"Aqordaǵa deıin jetemiz". Iri holdıngtiń qyzmetkerleri jalaqysyn ala almaı júr

Kókshetaýdaǵy "Qazeksportastyq" AQ holdınginiń ishki qaýipsizdik qyzmetkerleri kompanııa jalaqylaryn bermeı otyrǵanyn aıtyp shaǵyndy. Bul týraly kokshetau.asia habarlady.  ⠀

Shaǵymdanýshylardyń aıtýynsha, kompanııa olarǵa on mıllıon teńgege jýyq qaryz. Qyzmetkerler birneshe aıdan beri zeınetaqy jarnalary toqtap qalǵandyǵyn aıtady.

– Bul kompanııada 2014 jyldan beri jumys isteımin. Osy jyldyń qańtarynda bizdi aqysyz eńbek demalysyna jiberdi, sodan keıin karantın bastaldy. Birneshe aıdan keıin men qyzmetimniń qysqartylǵany týraly habarlama aldym. Kompanııanyń maǵan qaryzy  –  2,7 mıllıon teńge. 2019 jyldan bastap zeınetaqy jarnalary joq, biz nesıe ala almaımyz. Bulaı jalǵasa beretin bolsa, biz Aqordaǵa jetemiz, parlamentke júginemiz jáne prezıdent bizdi tyńdaıdy dep senemiz. Oınap jatqan joqpyz, meniń úsh balam bar, otbasymdy asyraýym kerek, – deıdi kompanııa qyzmetkerleriniń biri.

Qyzmetkerler ártúrli organdarǵa úndeý joldaǵanyn, biraq ázirge nátıje joq ekenin kúıinishpen aıtty. 

Jýrnalıster jaǵdaıdyń mán-jaıyn bilý úshin kompanııanyń qabyldaý bólimine habarlasqan. Tutqany kótergen hatshy qyz qyzmetkerlerdiń jalaqysynyń keshiktirilýi týraly aqparatty rastaǵan. Alaıda karantınge baılanysty basshylyqtan eshkim joq ekenin aıtqan. ⠀ ⠀