"Ketýge daıynmyn". Qyrǵyzstan prezıdenti málimdeme jasady

Qyrǵyzstannyń prezıdenti Sooronbaı Jeenbekov eldegi saıası ahýalǵa baılanysty kezekti ret úndeý jasady, dep habarlady 24.kg saıty.

Jeenbekov Qyrǵyzstandaǵy jaǵdaı múldem nasharlaǵanyn jáne ony qalypqa keltirý úshin belgili bir qadamdarǵa barýǵa daıyn ekenin atap ótti.

– Jańa parlament saılaýyn taǵaıyndaý qajet. Bul týraly sheshimdi ortalyq saılaý komıssııasy qabyldaıdy. Bul sharalar qazirgi saıası shıelenisti tómendetedi, – dedi Sooronbaı Jeenbekov.

Prezıdenttiń aıtýynsha, daǵdarysqa deıin jumys istegen premer-mınıstr men úkimet múshelerin otstavkaǵa jiberý, jańa taǵaıyndaýlarǵa zańdy túrde múmkindik beredi.

Mınıstrler kabıneti men onyń músheleriniń taǵaıyndaýlaryn zańdastyrý úshin Jogorký Keneshtiń qaýlysy men prezıdenttiń úkimi kerek.

Qyrǵyzstannyń zańdy prezıdenti eldegi jaǵdaı turaqtalǵan soń óz ornynan ketýge daıyn ekenin málimdedi.

– Atqarýshy bılik organdarynyń basqarýshylary zańdy túrde taǵaıyndalyp, memleket zań jolyna túsken kezde, men Qyrǵyzstan Respýblıkasy prezıdenti qyzmetinen ketýge daıynmyn, – dep qorytyndylady Sooronbaı Jeenbekov.

Biraz ýaqyt buryn Qyrǵyzstan prezıdentiniń baspasóz hatshysy Tolgonaı Stamalıeva "prezıdenttiń otstavkasy týraly sóz bolǵan joq" degen bolatyn.

Qyrǵyzstandaǵy tártipsizdik 5 qazan kúni parlament saılaýyna qarsy bolǵan myńdaǵan adam jınalǵan mıtıngten bastalǵan edi. 6 qazan kúni OSK saılaý nátıjesin jaramsyz dep tanýǵa májbúr boldy.