25 Qyrkúıek, 2020 NEWS

Toqaev dárigerlerdi koronavırýstyń ekinshi tolqynyna daıyn bolýǵa shaqyrdy

Foto: Aqorda

Qazaqstan prezıdentiniń Almatyǵa jasaǵan jumys sapary I.Jekenova atyndaǵy qalalyq klınıkalyq juqpaly aýrýlar aýrýhanasynyń jańa fılıalyna barýdan bastaldy. Bul týraly Aqordanyń baspasóz qyzmeti habarlady. 

Qasym-Jomart Toqaev 500 adamǵa stasıonarlyq medısınalyq járdem berýge arnalǵan jáne zamanaýı qurylǵylarmen jabdyqtalǵan palatalardy aralap kórdi.

Memleket basshysyna qaladaǵy medısınalyq-demografııalyq ahýal jáne COVID-19 indetine qarsy kúresý úshin qabyldanǵan sharalar, sondaı-aq medısınalyq jedel járdem qyzmetiniń jumysy jóninde baıandaldy. Prezıdent medısına qyzmetkerlerimen áńgimelesý barysynda ulttyq densaýlyq saqtaý salasyn odan ári damytý, medısınalyq mekemelerdi qajetti qurylǵylarmen jabdyqtaý, tósek-oryn men ınfraqurylymdy jańartý, sondaı-aq, dárigerlerdiń eńbekaqysyn arttyrý máselelerine toqtaldy.

– 2023 jylǵa qaraı medısına qyzmetkerleriniń eńbekaqysyn búkil ekonomıkadaǵy ortasha jalaqydan eki ese joǵary deńgeıge jetkizý mindeti qoıylady. Alǵashqy medısınalyq sanıtarlyq járdem berý isin damytýǵa basa mán beriledi. О́kinishke qaraı, biz bul salaǵa ýaqytynda nazar aýdarmadyq. Epıdemııa mundaı is-qımyldardyń qate ekenin kórsetti. Qazir jibergen qatelikterge durys kóńil bólip, olardy túzetýimiz kerek. Árıne, medısına árdaıym basty nazarymyzda bolady, – dedi Qasym-Jomart Toqaev.

Memleket basshysy koronavırýstyń yqtımal jańa tolqynyna daıyn bolýdyń mańyzdy ekenin atap ótti. Osy rette azamattarymyzdyń ómiri men densaýlyǵyn saqtaý úshin barlyq resýrsty jumyldyrý qajettigin aıtty.

– Qazir búkil álemdegi jaǵdaı kúrdeli. Eýropa men Amerıkada koronavırýstyń ekinshi tolqyny ótip jatyr. Osyndaı jaǵdaıda biz qyraǵylyq tanytyp, daıyn bolýymyz qajet. Pandemııanyń birinshi tolqynynan jaqsy sabaq aldyq. Bul tájirıbeniń paıdasy bolady. Árıne, qıyn boldy, qatelikter jiberildi, sonyń ishinde, Densaýlyq saqtaý mınıstrligi tarapynan da aǵattyqtar ketti. Bul qatelikterdi jumys barysynda jóndeýge týra keldi. Degenmen, kez kelgen tájirıbeniń, tipti aýyr bolsa da, paıdasy bar.  Sondyqtan ekinshi tolqynǵa daıyn bolaıyq. Sodan keıin búkil dúnıe júzimen, halyqaralyq qoǵamdastyqpen birge barlyq qıyndyqty laıyqty túrde eńserýge tıispiz, – dedi Prezıdent.

Kezdesý sańynda Memleket basshysy pandemııaǵa qarsy kúrestiń kúrdeli jaǵdaıynda atqarǵan qajyrly eńbekteri úshin dárigerlerge rızashylyq bildirdi.

Ilmek sózder: Koronavırýs Toqaev

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir