«Bıýdjetke qatysý» jobasy boıynsha ótinish berýge jeti kún qaldy: júzege asyrylyp jatqan jobalarǵa sholý

Búgin Almaty qalasynyń óńirlik kommýnıkasııalar qyzmeti «Bıýdjetke qatysý» jobasy aıasynda qala turǵyndarynyń bastamasymen júzege asyrylyp jatqan nysandar boıynsha baspasóz týryn uıymdastyrdy. «Bıýdjetke qatysý» - bul ózara is-qımyl tetigi, munda almatylyqtar bıýdjet qarajaty esebinen aýla alańdaryn jaqsartyp, jańa gúlzarlar nemese trotýarlar sala alady.

Almaty qalasynyń ákimi Baqytjan Saǵyntaev qala turǵyndaryn zamanaýı standarttarǵa sáıkes keletin yńǵaıly, jaıly jáne qaýipsiz qoǵamdyq keńistiktermen qamtamasyz etetin sapaly qalalyq ortany qalyptastyrýǵa erekshe nazar aýdaratynyn atap ótken jón. Turǵyndar óz kezeginde aýdannyń, kósheniń, aýlanyń qalalyq kelbetin jaqsartýǵa óz úlesterin qosa alady. Ol úshin ótinimdi osy jyldyń 20 qazanyna deıin budget.open-almaty.kz saıtynda berý qajet. Saraptama komıssııasy smetany jáne ózge de qujattamany daıyndaý máselelerinde járdem kórsetedi. Qandaı ıdeıalar iske asyrylatyny týraly sheshimdi osy aýdannyń aýmaǵynda turatyn qala turǵyndarynyń ózderi qabyldaıdy. Aǵymdaǵy jyly árbir aýdanǵa 800 mln teńge bólindi, bul rette bir jobanyń somasy 55,5 mln teńgeden aspaýy tıis.

Jalpy, osy jobanyń arqasynda qala turǵyndary "shetsiz qala" qaǵıdasyna sáıkes turǵylyqty jerine qaramastan jalpy paıdalaný oryndaryn jaqsartyp, demalys pen bos ýaqytty ótkizý úshin qolaıly jaǵdaılardy qamtamasyz ete alady.

Arnaıy baspasóz týry barysynda paıdalanýǵa berilgen nysandar nemese iske asyrýdyń sońǵy satysynda turǵan jobalar tanystyrylyp, qatysýshylar aralap kórdi. Atap aıtqanda, qatysýshylar negizinen keıinnen qosylǵan qalanyń tórt aýdanynda ornalasqan abattandyrylǵan saıabaqtarǵa, balalar oıyn jáne sport alańdaryna bardy.

Baspasóz týryna qatysýshylar Túrksib aýdanyndaǵy balalardyń oıyn alańyn, Jetisý aýdany Aınabulaq-1 shaǵyn aýdandaǵy saıabaqty, Naýryzbaı aýdanyndaǵy basketbol, fýtbol jáne Workout alańdaryn, Medeý aýdanynyń Samal-1 shaǵyn aýdanyndaǵy saıabaqty aralap kórdi.

Odan bólek, qatysýshylar Naýryzbaı aýdanyndaǵy Qalqaman-2 shaǵyn aýdanyna baryp, onda basketbol, fýtbol jáne workout alańdaryn aralady. Bul aýmaqta shaǵyn arhıtektýralyq formalar ornatylyp, rezeńke tósemder salyndy. Naýryzbaı aýdany turǵyndarynyń bastamasymen 7 joba iske asyryldy. Olardyń kóbi irgeles aýlalardy, saıabaqtardy abattandyrýǵa, balalar jáne sport alańdaryn ornatýǵa qatysty.

