12 Qazan, 2020 Almaty

Jazasyn ótep jatqan adamdarǵa arnalǵan psıhologııalyq trenıngter ótti

Foto: Trenıng kezinde túsirilgen

Almaty qalasy Qylmystyq-atqarý júıesi departamentine qarasty túrmelerde jazasyn ótep jatqan jandar úshin «Máńgilik Qazaqstan» qoǵamdyq qory arnaıy psıhologııalyq trenıng uıymdastyrdy. LA-155/6, LA-155/13, LA-155/18 túzeý mekemelerindegi trenıng Almaty qalasy Qoǵamdyq damý basqarmasynyń qoldaýymen ótti.

Barlyq trenıngti psıhologııa ǵylymdarynyń kandıdaty, praktık, qaladaǵy Daǵdarysqa qarsy ortalyqtyń qyzmetkeri Janna Iаvorskaıa júrgizdi. Onyń trenıng júrgizý tásili kelesideı: qatysýshylarǵa qalam men qaǵaz usynyp belgili bir taqyrypta sýret saldyrady, sosyn sýretke qarap otyryp, sýretti salǵan adamnyń jan-dúnıesine baǵa berip, onyń psıhologııalyq portretin jasaıdy. «Shyn máninde sýretter syr shertedi. Adamdar ishki kóńil-kúıin barynsha jasyrǵanymen, ol báribir ártúrli kanaldarmen syrtqa shyǵyp, kórinis beredi. Sýret salý sondaı taptyrmas qural. Sýretten avtordyń tipti jan jarasy, ýaıymy, minez-qulqy baıqalyp turady» deıdi psıholog hanym.

   Trenıngter aldyn ala belgilengen tártippen júrgizildi. Jazasyn óteýshi sýret salǵanymen, avtor retinde óziniń aty-jónin kórsetpeıdi. Bul tutqyn psıhologııalyq qysymǵa ushyrap qalmasyn dep jasalǵan amal edi. Sebebi sýret avtorynyń kim ekeni belgili bolsa, oǵan psıhologııalyq portret berilip jatqanda basqa seriktesteri keleke qylýy da yqtımal edi. J.Iаvorskaıanyń sózinshe jazasyn ótep jatqan adamdardyń ishki jaı-kúıi ártúrli. «Mysaly, men olarǵa kez kelgen ań-qustyń, jan-janýardyń sýretin salyńyzdar degenimde, bir tutqyn aqqý men qoltyraýynnyń sýretin qatar saldy. Bul sýret avtorynyń qanynda tektilik bolǵanyn, alaıda ol jaza basyp, boıyndaǵy jaqsy qasıetke qııanat jasap alǵanyna ókinetinin kórsetedi. Taǵy bir túrmede trenıng ótkizgenimde qatysýshylardan kez kelgen ertegi keıipkerin sýretteýdi suradym. Tutqyndardyń biri orys ertegilerindegi mystan kempirdiń úıiniń syrtqy kórinisin salypty. Meniń oıymsha bul sýrettiń avtory kóp nárseni jasyratyn tomaǵa-tuıyq kisi. Psıhologtar mundaı adamdarmen kóp áńgimelesý qajet. Áıtpese erteń olar qaıta bosap shyqqannan keıin, taǵy da zań buzýy múmkin» deıdi ol.

Barlyq ternıngterdiń basy-qasynda uıymdastyryp júrgen «Máńgilik Qazaqstan» qoǵamdyq qorynyń joba jetekshisi Beıbit Nálibaevtyń aıtýynsha atalǵan is-sharalar Almaty qalasy Qoǵamdyq damý basqarmasynyń qoldaýymen iske asyrylyp jatyr eken. «Joba aıasynda psıhoáleýmettik baǵdarlamalar uıymdastyrý qarastyrylǵan. Psıhologııalyq trenıngter sonyń bir parasy. Budan bólek jazasyn ótep shyqqandarmen de osyndaı jumystar júrgizilip jatyr» deıdi uıymdastyrýshy.

N.Naýryzálıev

Ilmek sózder: trenıng

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir