Nazarbaev: 100 myń otbasy 50 myń teńgeden alady

"Nur Otan" partııasynyń tóraǵasy Nursultan Nazarbaev orynbasary Baýyrjan Baıbekti qabyldap, praımerız qorytyndysyn talqylady, dep habarlady elbasy.kz saıty.

"Partııa tóraǵasynyń birinshi orynbasarynyń aqparatyna sáıkes, partııalyqtardyń 84,2 paıyzy daýys berýge qatysty. Onyń 88 paıyzy onlaın formatta qatysqan. Tirkelgen 10 073 úmitkerdiń 36 paıyzy áıel, 29 paıyzy 35 jasqa deıingi jastar. Partııaishilik irikteý qorytyndysy boıynsha 20 myńnan astam usynys, onyń ishinde turǵyn úı qatynastary jáne TKSh, ınfraqurylym jáne kólik, bilim berý jáne densaýlyq saqtaý salalary boıynsha jınaldy" delingen habarlamada.

Saıt málimetinshe, Nursultan Nazarbaev praımerız naqty áleýmettik lıftke aınalǵanyn, bul partııalyq qatarlardy jańartýǵa, sonymen qatar qajetti sabaqtastyqty saqtaýǵa múmkindik bergenin atap ótti.

– Bul partııanyń aýqymdy is-sharasy boldy, oǵan kóptegen adamdar qatysty. Biz ony alǵash ret ótkizdik. Partııanyń nazaryn talap etetin kóptegen tilekter men suraqtar aıtyldy. "Nur Otan" – naqty ister partııasy. Biz qabyldaǵannyń bári mindetti túrde oryndalýy tıis, – dedi Nazarbaev..

Sonymen qatar, tuńǵysh prezıdent partııanyń saılaýaldy baǵdarlamasynyń jobasyna jeke toqtaldy.

– Saıası keńes bıýrosynda biz respýblıkalyq saılaýaldy baǵdarlamanyń jobasyn talqyladyq. Baǵdarlamada kúrdeli jaǵdaıdy eskere otyryp, bizdiń maqsattarymyz ben aýqymdy mindetterimiz qoıylǵan. Partııanyń barlyq músheleri osyǵan baǵdarlanady. Saıyp kelgende, munyń bári halyqtyń ál-aýqatyna baǵyttalǵan. Bizdiń barlyq saılaýaldy ýádelerimiz eseptelýi tıis, – dedi partııa tóraǵasy.

Kezdesý barysynda Elbasy partııaǵa "Birgemiz" qorymen birlesip, búkil el boıynsha taǵy 100 myń áleýmettik osal topqa jatatyn otbasyǵa 50 myń teńgeden qosymsha ataýly tólem uıymdastyrýdy pysyqtaýdy tapsyrdy.

– Partııanyń ortalyq apparaty men aktıvimiz úlken jumys atqardy. Men olardyń qajyrly eńbegi úshin bárine rızamyn. Alda áli naqty ister kóp. El ıgiligi úshin jumysty jalǵastyrý mańyzdy, – dep aıaqtady sózin elbasy.