Túrkistan oblysynyń polıseıleri Nur-Sultan qalasy men Jambyl oblysynyń turǵyndaryn 700 keli esirtkimen ustady, – dep habarlady Polisia.kz.

Túrkistan oblysy polısııa departamenti bastyǵynyń orynbasary Asyljan Qaldarbekovtyń málimetinshe, "Qarasora-2020" jedel-izdestirý sharalary aıasynda Sozaq polıseıleri jáne jergilikti qoryqshylar "Toyota Land Cruiser" avtokóligin mingen azamattardy ustaǵan.

Kólikti tintý kezinde 37 polıetılen qapshyǵy men ósimdik tektes esirtki zattary bar birneshe ydys tabylǵan.

Saraptama barysynda tárkilengen esirtki zaty jalpy salmaǵy 650 keliden asatyn "keptirilgen marıhýana" jáne 48 kelige jýyq "gashısh" ekeni anyqtaldy.

Ustalǵan eki kúdikti Nur-Sultan qalasy jáne Jambyl oblysynyń buryn sotty bolǵan turǵyndary ekeni belgili boldy. Kúdiktiler esirtki salynǵan qapshyqtar men ydystardy aldyn ala daıyndap, Jambyl oblysynan shyqqan. Odan ári olar Sozaq aýdany arqyly jol boıyndaǵy aınalma joldarmen Qostanaı oblysyna qaraı ketpek bolǵan. Alaıda Betpaqdala aýmaǵynda kólik júrmeıtin joldarmen jasyrynyp ketip bara jatqan kólikti qoryqshy baıqap qalyp, polısııaǵa habarlaǵan.

Atalǵan jaıt boıynsha qylmystyq kodektiń 297-baby 3-bóligine (Esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý) sáıkes qylmystyq is qozǵaldy.

Qazirgi tańda kúdiktiler qamaýda. Tergeý amaldary júrip jatyr.

Ilmek sózder: esirtkige qarsy kúres

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir