degen Sooronbaı Jeenbekovtyń úndeýi

Foto: Ashyq derekkóz

Qyrǵyzstan prezıdenti Sooronbaı Jeenbekov búgin, 15 qazanda eldegi qalyptasqan qoǵamdyq-saıası jaǵdaıǵa baılanysty qyrǵyzstandyqtarǵa úndeý jasap, otstavkaǵa ketý týraly sheshim qabyldaǵanyn málimdedi, dep habarlady Sputnik Kyrgyzstan.

Sooronbaı Jeenbekov elde ózine qarsy agressııa basylmaı turǵanyn aıtty.

"Qymbatty otandastar! Elimizdiń astanasy – Bishkektegi qoǵamdyq-saıası jaǵdaı shıelenise túsýde. Keshe Jogorký Kenesh úkimet quramyn bekitti, men Qyrǵyzstan prezıdentiniń tıisti taǵaıyndaýlar týraly jarlyqtaryna qol qoıdym. Biraq bul shıelenisti jeńildetken joq. О́kinishke qaraı, agressııa azaımady, meniń tez arada otstavkaǵa ketýim týraly talap áli jalǵasýda. Qazirgi jaǵdaı eki jaqty qaqtyǵysqa jaqyn. Bir jaǵynan – narazylyq bildirýshiler, ekinshi jaǵynan-quqyq qorǵaý organdary. Áskerı qyzmetshiler men quqyq qorǵaý organdary memlekettik rezıdensııany qorǵaý úshin qarý qoldanýǵa mindetti. Bul jaǵdaıda sózsiz qan tógiledi. Eki tarapty da arandatýshylyqqa ermeýge shaqyramyn.

Qymbatty meniń otandastarym! Men úshin Qyrǵyzstandaǵy beıbitshilik, eldiń tutastyǵy, halqymyzdyń birligi jáne qoǵamdaǵy tynyshtyq bárinen joǵary. Men úshin árbir otandasymnyń ómirinen qymbat eshteńe joq. Meniń bılikke talasym joq. Qyrǵyzstan tarıhynda óz azamattaryna qan tókken jáne oq atqan prezıdent retinde qalǵym kelmeıdi. Sondyqtan otstavkaǵa ketý týraly sheshim qabyldadym. Japarov pen basqa da saıasatkerlerdi óz jaqtastaryn el astanasynan shyǵaryp, Bishkek turǵyndaryna beıbit ómirdi qaıtarýǵa shaqyramyn. Eshbir bılik bizdiń elimizdiń tutastyǵy men qoǵamdaǵy kelisimine qarsy tura almaıdy. Jaratqan bizge jar bolsyn, jerimizde beıbitshilik pen tynyshtyq bolsyn!" delingen Jeenbekov málimdemesinde.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir