"Sandardy sapyrý". Nyǵmatýlın densaýlyq saqtaý mınıstrligin synady

Májilis tóraǵasy Nurlan Nyǵmatýlın koronavırýs indetine shaldyqqan medısına qyzmetkerlerine jáne pandemııadan qaıtys bolǵan dárigerlerdiń otbasylaryna tólenbegen ótemaqyǵa qatysty pikir bildirdi.

Nyǵmatýlın 22 qyrkúıektegi jaǵdaı boıynsha atalǵan indetke shaldyqqan dárigerlerdiń jalpy sanynyń 14 paıyzdan astamyna ǵana, al qaıtys bolǵan medısına qyzmetkerleri otbasylarynyń 13 paıyzyna jeter-jetpesine ǵana tólem júrgizilgenin atap ótti.

Onyń aıtýynsha, mundaı jaǵdaı densaýlyq saqtaý júıesi qyzmetkerleriniń narazylyǵyn týdyryp, memleket basshysyna jáne parlament depýtattaryna júginýge májbúr etedi.

Ol koronavırýs juqtyrǵan medısına qyzmetkerleri men qaıtys bolǵan mamandardyń otbasyna tólemaqynyń tólenbeýi – mınıstrliktiń áleýmettik bólimderiniń júıesiz, oılastyrmaı istelgen qadamynyń nátıjesi ekenin atap ótti.  

Nurlan Nyǵmatýlın densaýlyq saqtaý mınıstrligi jarııalaǵan aqparatty "sandardy sapyrý" dep baǵalady.

Atalǵan mınıstrlik  usynǵan aqparatqa sáıkes, eńbek mınıstrligine 4 064 ótinish berilgen. Sonymen qatar, qyzmet barysynda 8 333 dáriger,  barlyǵy 12 830 medısına qyzmetkeri koronavırýs ınfeksııasyn juqtyrǵan.

Májilis tóraǵasy mınıstr Alekseı Soıǵa joǵaryda atalǵan 4 064 ótinishtiń ózi fraksııa otyrysy bolatyny belgili bolǵannan keıin ǵana jasalynǵanyn aıtty.

Sondaı-aq koronavırýs ınfeksııasynan zardap shekken jáne qaıtys bolǵan medısına qyzmetkerleriniń kópshiligi aımaqtyq komıssııalardan rastaý ala almaǵan.  

– Eger ótken 6 aı ishinde 2 475 ótinim berilse, sońǵy sanaýly kúnder ishinde 1 589 ótinim berilgen. Iаǵnı, berilgender ótimder sany 1,6 esege artyp, al ótemaqy tólengen adamdar sany 2 esege deıin ósken. Alty aı ýaqyt ishinde barlyǵy 1 830 dáriger ótemaqyǵa ıe bolsa, al sońǵy biraz kúnde 1665 dárigerge tólemaqy berip úlgergen. Qaıtys bolǵan medısına qyzmetkerleriniń otbasylaryna ótemaqy tóleý boıynsha da jaǵdaı osyndaı, – dedi Nurlan Nyǵmatýlın.