«Aǵymdaǵy jyly Naýryzbaı aýdanynda «Bıýdjetke qatysý» jobasynyń aıasynda 6 balalar, sporttyq alańdar salyndy. Munda Qalqaman-2 shaǵyn aýdanynda úsh nysan: skeıtbord, basketbol alańy, workout aımaǵy bar. Jobanyń aıasynda kógaldandyrý, aýmaqty jaryqtandyrý qarastyrylǵan», - dep tolyqtyrdy Naýryzbaı aýdany ákimi apparatynyń abattandyrý bóliminiń bas mamany Ońalbek Qydyrbaev.

Odan keıin baspasóz týrynyń qatysýshylaryna Jetisý aýdany Aınabulaq-1 shaǵyn aýdandaǵy gúlzar tanystyryldy, búginde mundaǵy jumystar aıaqtalǵan. Aýmaǵy 2400 sharshy metr bolatyn saıabaq aýmaǵynda rezeńke jamylǵy tóselip, asfalt tóseldi. Oryndyqtar, ýrnalar ornatylǵan, 2 workout alańy bar.

«Bul ýchaske shóp basyp ketken bos jatqan jer bolatyn. «Bıýdjetke qatysý» jobasynyń aıasynda atalǵan jobany turǵyndarmen birlesip jasap, olardyń usynystaryn qabyldady. Bul aýmaqta turǵyndardyń paıdalanýy úshin barlyǵy qarastyrylǵan», - dep atap ótti Jetisý aýdany ákimi apparatynyń abattandyrý bóliminiń bas mamany Ernar Batyrov.

Baspasóz týryna qatysýshylar Túrksib aýdany, Bekmahanov kóshesi boıyndaǵy Spasskaıa kóshesiniń buryshyndaǵy balalar oıyn alańynyń aǵymdaǵy jóndeý jumystarymen tanysty. Onyń janynda fýtbol alańy bar. Alań oıyn jabdyqtarymen, shaǵyn sáýlet formalarymen jabdyqtalǵan. Jaryq tartylǵan, oryndyqtar men ýrnalar bar. Alańdar 11 kóp páterli jáne 80-nen astam jeke turǵyn úılerge jaqyn ornalasqan.

«Bul jerde, kórip otyrǵandaryńyzdaı, balalar alańynyń aǵymdaǵy jóndeý jumystary boıynsha jumystar jalǵastyryldy. Jumysty aýdannyń merdiger uıymdary júrgizdi, ol jumystar mamyr aıynda bastalyp, shildede aıaqtaldy. Sodan beri turǵyndar osy alańdy paıdalanýda. Jalpy, 2019-2020 jyldarǵa arnalǵan «Bıýdjetke qatysý» jobasynyń aıasynda Túrksib aýdanynda bes joba júzege asyryldy», - habarlady Túrksib aýdany ákimi apparatynyń abattandyrý bólimi basshysynyń mindetin atqarýshy Raıhan Nurpeıisova.

Baspasóz týry barysynda Medeý aýdany Samal-1 shaǵyn aýdanyndaǵy saıabaqty abattandyrý jobasy tanystyryldy, búginde munda jóndeý jumystary áli de júrgizilýde. Saıabaq aýmaǵyndaǵy qoǵamdyq keńistikti jaılastyrýmen birge jasyl aımaqty damytý jáne jalpy qalalyq ortany jaqsartý kózdelgen. Saıabaqta sport alańy paıda bolady, oryndyqtar men ýrnalar ornatylady. Jaryqpen qamtamasyz etý úshin kabel tóseledi, 15 jaryqtandyrý tirekterimen jabdyqtalǵan. Gazon tóselip, 30 túp kóshet jáne 50 buta otyrǵyzylǵan.

«Bul jobanyń avtorlary osy shaǵyn aýdannyń turǵyndary. Jobany komıssııa maquldap, basqa turǵyndar da qoldady. Ol biraýyzdan qabyldandy, Joldasbekov kóshesiniń boıynda balalar alańdary jetkilikti bolatyn, alaıda úlkenderge, sonyń ishinde qart adamdarǵa arnalǵan sport alańdary joq bolatyn», - dep atap ótti Medeý aýdany ákimi apparatynyń abattandyrý bóliminiń basshysy Maqsut Nurǵalıev.