ERIKTILER SANY EREKShE QARQYNMEN KО́BEIDI

Memleket basshysy Qasym-Jomart Toqaevtyń bastamasymen 2020 jyl Volonterler jyly dep bekitilgen bolatyn. Qazirgi tańda Qazaqstannyń ár aımaǵynda eriktiler kómegimen atqarylyp jatqan jumys jeterlik. Eriktiler jylynda Taldyqorǵan qalasynda qandaı sharalar qolǵa alynyp, atqarylyp jatqanyn bilý maqsatynda "Nur Otan" partııasy Almaty oblystyq fılıaly janyndaǵy "Jas Otan" jastar qanaty kommýnıkasııa bóliminiń basshysy Juldyz Bekmuratqyzymen suhbattasyp kórgen edik.

– Juldyz, sizdiń volonterler qataryna qosylǵanyńyzǵa qansha ýaqyt boldy?

– Men 2016 jyly Taldyqorǵan qalasynyń polıtehnıkalyq kolledjine oqýǵa tústim. Sol kezden bastam belsendi bolyp, qoǵamdyq jumystarǵa aralasyp júrdim. Odan keıin volonterlik is jaıly estip bildim. Esh oılanbastan erikti bolýdy sheshtim. Men erikti bolyp "Jastarǵa qyzmet kórsetý" ortalyǵynda ,"Jas Otanda", polıtehnıkalyq kolledjdiń eriktiler tobynda jumys atqardym.

– Volonterlik ispen qaı jastan bastap aınalysýǵa ruqsat etiledi? Qandaı da bir shekteýler joq pa?

– Volonterlik ispen mektep jasynan bastap aınalysa berýge bolady. Iаǵnı, 14 jastan asqan balalar eriktiler qataryna qosyla alady.

–Jasyratyny joq, shet elderde volonterlik is jaqsy damyǵan, bizdiń elde eriktiler qataryn kóbeıtý úshin ne isteý kerek?

– Jalpy, osy jyly eriktiler sany erekshe qarqynmen kóbeıdi. Sebebi, ótken jyl "Jastar jyly" bolsa, osy jyl "Volonterlar jyly" dep ataldy. Osyǵan baılanysty eriktiler jumysynyń jaqsy júrýine kóp qoldaý kórsetilip jatyr. О́kinishke qaraı, qazirgi tańda eriktilerdiń kim ekenin bilmeıtinder de bar. Eriktiler sanyn arttyrý úshin kóptegen aksııalar, is-sharalar uıymdastyrý kerek. Jastardy bul ispen jaqynyraq tanystyrý kerek.

– Jyl basynan beri Taldyqorǵan qalasynda qandaı is-sharalar júrgizildi?

–  Qazir Respýblıkamyzdyń barlyq óńirinde júzege asyp jatqan shara bar. Ol - "Dárigerlerge myń alǵys" aksııasy. Bizdiń eriktiler toby aýrýhanalarǵa baryp, dárigerlerge kómek kórsetti. Olarǵa qymyz, shubat aparyp, alǵysymyzdy aıttyq. Jáne de "Qarttarym, asyl qazynam" aksııasy júrýde. Jalǵyzbasty qart kisilerge, múgedek jandarǵa únemi kómektesip otyramyz. Dári-dármek, azyq-túlik jetkizip beremiz. Budan bólek, "Jyly meıirim", "Mektepke jol" syndy aksııalar ótkizdik.

– Elbasynyń resmı saıtyndaǵy derekterde aıtylǵandaı, álemde 970 mıllıon adam volonter bolsa, onyń ishinde, árbir segizinshi qazaqstandyq erikti qataryna qosylady eken. Bizdiń qalamyzdaǵy belsendilik qandaı?

– Qazir qalamyzdyń túkpir-túkpirinde volonterler toby qurylyp jatyr. Biz sol toptardyń ashylýyna baryp júrmiz. О́zimiz olardyń qandaı jumys atqaryp jatqanyn, bir-birine degen qarym-qatynastaryn kórip, kómek kórsetip jatyrmyz. Bizdiń qalamyzda jaqynda "Volonterler lıgasy" ashylǵan bolatyn. Sol jerge baryp qaıttyq. Mine, osynyń ózi úlken jetistik. Aldaǵy ýaqytta da mundaı toptar kóbeıedi degen úmittemiz.

– Qazirgi tańda volonterlik ispen jastar qarqyndy aınalysyp júr. Al eriktiler qataryna úlken býynnyń qosylýy qalaı?

– Negizi "jaqsylyq jas talǵamaıdy" deıdi ǵoı. Bizge baǵyt-baǵdar kórsetý úshin aqyl-keńesimen bólisý úshin úlken kisiler kelip kómektesedi. Aǵa-ápkelerimiz "qalaı erikti bola alamyz?" degen saýaldarmen keledi. Karantın kezinde biz "Jas Otan" jastar qanatynyń parqshasynda onlaın volonter aksııasyn ótkizdik. Sol kezde onlaın volonterler qatarynda úlken býyn kóp boldy. Árıne, olardyń belsendiligi bizdi qýantty.

– Sizdiń oıyńyzsha volonter bolý jas býynǵa ne beredi?

– Erikti bolý ár adamǵa ár túrli sezim syılaıdy. Volonter bolǵan kezińde qoǵamǵa jaqyndaısyń. Kómekke muqtaj jandardy kóresiń. Birneshe ret kómek kórsetkennen keıin bul ispen qaıta aınalysqyń kelip turady. Erikti adam aınalasyndaǵylarǵa únemi kómektesip, qoldap júredi. Ár adamdy óz jaqynyndaı kóredi. Adam boıyna meıirimdilik, janarshylyq sezimin uıalatady.

– Volonterler únemi adamdarǵa kómek kórsetip júredi. Al memleket tarapynan volonterlerge qandaı qoldaý kórsetilip jatyr? –

–Kóptegen volonterlardyń qaıyrymdylyqqa qatysty ıdeıalary bar jáne olar ony júzege asyrǵysy keledi. Osy tusta memleketimiz erikti adamǵa 300 myń teńge usynady. Volonter óziniń jobasyn uıymdastyryp, ony tanystyrady. Joba jeńiske jetse, memleketten bólingen qarjyny alyp, ony ıgeredi. Mine, osylaı kez-kelgen volonter óz armanyn iske asyra alady.

– Halqymyz "jumyla kótergen júk jeńil" deıdi ǵoı. Qıyn-qystaý kezeń, karantın ýaqytynda halyqqa qandaı kómek kórsetildi?

–  Osy karantın kezinde eriktilerdiń jumysy aıqyn kórindi. Aýrýahanalarda dárigerler jetispegen kezderde bizdiń volonterlar baryp, qol ushyn sozǵan bolatyn. Jáne de kóp adamdar dárihana aldynda kezekte turyp qalmasyn dep, barlyq dárihanalardy aralap, dárilerdiń tizimin jasap úlestirip otyrdy. Úıden shyǵa almaıtyn adamdarǵa dári-dármek, azyq-túlik aparyp beretin avtovolonterler jumys jasady. Barlyq qajetti zattardy jetkizdi.

– Sizdiń oıyńyzsha "Eriktiler jyly" aıaqtalǵannan keıin qaıyrymdylyq jumystary qoǵamnan joǵalyp ketýi múmkin be?

– Osy jyl bizge eriktilerdi jańa qyrynan kórsetkendeı boldy. Olardyń atqaratyn jumystarynyń qoǵam úshin mańyzdy ekenin baıqadyq. Aldaǵy jyldarda bul úrdis toqtap qalady dep oılamaımyn. Sebebi, osy jyl kóp adamnyń kózin ashyp, kókiregin oıatty. Aınalamyzda kómekke muqtaj jandardyń bar ekenin, olarǵa kómek qolyn soza alatynyn kóp adam túsindi. Kishkentaı bolsyn meıirimdilik tanytyp, ony basqalarmen bólisýdiń mańyzy zor ekenin baıqadyq. Bul jyl tek bastamasy dep bilemin. Alda áli talaı belester bar. Volonterler qatary tolyǵyp, qaıyrymdylyq ister jalǵasatynyna senemin.

 

– Áńgimeńizge rahmet!

 

Suhbattasqan - Erkejan SEIDAHMET