09 Qazan, 2020 NEWS

Zeınet jasy tómendetile me? Mınıstr jaýap berdi

Foto: qamshy.kz

Qazaqstan úkimeti zeınet jasyn tómendetý máselesin qarastyryp jatqan joq. Bul týraly eńbek jáne halyqty áleýmettik qorǵaý mınıstri Birjan Nurymbetov onlaın brıfıngte málimdedi. 

– Zeınet jasyn tómendetý jóninde usynystar kelip jatyr. Jalpy, zeınet jasyn ulǵaıtý men tómendetý máselesi bir mezette sheshiletin dúnıe emes. Kez kelgen elde, álemde bul máselege qatysty sheshim qabyldanǵanda – úlken zertteýler, uzaq merzimdi boljamdar jasalady. Bul jerde ekonomıkalyq, demografııalyq faktorlar eskeriledi. Jumys istep júrgen azamattar men zeınetkerlerdiń sanynyń arasyndaǵy ara qatynas mólsheri, halyqtyń jalpy qartaıý qarqyny, sondaı-aq basqa da kórsetkishter eskeriledi, – dedi mınıstr.

Ol elde zeınetaqynyń úsh júıesi qalyptasqanyn aıtty.

– Memleket tarapynan eki túri tólenedi: jasyna baılanysty zeınetaqy men bazalalyq zeınetaqy bar. Sondaı-aq jınaqtaýshy zeınetaqy qorynan jınalǵan qarjy esebinen zeınetaqysy bar.

Kez kelgen zeınetaqynyń túri eńbek ótiline tikeleı baılanysty. Iаǵnı neǵurlym eńbek ótili joǵary bolsa, soǵurlym zeınetaqynyń mólsheri de joǵary. Bul turǵyda ekonomıkalyq ta, eńbek naryǵynyń máselesin eskerý qajet. Mysaly, jumys istep júrgen azamattar men zeınetkerlerdiń arasyndaǵy araqatynas mólsheri qaralady. Osydan 10 jyl buryn zeınetkerlerimizdiń sany jumys istep júrgenderge qatysty 20 paıyz bolsa, ıaǵnı 5 adam 1 zeınetkerge sáıkes keletin. Qazir 30 paıyzdan asyp jatyr. Ekinshiden, halyqtyń qartaıý dınamıkasy deımiz, bizde 65 jastan asqan aǵa býyn sany kóbeıip jatyr. Bes jyl buryn 6,8 paıyz bolsa, búginde 7 paıyzǵa jetti.

Álemdegi trendterdi eskere otyryp, búkil dúnıe júzindegi elder qaıta zeınet jasyn ulǵaıtýdy oılanyp jatyr. Árıne, Eýropada jáne basqa da damyǵan elderde zeınet jasy bizdikinen buryn da joǵary edi. Al kórshiles elimizdi qarasaq, mysaly Reseıde 2019 jyldan bastap erler men áıelderge zeınet jasyn 5 jasqa úlkeıtý sharalary qoldanyla bastady. Ázerbaıjan da 2017 jyldan bastap osy sharany qoldanyp jatyr, – dedi Nurymbetov onlaın brıfıngte.

Mınıstr úkimettiń tarapynan zeınet jasyn tómendetý máselesi qarastyrylyp jatqan joǵyn atap aıtty.

– Álemdik tájirıbeni de eskerip, ózimizdiń ekonomıkalyq, demografııalyq jaǵdaıǵa súıene otyryp, búgingi tańda úkimettiń tarapynan zeınet jasyn tómendetý máselesi qarastyrylyp jatqan joq – dedi B.Nurymbetov

Ilmek sózder: zeınet Nurymbetov

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir