Aımaǵambetov: Pedagogter qosymsha aqy alady

Bilim jáne ǵylym mınıstri Ashat Aımaǵambetov pedagogterdiń qosymsha aqy alatynyn aıtty. Bul týraly ol tehnıkalyq jáne kásiptik bilim berýdiń 80 jyldyǵyna arnalǵan is-shara barysynda habarlady.

Onyń aıtýynsha, buǵan deıin biliktilik sanaty úshin qosymsha tólemdi tek mektep muǵalimderi alatyn. "Pedagog mártebesi týraly" zań boıynsha kolledj pedagogteri de qosymsha aqy alatyn bolady.

– Memleket basshysynyń qoldaýymen 2020 jyldyń qańtar aıynan bastap kolledj pedagogteriniń jalaqysy artty. Aldaǵy jyldary da arta túspek. Biliktilik sanaty úshin pedagogterge qosymsha aqy tóleý máselesi kóp jyldar boıy kóterilgen bolatyn. Eger mektepterde muǵalimder biliktilik sanattary úshin qosymsha aqy alsa, kolledjderde mundaı úrdis bolǵan joq. Endi kolledj pedagogteri de aı saıyn laýazymdyq jalaqysynyń 30-dan 50 paıyzyna deıin qosymsha aqy alatyn bolady. О́z kezeginde kolledj dırektorlary men dırektor orynbasarlarynyń atqarǵan jumysynyń tıimdiligine baılanysty óz jalaqysynyń 100 paıyzyna deıin qosymsha aqy alý múmkindigi bar. Bul áriptesterimizdiń jumysqa degen ynta-jigeri men jumystyń tıimdiligin arttyra túspek, – dedi mınıstr.