Zııaly qaýym ókilderi Joldaýdy júzege asyrýda birlik kúshiniń róli aıryqsha ekenin aıtty 

Almatydaǵy Dostyq úıinde «dóńgelek ústel» ótip, onyń barysynda Qazaqstan Prezıdenti Qasym-Jomart Toqaevtyń «Jańa jaǵdaıdaǵy Qazaqstan: Is-qımyl kezeńi» Joldaýy talqylandy.

«Dóńgelek ústeldiń» jumysyna QR Memlekettik hatshysy Qyrymbek Kósherbaev, Almaty ákimi Baqytjan Saǵyntaev, shyǵarmashyl zııaly qaýym ókilderi qatysty. Kezdesý barysynda mádenıet pen ǵylymnyń tanymal qaıratkerleri ulttyń rýhanı jańarýy týraly ózderiniń usynystarymen bólisti.

Memlekettik hatshy daǵdarysty jeńýde jáne halyqtyń jańa biregeıligin qalyptastyrýda shyǵarmashyl zııaly qaýymnyń aıryqsha rólge ıe ekenin atap ótti.

Kezdesýde jazýshylar, mádenıet pen ǵylym qaıratkerleri óz pikirilerin aıtty. Belgili qazaqstandyq akter, teatr men kıno rejısseri Asanáli Áshimov halyqtar birliginiń mańyzdylyǵyn atap ótti.

«Elimizdegi jaǵdaıdy ózgertý ortaq kúsh-jigerdi talap etedi. Búgingi kúni biz Prezıdenttiń halyqqa arnaǵan Joldaýynda qoıylǵan mindetterdi júzege asyrýǵa sózimizben jáne isimizben kómektesýge tıispiz», — dedi kezdesýge qatysqandardyń aldynda A. Áshimov jáne óskeleń urpaqtyń boıynda mádenı rýhty qalyptastyrýǵa erekshe nazar aýdarýǵa shaqyrdy.

Jazýshy, kınodramatýrg Smaǵul Elýbaev Joldaýda pandemııa saldarynan elimizde ekonomıkalyq daǵdarystyń beleń alǵanyn jáne ony jeńý úshin naqtyly sharalardyń kórinis tapqanyn aıtty.

«Prezıdent munaı dáýiriniń ótkenin aıtty. Bul – shyndyq. Endigi damý adamı faktordyń joǵary deńgeıimen baılanysty. Joldaýda aýyl sharýashylyǵyn damytýǵa kóńil bólingeni qýantady, óıtkeni, aýylsyz qazaq halqyn elestetýge bolmaıdy. Aýyl sharýashylyǵyn damytý aýyldy saqtap qalýdy bildiredi. Bul – selony jumyspen qamtý, bul — ekologııalyq sapaly ónim. Bul – ulttyń densaýlyǵy. Prezıdent qoǵam men árbir adamdy jaýapkershilik pen birlikke shaqyrady. О́mirdi sapalyq jaǵynan ózgertý jolynda biz bárimiz birge bolýǵa tıispiz», — dep atap ótti S. Elýbaev.

О́z kezeginde qoǵam qaıratkeri, mádenıettanýshy (kýltýrolog) Murat Áýezov jalpy qoǵam men memlekettiń jan-jaqty damýynyń mańyzdy ekenin aıtty.

«Joldaýda zamanaýı talaptarǵa laıyqty jaýap berý úshin qoǵam men halyqtyń kúsh-jigerdi biriktirýi tıis ekendigi aıqyn kórinis tapqan. Bizdiń aldymyzda halyqtyń jańa biregeıligin qalyptastyrý jóninde tarıhı mindet tur, bizdiń bolashaq damýymyz osyǵan baılanysty. Halyqtyń ǵasyrlyq kemeńgerliginiń úzdikterin alyp, alǵa nyq qadam basyp, ekonomıkalyq, saıası, rýhanı jáne mádenı turǵyda damıtyn bolamyz», — dedi M. Áýezov.