Rınat Zaıtov: Mıtıngte dıalog bolmaıdy (vıdeo)

Belgili aıtysker aqyn Rınat Zaıtov elde halyq pen bılik arasyna eki jaqqa da durys túsinikteme beretin dáneker qajet degen pikirde. Bul týraly ol jýrnalıst Nartaı Aralbaıulymen áleýmettik jelide ótken tikeleı efır barysynda aıtty. 

Ol óz sózinde elde taǵy da karantın qaıtalanatyn bolsa, bılik halyqqa túsindirme jumystaryn júrgizýi qajet ekenin atap ótti.

– Qazaqstanda ótken jolǵy karantın qaıtadan qaıtalanatyn bolsa, halyq pen bılik arasynda eki jaqqa da durys túsinikteme beretin dáneker qajet. Bizde qazir eshkim túsindirme jumystaryn júrgizip jatqan joq. Eshteńe túsinbegen halyq alańǵa shyǵady. Al, alańǵa shyqqan halyqty polısııa ustap áketip jatyr. Odan ne shyǵady? Dıalog shyǵady ma?! Sondyqtan qazirgi tańda eldiń tynyshtyǵyn, shekaranyń bútindigin oılaǵan jigitter barynsha jan-jaqtan dabyl qaǵyp úkimetpen dıalog quryp, parlamentke barý kerek. Mıtıngte dıalog bolmaıdy, – dedi Zaıtov.

Onyń aıtýynsha, elde parlament resmı túrde ǵana bar. Ol kózi kórgeli ádiletti saılaýdyń bolmaǵannyn atap ótti.

Sondaı-aq aqyn partııasynyń baǵdarlamasy daıyn ekenin de aıtty.

– Maǵan 20 myń adam jınaý qıyn emes. Partııanyń baǵdarlamasy daıyn tur. Biraq qazir partııany tirkeıtin saılaý komıssııasy joq. Men áreket jasaǵanymmen ony tirkemeıtinin bilemin. Sol úshin adamdardy áýrege salǵym kelmeıdi. Eger múmkindik berse, maǵan daıyn partııanyń artynan barǵan durys shyǵar saılaýǵa. Sonda artymnan ergen adamdardy dalada qaldyrmaımyn. Byltyr baqylaýshylardy qamaǵan kezde adamdardy alyp shyǵa almaı qaldyq, – deıdi aıtysker.

Suhbattyń tolyq nusqasyn tómendegi vıdeodan kóre alasyz