Qazaqstanǵa 5G qashan qosylady? Mınıstr jaýap berdi

Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın halyq arasynda ınternetten qorqatyndar bar ekenin aıtty. Bul týraly ol premer-mınıstr Asqar Mamınniń tóraǵalyǵymen ótken úkimettiń selektorlyq otyrysynda habarlady.

– Halyq arasynda radıofobtyq qorqý bar. Bul degenimiz bizge tolyqqandy ınternetti jetkizýge kedergi jasaıdy. Mysaly, Family Village kesheninde 2-3 turǵynnyń aryzy boıynsha bazalyq stansııa alynyp, ınternetke qoljetimdilik toqtatyldy. Odan keıin baılanys operatory qaıtadan bazalyq stansııany ornatýǵa májbúr boldy. Biraq búgingi tańda ınternet gaz, elektr energııasy, sý birinshi qajettilikke aınalǵanyn bilemiz. Sol sebepti biz biraz zańnamalyq ózgeristerdi engizýdi usynamyz. Olar: Birinshi, kondomınıýmderge baılanys obektilerin alyp tastaýǵa tyıym salý. Ekinshi, jańa úılerdi paıdalanýǵa berý aldynda mindetti túrde optıka jelisimen qamtamasyz etý. Úshinshi, ınternettiń jyldamdyǵy týraly talaptardy oryndaý. Tórtinshi, optıkalyq transmıssııaǵa kishi operatorlarǵa teń qoljetimdikti qamtamasyz etý. Jalpy memlekettik organnyń rólin kúsheıtetin bolamyz, dedi – Baǵdat Mýsın.

Mınıstr 5G uıaly baılanys standarty elge qashan engiziletinin atap aıtty.

– 5G uıaly baılanys standartyn engizý boıynsha operatorlarmen birigip, Nur-Sultan, Almaty, Shymkent qalalarynda 11 synaq júrgizildi. Kerek jelilik dıapozondardy da bosattyq. Ári qaraı operatorlarǵa taratý mehanızmi qarastyrylady. Nur-Sultan, Almaty, Shymkent qalalarynda 5G jelileri 2022 jyly iske qosylady. Al oblystyq ortalyqtarda 2025 jylǵa josparlanyp otyr, – dedi mınıstr.