Qazaqstandyqtar Borat-2-ge qarsy petısııa jarııalady

Qazaqstandyqtar secure.avaaz.org saıtynda brıtanııalyq komık Sasha Baronnyń "Borat-2" fılminiń kórsetilýine qarsy petısııa jarııalady. Qazirgi tańda petısııaǵa 104 myńǵa jýyq adam qol qoıǵan.

Petısııa avtorynyń sózinshe, fılm rasızm men ksenofobııaǵa toly.

"Olar Qazaqstan men qazaq halqynyń ar-namysyn qorlap otyr. Onyń ústine fılm kadrlary shynaıy jaǵdaımen esh sáıkes kelmeıdi. Fılm avtordyń qııalynan týǵan elde túsirilgen bolsa, birsári. Biraq olaı emes. Bul fılm shyn memleketti, ol jerdegi azamattardy kelemejdeıdi. Atalǵan fılm uly tarıhy bar uly eldiń azamattary úshin jańa problema týdyrady. Sheteldikterge fılmniń ázil ekenin udaıy túsindirýge týra keledi. Kórip turǵanymyzdaı, shyn máninde bul (fılm avtorynyń áreketi – red.) ázildi emes, elge degen qurmetsizdikti kórsetedi" dedi avtor jazbasynda.

Petısııa avtorlary 200 myń qol jınaýdy maqsat etken.

Buǵan deıin Instagram men Twitter jelilerinde Qazaqstan úkimetiniń resmı paraqshalary delingen feık paraqshalar paıda boldy. Onyń paıda bolýy fılmniń jarnamasymen baılanystyrylyp jatyr. Paraqshaǵa Sasha Baronnyń ózi repost jasaǵan.

Atalǵan paraqshaǵa "qazaq halqynyń dosy Donald Trampty debattaǵy jeńisimen quttyqtaımyz" delingen bir ǵana materıal salynǵan. Vıdeomaterıal Tramptyń ár kezde sóılegen sátterinen turady.

"Borat" fılminiń alǵashqy bólimi 2006 jyly shyǵyp, Qazaqstanda úlken shý týdyrǵannan keıin el aýmaǵynda kórsetýge tyıym salynǵan.

Fılm jelisi boıynsha rejısser ári bas keıipkerdi somdaǵan Sasha Baron qazaqstandyq jýrnalıst Borattyń ómirin kórsetedi.