30 Qyrkúıek, 2020 NEWS

"Birlik" partııasynyń kezekten tys besinshi sezi ótti

Foto: inform.kz

«Birlik» partııasynyń Nur-Sultan qalasynda kezekten tys besinshi sezin ótkizdi, dep habarlaıdy QazAqparat.

Beınekonferensııa rejıminde ótken sezge partııanyń Nur-Sultan, Almaty, Shymkent qalalary men barlyq óńirden ókilderi qatysty.

Partııanyń tóraǵasy Serik Sultanǵalıdiń aıtýynsha, sezd aıasynda delegattardyń, sondaı-aq partııanyń barlyq aımaqtardaǵy músheleriniń usynystary qabyldandy.

«Bizdiń partııamyz óz jumysyna dálelsiz ádispen nazar aýdartýdan qashanda aýlaq boldy. Jumysymyzda bireýge unaý jaǵdaıaty bolǵan emes. Bizdiń partııa – naqty ister partııasy. «Nur Otan» ishki praımerız júrgizýde, basqa partııalar da belsendilik tanytyp otyr. Ýaqyt belsendilikti talap etip otyrǵany túsinikti», - dep atap ótti sezd barysynda sóz sóılegen «Birlik» partııasynyń tóraǵasy Serik Sultanǵalı.

Sonymen birge, ol «Aýyl» partııasymen birigý máselesine qatysty túsinikteme berip ótti. Atap óte keteıik, buǵan deıin biriktirýge qatysty usynystyń qabyldanbaǵany týraly habarlanǵan.

«Eseıgen partııa retinde, barlyq saıası oqıǵalarǵa qatysýǵa kúshimiz bar jáne oǵan daıynbyz. Bizdiń partııamyzdyń qaǵıdaty – qurǵaq ýáde bermeý, ıaǵnı saılaýshylar men halyqtyń aldynda kópti ýáde etip, bos sóz aıtpaý. Mysalǵa, bir aýylǵa sý qubyryn júrgizip bersek te, bul naqty jumys bolar edi. Az bolsa da, jumys. Eger bir kópbalaly otbasyna birer keli un, káspıt aparyp, aqshalaı kómektessek – bul naqty is», - dep atap ótti S.Sultanǵalı.

Sezd barysynda partııa Jarǵysyna ózgerister engizildi.

«Birlik» saıası partııasy qoǵamdyq birlestiginiń Jarǵysy 2016 jyldyń 3 aqpanynda bekitilgen. Partııa organdarynyń sheshimderdi jedel qabyldaý jáne QR qoldanystaǵy zańnamasyna sáıkes júrgizý maqsatynda partııanyń Jarǵysyna ózgerister men tolyqtyrýlar engizý usynylyp otyr. Jarǵyǵa engiziletin negizgi jáne mańyzdy ózgerister mynalar: sheshimderdi jyldam qabyldaý maqsatynda «Partııaǵa jańa múshelerdi qabyldaý týraly sheshim shyǵarý múmkindigi» bóliminde partııa tóraǵasynyń ókildigi tolyqtyryldy, partııa seziniń quzyreti tolyqtyryldy, Jarǵy partııa seziniń otyrysyn beınekonferensııa rejıminde ótkizýge múmkindik beretin bólimmen tolyqty. Partııa seziniń sheshimderin jedel qabyldanýyn qamtamasyz etý jáne ákimshilik shyǵyndardy qysqartý maqsatynda partııa sezin beınekonferensbaılanys rejıminde ótkizý qarastyrylyp otyr», - dedi partııa hatshysy Murat Qojamqulov.

Sonymen birge, partııa tóraǵasynyń quzyreti, sondaı-aq onyń ókilettigin óz erkimen merziminen buryn toqtatý jaǵdaıynda partııanyń jańa tóraǵasyn saılaý tártibi tolyqtyryldy.

«Partııa tóraǵasy óz ókilettigin merziminen buryn toqtatý týraly ótinishti berý kezinde Saıası keńes partııanyń jańa tóraǵasynyń saılanýyn qamtamasyz etý mindeti júkteletin atqarýshy hatshyny saılaıdy», - dep tolyqtyrdy partııa hatshysy.

Eske salsaq, buǵan deıin «Birlik» partııasy sezd ótkizetini týraly habarlaǵan edik. Sonymen qatar, «Aýyl» partııasy «Birlik» partııasynyń qosylý týraly usynysynan bas tartty.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir