Aqtóbe oblysy ákiminiń eks-orynbasary 12 jylǵa sottaldy

Búgin, 30 qyrkúıek kúni Aqtóbe oblysy ákiminiń burynǵy orynbasary Rýslan Mamýnov zańsyz aqsha alǵany úshin kináli dep tanyldy. Ol týysy – Qostanaı oblysynyń burynǵy ákimi Ahmedbek Ahmetjanovtan 1,2 mln dollar zańsyz aqsha aldy dep aıyptaldy. Nur-Sultan qalasy qylmystyq ister jónindegi mamandandyrylǵan aýdanaralyq soty sheneýnikti 12 jylǵa bas bostandyǵynan aıyrý jazasyn taǵaıyndady. Bul týraly "Nasha gazeta" basylymy habarlady.

Aıyptaý qorytyndysy boıynsha, Mamýnov bul aqshany 2016 jyly asa iri mólsherde para alǵany úshin sottalǵan Ahmetjanovqa baılanysty úkimdi jeńildetý týraly kelisimge ýáde bergeni úshin alǵan. Alaıda Mamýnov Qostanaı oblysynyń burynǵy ákiminiń áıeli men aǵasy bergen aqshaǵa Nur-Sultan qalasynan 2 bólmeli páter men eki Lexus kóligin satyp alǵan.

Nur-Sultan qalalyq sotynyń sýdıasy Ádilhan Shaıhıslamov Mamýnovqa qatysty úkimdi oqydy.

"Rýslan Mamýnov kináli dep tanylyp, oǵan ortasha qaýipsiz kolonııada 12 jyl bas bostandyǵynan aıyrý jazasyn taǵaıyndalsyn. Sondaı-aq qylmystyq jolmen kelgen aqshaǵa satyp alynǵan múlikti, ıaǵnı Lexus-NX-200, Lexus-LX-570 markaly kólikter men Qaldaıaqov kóshesindegi 2 bólmeli páter tárkilenedi" delingen úkimde.

Sýdıanyń aıtýynsha, Rýslan Mamýnov bastapqyda qylmystyq kodekstiń tórt baby boıynsha aıyptalǵan. Sot úkimi áli zańdy kúshine enbegendikten, jarııa etilgen kúnnen bastap 15 kún ishinde shaǵym jasalýy múmkin.

Rýslan Mamýnov 2019 jyldyń qarasha aıynda Aqtóbe oblysy ákiminiń orynbasary bolyp taǵaıyndalǵan. 2020 jyldyń aqpan aıynyń sońynda áleýmettik jelide sheneýniktiń ustalǵany týraly aqparat tarady. Ol bastapqyda bul aqparatty rastamaǵan.