"Jemqorlyq – jegi qurt": Alık Shpekbaev jurtshylyqpen kezdesti

Taldyqorǵanǵa arnaıy issaparmen sybaılas jemqorlyqqa qarsy is-qımyl agenttiginiń tóraǵasy Alık Shpekbaev keldi.

Áýeli Alık Jatqambaıuly, Almaty oblysynyń ákimi Amandyq Batalov, densaýlyq saqtaý basqarmasynyń basshysy О́mirzaq Nııazbekov bastaǵan top oblystyq juqpaly aýrýlar aýrýhanasyna bardy.

Alık Jatqambaıuly kompıýterlik tomografııa, sandyq rentgen apparaty, eki gemodıalız apparaty qoıylǵan bólmelerdi jáne jatyn bólmelerdi aralady. Bir mezgilde 200 adamdy emdeýge arnalǵan aýrýhananyń 20 tósegi jansaqtaý bólimine arnalǵan. Eń basty másele – joǵary sanatty dáriger jetispeýshiligi men baspana. Aq halatty abzal jandarǵa arnap 17 turǵyn úı satyp alynǵan eken. Odan bólek, dárigerlerge arnalǵan 60 páter men jataqhana salynýda. Onda úılenbegen jáne otbasyly mamandarǵa arnalǵan bólmeler bolady.

Agenttik tóraǵasy I.Jansúgirov atyndaǵy Jetisý memlekettik ýnıversıtetiniń 288 oryndyq jańa Stýdentter úıine baryp, «Sanaly urpaq» klýbynyń kóshbasshylarymen jáne «Izgilik elshileri» eriktiler qozǵalysynyń belsendilerimen kezdesti.

Jyl basynda ashylyp, qoldanýǵa berilgen «Open Taldyqorgan» servıstik ákimdiginde búgingi kúni 8 qyzmetker jumys isteıdi. Búgingi kúnge deıin 9517 ótinish qaralyp, 491 memlekettik qyzmet kórsetildi.

Sapar sońynan Saltanat saraıynda qoǵam belsendilerimen, bıznes-qoǵamdastyqpen jáne BAQ ókilderimen ashyq kezdesý ótti. Jıyn Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý sheńberinde azamattyq qoǵammen syndarly dıalog qurý maqsatynda ótkizildi.

Sybaılas jemqorlyqqa qarsy strategııany oblysymyzda júzege asyrý baǵytynda birqatar is-shara kesheni qolǵa alynǵan. Sondaı-aq, 15-ten asa joba sybaılas jemqorlyqtyń aldyn alýǵa baǵyttalǵan. Bul jóninde aımaq basshysy Amandyq Batalov:

– Búginde ákimdik tarapynan kórsetiletin memlekettik qyzmet 83 paıyzǵa júıelengen. Jyl sońyna deıin kórsetkishti 90 paıyzǵa jetkizý josparda bar. Jer resýrstary kartasyna jerdiń 7 kategorııasy engizildi. Sońǵy 2 jyl ishinde 809 myń gektardan asa jerdiń qoldanysta emestigi anyqtaldy. Onyń 569 myń gektary aýylsharýashylyq salasyn damytýǵa bólindi. 100 myń gektary memleket ıeligine qaıtaryldy, – degen Amandyq Ǵabbasuly oblys kóleminde sybaılas jemqorlyqtyń aldyn alýǵa baǵyttalǵan jumystarmen tanystyrdy.